Mga dalit kay San Juan Evangelista

Mga dalit kay San Juan Evangelista ng siyudad ng Tanauan
TRANSCRIPT:
Yayang kami'y nanangan
sa iyong pamamagitan,
Tugon:
Sa oras ng kamatayan,
San Juan kami ay tulungan!
Sa pag-ibig mo kay Cristo,
iniwan mo balang layaw,
pagtawag niya sa iyo,
inari mo siyang Maestro:
siya'y tunay mong katoto,
na parating sinamahan.
Tugon
Ang pagliwanag ng mukha
ni Jesus na Poong Ama
ay doon mo nga nakita
sa Tabor na sinalunga:
dikit na walang kapara
ng mahal niyang katawan.
Tugon
Sa dibdib ni Jesucristo
naidling ka ngang totoo,
pagkahugas ng paa mo
nitong marunong na Maestro:
asal ni Judas na lilo
ay doon mo namalayan.
Tugon
Sa paghihirap ni Cristo
sa mahal na Pasion niya,
sinamahan mo nga siya
parang tunay na katoto:
namatay sa pagkapako,
sakop sa makasalanan.
Tugon
Si Jesus na nagdurusa
niyong sa Cruz nakaripa,
anak kang pinakilala
sa kaniyang bunying Ina:
kami nga kung sa kaniya
ay kapatid mo rin naman.
Tugon
Ang bankay ni Jesucristo
na iniwan mo sa hukay
lumabas muling nabuhay
niyong araw na ikatlo:
maliwanag pag sa araw
si Jesus nang iyong tingnan.
Tugon
Ang Anak ng Dios Ama
sa Langit bago umakyat,
sa iyo ay siyang nag-gawad
ng sari-saring biyaya:
balang tao ay nagtaka
sa iyong kapangyarihan.
Tugon
Ang Dios Espiritu Santo
pangako ng iyong maestro,
tinanggap mo ngang totoo:
siyang sa iyo ay nagpuno
ng lubos na karunungan.
Tugon
Katawan at kaluluwa
ng Virgen Santa Maria,
nariyan na nga sa gloria,
at diyan mo sinasamba:
hingin mong pakinggan niya
ang aming mga karaingan.
Tugon
Sa isang tapayang puno
ng langis na kumukulo
nababad ka ngang totoo,
at utos ni Domiciano:
katawan mo ay di naano
at hindi ka nahirapan.
Tugon
Ang Apocalipsing mahal
ay niyari mong sinulat
sa Patmos sa isang gubat,
oh Apostol na marangal:
ang lahat mong iniaral
ay puspos ng katunayan.
Tugon
Oh Martir(o Banal) na pinagpala,
Apostol, Virgen, Profeta,
na namatay sa pagsinta
kay Jesus Haring dakila:
lubos na ngayon sa gloria
ang iyong kaginhawaan.
Tugon
Sa mga lintik at sigwa
gutom, salot, pagbabaka,
kaming alipin mong mura
sa tulong mo umaasa:
sa tukso at dilang masama,
iyo kaming saklolohan.
Tugon
Kay Jesus ka manalangin,
Dios na lubhang maawain,
na kami ay patawarin
sa huling pagpanaw namin,
nang amin siyang purihin
sa ligayang walang hanggan.
Tugon
Idalangin mo tuwina,
ang Santo Papa sa Roma,
Obispos at mga Kura,
Sacerdotes na lahat na:
Oh bunying Evangelista
ampunin mo kami at tunghan.
Tugon
Yayang kami'y nanangan
sa iyong pamamagitan,
Tugon:
Sa oras ng kamatayan,
San Juan kami ay tulungan!
St. John the Evangelist Parish Tanauan FB Page - Audio/Pictures
Tanauan Historical Society FB group - Pre-war pictures
Tanauan City Information Office - Procession 2019
FOR private novena purposes

[@johncarlomalaluan9253]

Thanks God at mas malinaw na ang dalit