ฝัง
- เผยแพร่เมื่อ 4 ต.ค. 2024
- 文字稿:
拜六中晝翻點拄食飽爾，無啥代誌做，我就共平板電腦提出來耍，阿姊嘛是仝款，隨共耳機戴起去雙爿耳仔，開手機仔的影片咧看；拄搪休睏日，這陣毋耍欲等當時？阿公看著按呢，就隨講：「恁兩个莫閣耍手機仔，我𤆬恁來去公園仔耍，較袂規工耍手機仔，兩蕊目睭繩繩歹。」
來到公園仔一下看，哇！人山人海洘秫秫，無論趨流籠抑是幌韆鞦，攏總是人𤲍人，和欲坐一下吭翹椅，都愛排範排規晡久，是欲按怎耍？和阿公都看甲幌頭，阿姊就共阿公建議講：「咱莫踮遮佮人𤲍燒，閣來去揣看有別項通耍無。」
阿公躊躇一下仔，想想咧講：「我想著矣，阮細漢的時陣會當耍的物件是有夠濟的，看是欲放風吹、拍干樂、跳箍仔、搧牌仔、攑鼓仔燈．．．逐項有，攏免驚無地耍呢。」我愈聽愈心適，就緊共阿公講：「按呢咱來去攢一寡材料，家己做一个風吹來放，攏免驚會佮人相爭。」
已經三點矣，講著就做，阮隨去賣𨑨迌物仔的店頭，共愛用著的材料抾好勢，阿姊較頂真，講愛買一本教人做風吹的冊，轉來到厝，阮就隨動手落去做。阿公看甲真歡喜講：「明仔載若是閣這號天，咱就出來去放，微微仔風來去放風吹，是上蓋合的啦。」
註釋:
翻點huan-tiám︰十二點過後快一點鐘時。雙爿siang-pîng︰兩邊。拄搪tú-tn̄g︰剛好是、遇上。當時tang-sî︰何時。繩繩歹tsîn-tsîn--pháinn︰用眼過度而傷眼。洘秫秫khó-tsu̍t-tsu̍t︰人擠人、人很多。趨流籠tshu-liû-lông︰溜滑梯。幌韆鞦hàinn-tshian-tshiu︰盪鞦韆。𤲍kheh︰擁擠。吭翹椅khōng-khiàu-í︰翹翹板。排範pâi-pān︰排序、排隊。幌頭hàinn-thâu︰搖頭。𤲍燒kheh-sio︰人擠人就會心煩氣躁。躊躇tiû-tû︰遲疑。頂真tíng-tsin︰細心、仔細。上蓋合iōng-kài-ha̍h︰最適合。
Music by SoundGalleryBy from Pixabay
