Dalit sa Birhen ng Kapayapaan at Mabuting Paglalakbay

Dalit sa Birhen ng Kapayapaan at Mabuting Paglalakbay
-Inawit ng mga cantores ng Barangay Ulango ng siyudad ng Tanauan.
Lingid sa kaalaman ng marami, ang probinsya ng Batangas 'liban sa debosyon
nito sa Birhen ng Caysasay ay namamanata rin sa Birhen ng Antipolo, ito ay pinasimul'an
ng mga ninuno na noon pa man ay taun-taon umaahon sa bundok ng Antipolo at sa kanilang
pagbalik ay naiuuwi rin nila ang debosyon sa Birhen ng Antipolo, kaya naman marami
ang mga bara-barangay sa buong probinsya ng Batangas ang nakapasailalim sa titulo na ito,
sa siyudad palang ng Tanauan ay may sampung Barangay na ang nakapasailim dito.
Sa kasulukuyan, ang debosyon ng mga Batangueño sa Birhen ng Antipolo ay tuloy-tuloy padin, isa sa halimbawa nito
ay makikita sa maraming mga behikulong pribado at publiko na mayroong mga maliliit na imahen ng birhen ng Antipolo o estampita, ito'y isang tanda na ang behikulong ito ay nakaahon at nabendisyunan na sa Katedral ng Antipolo.
TRANSCRIPT:
Sa kumpas ng kalangitan
bukal sa pusong timtiman,
Ika'y aming igagalang,
Birhen ng Kapayapaan!
I
Ang simbahang mong ito
bungang debosyon sa iyo
ay aliw ng madlang tao
na sa iyo'y dumadalo;
ikaw ang aming saklolo
na sa demonyo'y lalaban.
Ika'y aming igagalang,
Birhen ng Kapayapaan!
II
Ang mga kampon ni Kristo
sa lahat ng biyaya mo
nakikilalang totoo
tanang kapangyarihan mo;
balang tao'y nasok dito
kaawaan mo at 'kamtan.
Ika'y aming igagalang,
Birhen ng kapayapaan!
III
Alin kundi ang tulong mo
lalo kay Jacinto Bernardo
sa kamatayang totoo
ng sangga't nang sumaklolo;
sa lahat ay tinangyag mo
buo mong kapangyarihan.
Ika'y aming igagalang,
Birhen ng Kapayapaan!
IV
Ganap na dalawang daan
dipang kanyang dinaanan
sa silangang karagatan
nang gabing siya'y sugatan;
gayon ang kaniyang tipan
na wala ngang pagkukulang.
Ika'y aming igagalang,
Birhen ng Kapayapaan!
V
Isang bata sa Angono
na sa ilog ay nahulog
dinaano't di nalunod
sa laking iyong saklolo;
lumalang ditong too
sa demonyong karamdaman.
Ika'y aming igagalang,
Birhen ng Kapayapaan!
VI
Isang dominiko naman
na may taglay na karamdaman
sa labi mong kaawaan
nag misa kinabukasan;
dito'y pinangigilasan
bunyi mong kapangyarihan.
Ika'y aming igagalang,
Birhen ng Kapayapaan!
VII
Isa namang malapit na
sa hukay pag tawag niya
sa awa mo ay sumigla
at nagbabangon 'pagdaka;
marami ang nakakita
nitong gawang kababalaghan.
Ika'y aming igagalang,
Birhen ng Kapayapaan!
VIII
Mga bulag sampung pilay
at mga lumpong lupaypay
pagkatanaw, pagkasilay
ang mukha mo'y nagtagumpay;
tayo'y magsamang magsaysay
ng kaniyang pagsinta.
Ika'y aming igagalang,
Birhen ng Kapayapaan!
IX
Kahit malayong totoo
ang bundok ng Antipolo
nadalo rin ang tao
pagdalaw lamang sa iyo;
kaya nga kaawaan mo
kaming lahat nananahan.
Ika'y aming igagalang,
Birhen ng Kapayapaan!
Sa kumpas ng kalangitan,
bukal sa pusong timtiman.
Ika'y aming igagalang, Birhen ng Kapayapaan!
Mga barangay na nakatanghal sa video:
Sambat - January 24, Second Saturday of June
Boot Silangan - First Sunday of June
Maugat - January 24
Bilog-Bilog - March 13-14
Balele Kanluran - January 24?, Last Sunday of May
Bagumbayan - January 24
Baloc-Baloc - January 24
Trapiche 2 - January 24
Malaking Pulo IFI - January 24 (affectionately called as "Nanay Angge")
Malaking Pulo Romano - January 24
Ang mga larawan ng bawat Birhen ay galing sa mga mananampalataya ng kani-kanilang mga barangay.

[@oscarselda871]

Mama Mary pray for us thank you po lord Jesus christ. Amen po 💖💖💖🙏🙏🙏

[@arvilurminita8392]

Ika'y Aming Iginagalang
"Birhen ng Kapayapaan"

[@johncarlomontecer9502]

Viva la virgen