ရန်ကုန်မှာ ပြန်ဆုံမယ်
__________________
တောင်တန်းက စီးခဲ့၊
မြေပြန့်က စီးခဲ့၊
ခေတ်တစ်ခုလုံး တိုက်စားခဲ့သမျှ
အလွမ်းရော လူရော
ရန်ကုန်မှာ ဆုံကြမယ်၊
ခေတ်ကြီးထဲ ထည့်ခလောက်ထားတဲ့
နှင်းဆီတွေပွင့်ပြီ ယောက်ဖရေ...
လက္ဖက်ရည်ဆိုင် ထောင့်ဝိုင်းက ရယ်သံတွေအတွက်
ငါတို့ ပြန်ဆုံမှဖြစ်မယ်၊
လမ်းထိပ်အုတ်ခုံက ဂစ်တာဝိုင်းအတွက်
ငါတို့ ပြန်ဆုံမှ ဖြစ်မယ်၊
ငါတို့ရဲ့မျိုးဆက်လွတ်လပ်ခွင့်အတွက်
ငါတို့ရဲ့ လွတ်လပ်မှုကို ပေးထားပြီးပြီပဲ
ငါတို့အသံကို အလံတွေလိုလွှင့်ဖို့
ငါတို့ပြန်ဆုံရအုံးမယ်၊
ငေးလက်စ မြင်ကွင်းထဲက
အိပ်လက်စ အိပ်မက်ကို ပြန်ယူဖို့
ငါတို့ ပြန်ဆုံရအုံးမယ်၊
အမေ့ခြေဖဝါးရာပါတဲ့ ပိတ်စလေးလည်း နွမ်းပြီ၊
အမေ့ခြေအစုံကို ဦးခိုက်ဖို့
ငါတို့နှာဖူးတွေ တင်းထားမှ၊
ဆန့်လက်စ ဆံပင်တွေ ဖြီးထားမှ၊
ယောက်ဖရေ....
ရယ်စရာတွေအကြောင်းပြောပြီး ရယ်ရဖို့၊
ရန်ကုန်မှာ ဆုံကြမယ်၊
တောင်တန်းက စီးခဲ့၊
မြေပြန့်က စီးခဲ့၊
တစ်နိုင်ငံလုံးပွင့်ခဲ့သမျှ
ရနံ့ဟာ ရန်ကုန်ကိုရောက်လာမယ်၊
တောင်တန်း ၊ပြည်မ တစ်သားထဲကျဖို့
ငါတို့ ရန်ကုန်မှာ ပြန်ဆုံကြမယ် ။
ရိုးနီ
ဇွန် ၂၁/၂၀၂၄