呂柳仙唸歌集：勸世歌

20200512民生社區健康福氣站教材
勸世歌
這款的歌真稀罕，專講勸人在世間啊，
人有真𠢕真頇顢 ，俗語所講為人難嗯啊。
世界情理都淺淺，幾年中間就變遷，
抑若會當改惡來從善，一日無事小神仙。
講甲當今的世界，鳥為食亡人為財，
想真做人著海海，死從何去生何來咿。
咱欲來出世無半項，轉去雙手又空空，
來蹛世間若眠夢，死了江山換別人。
有人出世有家伙，兄弟無量起冤家，
想到真做人若人客，死了江山別人的。
做人毋通傷皮媚 ，人蹛世間無幾年，
喝一聲欲死目一下𥍉，萬事袂佮人相爭咿。
心肝一人想一款，海裡上深天上懸，
富貴艱苦免哀怨，莫非人講前世冤咧。
世情是我看蓋透，奸雄的人毋通交，
勸恁少年茈共老，賰錢是命免人𠢕咧。
世間富戶窒窒滇 ，敢是啊𠢕人咧賰錢，
抑若歹命看你偌𠢕變，𠢕人有的佇咧窒壁邊。
未來出世命先註，有的土公 佮莽夫，
人敢好額錢遐有啊，彼號𠢕人就共伊做軍師哩。
各項是人的命運，毋是講人𠢕錢才會賰啊，
彼號頇顢的毋煞免食睏，有人賰著規萬銀。
你若將遮的情理共伊比並，莫非這是命生成，
歹命看汝偌𠢕反，萬代袂當通超生。
世情是我看蓋現，先勸老輩後少年，
看人有錢免欣羨，人講恨命莫怨天。
天下的人講千萬，領憑出世在世間，
有人一款出世著毋免趁，有人一款度日就為難。
世間的人無當比，自恨出世落塗時，
歹命艱苦磨到死，富貴差𡢃佮用兒咿。
當今世界講袂盡，富貴由命不由人，
有人勸我我勸恁，咱欲來出世有領憑。
命中八字有輕重，飛天掛角 無彩工，
有的頇顢無半項，員外平平是咱人。
彼毋是才情伊有葩 ，命中八字有精差，
人若開化免人教，平平雙手一雙跤。
平平雙跤一雙手，富貴兩字難得求，
歹命人仔較長壽，人講前世做來今世收。
命中好歹免相諍，咱遮艱苦人有錢，
若求保平安無破病，食好食歹由在天咿。
好歹無地通比並，自恨閻君無公平，
艱苦富貴三不等，有人咧睏媽祖宮。
若甲註生娘娘註好好，攑刀仙削都袂無，
未曾註食先註餓，由在天地去發落。
莫非是人八字命，我勸朋友佮弟兄，
有人出世富戶囝，食老才落乞食營。
會做乞食命中 帶，榮華富貴天推排，
倒咧睏才共伊斟酌想看覓，著食甲老來才會知。
有人少年食未老，匪類作歹做過頭，
敢無家伙若重斗 ，抑若喝一聲欲了親像放水流。
咱就是食甲老來才會知影，我勸善咧予恁聽，
富貴艱苦自恨命，虎死留皮人留名。
註生婆姐無公平，代先註死才註生，
咱人尾溜看毋見，圓人會扁扁會圓。
牛咧欲快牽人僫料，你若無福氣趁錢居袂牢，
有通食用好了了，百般為著腹肚枵。
有的一款欲食毋振動，予伊終身一世人，
無大無細通向望，身苦病疼就攄無空。
人無千日的勇壯，人講花無百日紅，
骨力敢會去予人笑戇，欲食毋趁真不通。
勸恁大家著反變，勤趁無論小可仔錢，
袂當拄好若破病，才免去跔人跤腿邊。
勸恁大家著徹透，世間暫時來𨑨迌，
日子若到連鞭轉去，江山某囝半項無。
世情是我上看破，有當食用免傷磨，
富貴艱苦到死煞，平平仔過日敢有縒。
有的一款有錢毋甘用，有的一款猶未趁伊就欲用代先，有的就欲儉仔儉，儉到別人幹公景 ，你囉予伊有錢誠不明。
