DELIA JIMMINA L-ALLEGAZZJONIJIET TA’ DAVID THAKE

ONE.COM.MT • Adrian Delia issa fetaħ il-kanuni fuq David Thake u qed jimmina l-allegazzjonijiet li għamel id-deputat tiegħu stess.
Waqt intervista fuq l-istazzjon tal-Partit Nazzjonalista, Delia xeħet dubju fuq l-aġir ta’ David Thake li jissimpatiżża mal-fazzjoni tal-eks Kap Simon Busuttil.
Saħansittra qal li dawn l-allegazzjonijiet ma huma xejn ħlief gossip.
KITBA: SAMUEL LUCAS
FILMAT: NET / ARKIVJI
Adrian Delia fetaħ attakk ġdid u fil-beraħ fuq id-deputat tiegħu stess, David Thake.
Delia għamel dan waqt intervista fuq l-istazzjon tal-Partit Nazzjonalista meta kien mistoqsi dwar jekk qatt ġiex offrut flus sabiex David Casa ma jitlax fl-elezzjoni tal-Parlament Ewropew.
Filwaqt li ċaħad din l-allegazzjoni, Adrian Delia tefa’ id-dubji fuq l-aġir ta’ David Thake meta sena ilu fuq l-istazzjon nazzjonali kien hu li għamel din l-allegazzjoni.
Fil-fatt Delia staqsa kif David Thake, li mhux sigriet li jissimpatizza mal-fazzjoni Busuttil, qatt ma mar għand il-Pulizija.
ADRIAN DELIA
KAP TAL-PARTIT NAZZJONALISTA
Jekk David Thake diġà kellu informazzjoni sena ilu għalfejn m’għaddijiex l-informazzjoni. David Thake meta għajtulu issa mar mill-ewwel.
David Thake kien l-ewwel persuna li ressaq din l-allegazzjoni fuq il-programm Xarabank.
Thake kien allega li Yorgen Fenech offra lil partit ta’ Delia €50,000 biex David Casa ma jitlax fil-Parlament Ewropew.
DAVID THAKE
DEPUTAT NAZZJONALISTA
Kemm kien l-ammont li offra Yorgen Fenech biex David Casa fil-Partit ma jiġix elett? Inti forsi infurmat jew ma nafx jekk intix infurmat li offra €50,000 Yorgen Fenech biex Casa ma jiġix elett?
Dwar din l-allegazzjoni, ftit tal-jiem ilu David Thake talab lill-Pulizija biex tinvestiga. Dan wara li Melvin Theuma taħt ġurament qal li Yorgen Fenech irrepeta din l-istess allegazzjoni.
Thake talab ukoll investigazzjoni interna fil-Partit Nazzjonalista.
Mistoqsi jekk hux se juża l-istess riga għalih innifsu u jirriżenja, Adrian Delia xejjen dawn l-allegazzjonijiet u saħansittra ddefinixxihom bħala gossip.
ADRIAN DELIA
Intant fl-istess intervista l-Kap Nazzjonalista attakka lill-Prim Ministru Robert Abela għax skontu mhux jieħu l-ebda deċiżjoni.
ADRIAN DELIA
Robert Abela ma qed jieħu l-ebda deċiżjoni. L-ebda.
Dan minkejja li anki l-ġurnalist ta’ midja indipendenti staqsih dwar kif il-Prim Ministru qed jieħu d-deċiżjonijiet, diffiċli kemm huma diffiċli. Bid-deċiżjonijiet li ħa l-Prim Ministru fl-aħħar jiem intqal li ġew stabbiliti l-ogħla standards politiċi ta’ mġieba u etika fi ħdan il-Partit Laburista u l-Gvern.
Dan flimkien mad-deċiżjoni fl-ewwel jiem tiegħu beda bi proċess ġdid u trasparenti għall-għażla ta’ Kummissarju tal-Pulizija ġdid u embarka fuq ħidma ta’ riformi fil-ġudikatura, fit-tisħiħ tas-saltna tad-dritt u l-governanza.
Dawn ir-riformi sabu l-appoġġ tal-Kummissjoni Venezja li laqgħet prattikament ir-rakkomdanzzjonijiet kollha tal-Gvern u l-pass li jmiss huwa li dawn ir-riformi issa jiġu abbozati f’liġijiet li jgħaddu mill-Parlament.