අලිත් එක්ක ගෙවුන සුන්දර රැයක්.. නුවරගල | Nuwaragala | Ampara | Vlog 11 | Travel with Baja Baby

#travelwithbaby #nuwaragala #ampara
"නුවරගල"
නුවරගල කියන්නෙ අම්පාර දිස්ත්‍රික්කයේ මහියංගනය, දිඹුලාගල, දළුක්කනේ මහා මාර්ගය ඔස්සේ පිහිටා ඇති පෞරාණික බලකොටුවක්. මෙය සද්ධාතිස්ස රජුගේ සොහොයුරා වූ දුටුගැමුණු රජු සමඟ අමනාපකම් ඇති කාලයේද ඔහු සැඟවුනු ස්ථානය ලෙස තමයි සැලකෙන්නෙ. ප්‍රසිද්ධ පුරාවිද්‍යාඥ එල්ලාවල මේධානන්ද හිමියන්ට අනුව, නුවරගල ක්‍රිස්තු පූර්ව 119 සිට 109 දක්වා රට පාලනය කළ ලජ්ජ තිස්ස රජු විසින් ඉදිකරන ලද ආරාමයක් බවයි සදහන් වෙන්නෙ.
ඉතින් එහෙනම් සුන්දරම සද දැකපු ඒ සද එළියත් එක්ක රැය පහන් කරපු මතක පිටු අතරට කා වැදුනු කතන්දරයයි මේ...
නුගේගොඩ චරින්දුගෙ ගේ ගාවට යනකොට රාත්‍රී 11 පමන විය. හෝ හෝ ඉන්නකො පොඩ්ඩක් මුලට එමු. වෙනදා වගේම චරින්දුවගෙ ආරාධනාවෙන් යන්න ලෑස්ති උන ගමනක්. ගිය පාර ගැරඩිඇල්ලෙ ගියා වගේ නැතුව වේලාසනම දත කට මැදගෙන පිලිවෙලකට "නුවරගල" යන්න ලෑස්ති උනේ. වාහනෙත් සේරම අඩු පාඩු බලලා හෝදලා කරලා වෙනදා වගේම ලෑස්ති උනා.. හැබැයි කලින් දවසෙම වාහනෙ එලවලා සෑහෙන්න තෙහෙට්ටු වෙලයි හිටියෙ. කෝමෙන් කෝම හරි නුගේගොඩින් කට්ටියම දාගෙන හෙමින් සැරේ පිටත් උනේ මහියංගනය බලාගෙන. මහ ඔයට ලං වෙනකොට වෙලාව 7.00-8.00 පමන උනා.Map එකේ පිහිටෙන් කිලෝමීටර් ගානක් පාර වරද්දගෙන හොයන් යන්න උනා. ඔන්න ඉතින් මහ ඔය ටවුම කිට්ටු වෙනකොටම වාහනේ Battry එක Charge වෙන්නෙ නැතුව ගියා. ටවුමෙන් අරන් යන්න ඕන බඩු ටිකත් අරගෙන තල්ලුවක් දාලා වාහනෙත් ස්ටාර්ට් කරගෙන මුලින්ම ගියේ අපේ වනජීවී මාර්ගෝපදේශක තුමාගෙ නිවසට. පාර අයිනෙම තිබුන ඔහුගෙ පුංචි නිවසෙන් උදේ කෑම වේලයි දවල් බත් පතයි අරගෙන අපි නැවත පිටත් උනා නුවරගල මායිමට යන්නට. පුංචි කඩපිලක් අයිනෙ ජෑම් ගහක් යට සෙවනෙ වාහන පොඩ්ඩත් නවත්තලා ලහි ලහියේ ලෑස්ති උනේ ටිකක් ඉර මුදුන් වූ නිසාවෙනි.
අලි වැටෙන් රිංගා ගත් අපි දැඩි අව්‍ රශිමිය මැද්දෙම විශාල එලි මහන් බිම් පසු කරගෙන ඉදිරියට ඇදුනේ ඉක්මනිම්ම සෙවනක් සොයා ගැනීමටයි. දැඩි රශිමිය නිසාම බොහොම ඉක්මනින් විඩාවෙන බව නම් අපි කාටත් තේරෙන්නෙට වැඩි වෙලාවක් ගත නොවීය. තේක්ක යායක් මැද්දෙන් ඉදිරියට ඇදෙන අපි ඊලගට වඩා විමසිලිමත් වූවේ නුවරගල යනු අලින්ගෙ රජ දහනක් වූ නිසාවෙනි. තේක්ක ගස් මත තිබුන මඩත් ගස් අතු කඩා දමා ඇති ආකාරයත් එය ඔවුන්ගේ භූමිය බවට සලකුනු කොට ඇත. කෙසේවෙතත් වන ලැහැබට ඇතුලු වන තෙක් කිසිදු අලියෙකු මුන නොගැසුනු අතර වම් පස ඈත කන්දෙහි 3 නෙකුගෙ රංචුවක් (පවුලක් විය හැක) සෙමෙන් සෙමෙන් ගාටමින් කදුකරයේ මුදුනට ගමන් කරන සුන්දර දසුනක් නෙත ගැටුනි. ගත සීතල වී නැවත නැවුම් බවක් දැනෙන්නට වූයේ වන ලැහැබට රිංගා ගත් පසුව නමුත් නැවත එය මලානික වී ගියේ පර්වතය මුදුනට ගමන ආරම්භ වීමත් සමගය. පෙරදා සිට වාහනයද පදවාගෙන ආ මට නම් දැඩි ලෙස විඩාව දැනුනු අතර ගල් පොත්තකට වී විනාඩි කිහිපයක් හාන්සි වී නිදා ගන්නට වූයේ තවත් අඩියකුදු ඉදිරියට යෑමට නොහැකි නිසාවෙනි. මමත් තරුශත් විඩාව නිවා ගන්න තෙක් නිහඩව බලා සිටි අනෙක් සගයන්ට ස්තූති කරන අතර නැවත ගමන ආරම්භ කර හෝරවක පමන පසු පැමිනියේ පොකුණ වෙතයි. කඩමලු සියල්ල පසෙක ලා ගල්තලාව මත විනාඩි කිහිපයක් ගිමන් හැර පොකුණට බැස ගත්තෙ ඉමහත් ප්‍රීතියකිනි. හෝරාවක පමන කාලයක් ජල ක්‍රීඩා වල යෙදුන අපි දවල් අහාරයත් ගෙන ගල් ගුහාව දෙසට පිය මැන්නෙ සවස් යාමයට මෙහි සැබෑ හිමිකරුවන් වන සතා සිව්පාවා පැමිනෙන නිසාවෙනි.