有錢毋用蓋無彩，無，想欲用上大呆，
有的儉食忍寒可憐代，儉予的囝孫快活開。
你共伊看世間一款大富戶，敢無好額家伙規千租，
出門衫褲密密補，予伊出世世間做錢奴。
親像這款真可惜，食佇咧無飽穿無燒，
有錢顛倒予人抾笑，儉食忍寒大毋著。
當今錢銀是好寶，錢若有，目地啥人敢看無，
有錢使鬼會挨磨，聽好買人拍𨑨迌。
在人心肝的計算，一款有錢較寒酸，
欺貧重富百百款，咧欲留一个名聲予人流傳。
世間人有的欺貧佮重富，無錢一字人上輸，
錦上添花人人有，雪中送炭世間無咧。
貧在路墘無人認，富在深山有遠親，
翁仔某爸仔囝這个錢要緊，若甲無錢目地人看輕喔。
淺淺理由來共伊論，爸囝有錢就會窮分，
欲死著留一寡仔破病本，免放傷濟予囝孫。
大家若有閒聽我講，較好勸善聽三冬，
爸母恩情是真重，伊來生咱咱生人。
爸母生囝世傳世，看破世情無幾个，
有囝人講有後裔 ，才免落人喙唇皮。
無囝的人免苦痛，目睭恁看真濟人，
好囝孤个就有望，抑若歹囝濟个無彩工。
人講好囝免用濟，歹囝濟个討連回 ，
經紀 頭路無愛做，枵來飽去咧遊街。
好囝確實免濟个，濟囝慢牛相挨推，
會做爸仔囝相欠債，會予爸母磨老皮。
爸母飼囝無論飯，望咧欲清醒頭毛長，
抑若生著歹囝若孵卵 ，祖家設佇咧大南門 。
勸恁大家著明朗，貪心兩字仙毋通，
政府掠著罪真重，著閣掠去監獄做犯人。
聽歌遮朋友著正道，奸雄兩字毋通學，
少年若是有做錯，改惡從善事就無。
在人心肝的志氣，山哩可改性難移，
有的家內赤甲死，不義錢財無愛挃。
一人一款的形象，天下的人有奸忠，
有的爸母都無量，彼號予伊若會好天不從。
有人一生盡忠義，富而無怨貧無欺，
甘願度苦過日子，彼號艱苦往有出頭時。
做人奸詐無路用，這世搶人後世還，
善惡若到頭就報應，遠佇千里近目前。
道德兩字為根本，爸仔囝無情絕五倫，
後擺老來若失運，快活食飯艱苦吞。
會做兄弟如手足，爸母親情是骨肉，
咱人著照序大約，日後才有好結局。
勸恁大家著做好，世間暫時來𨑨迌，
人講做惡有惡報，天理昭昭毋是無。
另外勸遮的老兄弟，若有三囝共五兒，
細漢應當著教示，長大成人由在伊。
有的一款序大人想無夠，囝兒亂來講伊𠢕，
飼大才予囝不孝，養育功勞放水流。
囝兒毋通傷溺愛 ，細漢予伊亂亂來，
後擺長成就知害，予囝不孝合應該。
會居 好囝好德行，捌 爸捌母自然生，
傷過束縛無路用，彼是前世冤孽明明明。
做人爸母著拍達 ，囝若無教上食力，
有人心神用一節，飼大漢予伊不孝蓋毋值。
唸這號歌勸恁好朋友，會做爸囝是冤仇，
好歹大家免窮究 ，一旦無常萬事休。
有爸有母著有孝，淫朋賭友毋通交，
有趁錢銀娶家後，通送爸母上山頭。
（完）

[@chukuao3952]

呂老師謝謝你 好歌

[@user-wx1iv4iw3c]

感恩！謝謝您！

[@user-je1qg8bg9y]

真懷念廟口駐唱的您

[@jenuehue]

前世做來今世收 .....好.......

[@user-kg9tg6fs6p]

，23