Daily Devotion Day 17 EveningDevo Salmo 139:14 ASND

Salmo 139:14 ASND
'Pinupuri ko kayo dahil kahanga-hanga ang pagkakalikha nʼyo sa akin. Nalalaman ko na ang inyong mga gawa ay tunay na kahanga-hanga. '
Evening Devotion:Pasasalamat sa Obra ng Diyos
Ang Salmo 139:14 ay nagpapaalala sa atin na ang Diyos ay perpekto sa lahat ng Kanyang ginagawa, at kabilang doon ang pagkakalikha sa atin. Isipin mo ito: Hindi kailanman nagkamali ang Diyos sa paglikha sa iyo. Kahit may mga araw na pakiramdam mo ay hindi ka sapat dahil sa iyong mga pagkakamali, kahinaan, o pagkukulang hindi nababawasan ang halaga mo sa mata ng Diyos.
Parang isang magulang na patuloy na nagmamahal sa kanyang anak kahit ito’y magkamali, ganoon din ang Diyos sa iyo. Ginawa ka Niya nang natatangi, walang kapareho, at may layunin. Kaya kahit mahirap paniwalaan minsan, ang katotohanan ay nananatili: mahalaga ka, hindi dahil sa kung ano ang nagawa mo, kundi dahil sa kung sino ang gumawa sa Iyo ang Diyos na nagmamahal sa iyo ng lubos.
Ngayong gabi, magpahinga ka nang may kapayapaan, sapagkat ang Diyos na lumikha sa iyo ay hindi nagkakamali, at ikaw ay mahalaga sa Kanyang mga mata.
Tanong sa Pagninilay:
Ano ang isang bagay na pinagpapasalamat mo sa Diyos tungkol sa iyong sarili o sa araw na ito?
Paano mo mararamdaman ang pagiging kahanga-hanga ng gawa ng Diyos sa kabila ng mga hamon?