ఆండాళ్ భక్తి అనంతం

శ్రీరంగనాథుడిని భర్తగా పొందడానికి ధనుర్మాసంలో మార్గళి వ్రతాన్ని ఆచరించిన సందర్భంలో, వటపత్ర శాయిని కీర్తిస్తూ గోదాదేవి పాడిన పాశురాలు 'తిరుప్పావై'గా నాలాయిర ప్రబంధంలో నిబద్దమయ్యాయి. ద్రవిడ వేదానికి తిరుప్పావై హృదయం లాంటిది.
‘మాసాలలో మార్గశిరాన్ని నేనే!' అన్నాడు శ్రీకృష్ణుడు. అంతేకాదు, ఆ మాసంతో ముడిపడిన ధనుర్మాస వ్రతం పరమ విశిష్టం. ప్రత్యేకించి తన హృదయాన్ని మాలగా శ్రీకృష్ణుడికి అర్పించి, ఆయన కోసం అల్లిన దండలను తాను ధరించి, 'ఆముక్తమాల్యద'గా వినుతికెక్కిన గోదాదేవి 'తిరుప్పావై' పాశురాలను వెలయించిన పవిత్ర సమయం ధనుర్మాసమే! ఆ స్వామిని తన స్వామిగా చేసుకున్న ఆండాళ్ భక్తి ఆ పాశురాల్లా ఆద్యంత రమ్యం!
'తిరుప్పావై' అనే మాట వినగానే గోదాదేవి కళ్ళ ముందు సాక్షాత్కరి స్తుంది. గోదాదేవినే 'ఆండాళ్' అని పిలుస్తారు. ఉపనిషత్సారమైన బ్రహ్మ విద్య తిరుప్పావైగా ప్రసిద్ధి పొందింది. తమిళంలో ఈ గ్రంథాన్ని 'వేదమనై తుక్కుం విత్తాంగు' అంటారు. 'వేదరాశి అంతా ఒక వృక్షం అయితే, దాని బీజం తిరుప్పావై' అని భావం. పణ్ణిద్దరు (పన్నెండు మంది) ఆళ్వారులు పాడిన/ రచించిన పాశురాలు 'నాలాయిర (నాలుగువేల) దివ్య ప్రబం ధం'గా, 'ద్రవిడవేదం'గా ప్రసిద్ధి పొందాయి. ఆ ఆళ్వారులలో గోదాదేవి ఒక్కరే మహిళ.
మహావిష్ణువు ఆజ్ఞ మేరకు సాక్షాత్తూ శ్రీ మహాలక్ష్మి భూలోకంలో గోదాదేవిగా అవతరించింది. శ్రీవిష్ణుచి త్తుల (పెరియాళ్వార్) ముద్దుబిడ్డగా పెరిగి, ఆండాళ్ అందరి హృదయాలనూ దోచుకుంది. శ్రుతి, స్మృతుల మూలార్థాన్ని తేట తేట పదాలతో తమిళంలో పాశురాలుగా పాడి, ధను ర్మాస (శ్రీ) వ్రతాన్ని ఆచరించింది. ఆనాడు గోపికలు అనంత శక్తిస్వరూపుడైన శ్రీకృష్ణుణ్ణి 'ప్రియమైన చెలికాడు అనే దృష్టితో ఆరాధించారు. ఆయ నను పొందగలిగారు. అదే దృష్టితో నారాయణుణ్ణి గోదాదేవి ఆరాధించింది. ఆమె శ్రీకృష్ణుణ్ణి ప్రియునిగా భావించి, నాయికా భావంతో శ్రీరంగనాయి కగా ప్రకటితమైన మహిత ప్రేమమూర్తి. మార్గాలన్నిటికీ తలమానికం
'ధనుస్సు' అంటే ఉపనిషత్ అర్థంలో 'ప్రణవం'! అదే 'ఓంకారం', అదే పరబ్రహ్మం!! 'ఆ పరమాత్మను చేరుకోవడానికి ఓంకారాన్ని ఉపాసించ డమే సరైన సాధనం' అని ఉపనిషత్తులు చెబుతున్నాయి. ద్వాపర యుగంలో శ్రీకృష్ణుణ్ణి పొందడానికి గోపికలు కాత్యాయనీ వ్రతాన్ని ఆచరించిన విధానాన్ని తెలుసుకున్న ఆండాళ్ ధనుర్మాస వ్రతాన్ని చేయాలని సంకల్పించింది.
సూర్యుడు మార్గశిర మాసంలో ధను రాశిలో ప్రవేశించినప్పటి నుంచి మకర రాశిలో ప్రవేశించే వరకూ... ఆ ముప్ఫై రోజులూ ధను ర్మాసం. మార్గశీర్షంలో ప్రారంభమైన ఈ మాసం మకర సంక్రాంతి వరకూ కొనసాగుతుంది. అందుకే మార్గశీర్ష మాసానికి అంత ప్రాధాన్యం. 'మార్గం' అంటే దారి. భగవంతుణ్ణి పొందడానికి భక్తులకు ఎన్నో మార్గాలు ఉన్నా వాటన్నిటికీ ఇది శీర్షం. అంటే శిరస్థానీయమైనది. అందుకే ఈ వ్రతానికి 'మార్గశీర్ష వ్రతం' అనీ, 'స్నాన వ్రతం' అనీ, 'శ్రీవ్రతం' అనీ... ఇలా ఎన్నో పేర్లు ఉన్నాయి.
#thiruppavai
#devotionalstory