ගුහාව තුල සැලකිය යුතු පිරිසකට ඉඩකඩ තිබෙන අතර වම් පසින් පුංචි පොකුනක් සෑදී තිබෙනු දක්නට ලැබේ. ඉතා බෑවුම් ප්‍රපාතයක් අනෙක් පසින් ඇති බැවින් ඉතා පරික්ෂාකාරි විය යුතුයි. බඩු භාන්ඩ පසෙක දැමූ මම ගල් තලාව මත හිද ඇස් ඉදිරිපිට වූ මනරම් දසුන නම් කියා නිම කල නොහැකිය. සගයන් රාත්‍රී ආහාරය පිළියෙල කරන අතර කූඩාරමක් නොමැතිව සද එළිය විද ගනිමින් නිදා ගන්නට සිතුන නිසාම එලි පහලියෙන් ඇතිරිල්ල දමා ගෙන සිටි අතර සගයක් කිහිප දෙනෙකු ඔවුන්ගේ රසාස්වාදය උදෙසා ගීත ගායනා කරන්නට වූ අතර මමද උන් තැනම අහස දෙස නෙත් යොමා සන්දර ගී පෙල අසා සිටියේ කාන්සිය මහන්සිය අමතක වී ගිය නිසාමය. රාත්‍රී ආහාරය ටෝච් එලියේ ආධාරයෙන් ගිල දැමූ අතර සද එළිය මුළු නුවරගල පුරාම විහිදී තිබුනේ පුදුමාකාර මනස්කාන්ත දසුනක් මවමිනි. පහල යම් පිරිසක් සිටියේ නම් ඔවුන්ව නෙත ගැටෙන තරමට එලිය තීව්‍ර වූ අතර මින් පෙර මෙවැනි දසුනක් නම් දැක තිබුනේ නැත.
ගතට දැනුන මද සුලගත් සමග සුව නින්දකට පත් වූ මම නැවත ඇහැරෙන විට පාන්දර 4.30 පමන වී තිබුනි. නෙත් ඉදිරියේ තිබූ දසුන නම් වචනෙකින් විස්තර කල නොහැකි තරමට දෑස් පිනවූ අතර නැවත උදේ 6 පමන වන විට හිරු නැගෙන අයුරුද ඉතා අපුරූ දසුනක් ගෙන දුනි. උදෑසන කරි කෝපි කෝප්පයකිත් බනිස් ගෙඩියකුත් බිස්කත් ටිකකුත් බඩට දා ගත් අපි ඉහලින් තිබුනි වතුර වලකින් බීමට වතුරද ගෙන නැවත ගමට ලගා වීමට බෑවුම ප්‍රදේශය භාවිතා කල අතර අතරමගදී "කිරිකොන්" කැලෑ කෑමක් රස විදින්නට ලැබුනු අතර නැවත ගම්මානය කරා පැමිනීමේදී දහවල් 2 පමන වී තිබුනි. වෑන් රථයේ බැටරිය බැස තිබුනු අතර තල්ලු කර පන ගන්වාගෙන ගයිඩ් මහතාගෙ නිවසට පැමින කිවුල් ජලයෙන් දිය නා ගෙන වැව් මාළු සමග බත් පතද කා කෙමෙන් නුවරගල එසේත් නැතිනම් දිඹුලාගල ට සමු දී නැවත නිවෙස් කරා පැමිනියේ සුන්දර මතකයන් ගොන්නක් ඉතිරි කර ගනිමිනි.
නුවරගල කදවුරු බැදීමට යන්නෙ නම් වනජීවි දෙපාර්තුමේන්තුවෙන් අවසර ලබා ගැනීම අනිවාර්ය වන අතර අවසර නොමැතිව ඇතුලු වී යම් ගැටලුකාරී තත්වයන්ට මුහුන දීමට සිදු විය හැකි බවත් කිසිදු විදියකින් පරිසරයට හානි නොකරන ලෙසත් ඉල්ලා සිටිමි.
මම...
Sameera Chathuranga
Travel with Baja Baby