【星級斜槓族】Win Win楊安妮無悔拒入COLLAR 感恩可平衡藝人及跳舞老師兩個身分 報名《造星IV》時竟向193示愛？！

2018年起，ViuTV每年均會舉行《全民造星》系列大型選秀節目，一眾素人參賽者力爭出道機會，成為熱話。2021年舉行的《造星IV》，以培育新一代港產女團為目標，最後成功打造8人女團COLLAR，話題性十足；但在總決賽勇奪第5名的楊安妮（Win Win）卻毅然拒絕入團邀請，選擇獨立發展。對於這個大膽決定，Win Win未感後悔，反而感恩有不同的幕前工作機會，有更大自由度平衡藝人及跳舞老師的工作。而她當初報名參加《造星IV》，原來與ERROR成員193（郭嘉駿）有關？
嘗試不同類型工作
每一屆《造星》比賽都成功打造新星，如人氣男團MIRROR、ERROR、MC張天賦等，令香港再度捲起追星熱潮。作為首支《造星》出身的女團，COLLAR未出道已引起外界熱烈討論，無論是團員人選、人數、組合名稱等，每一部分都是焦點所在。面對着有可能「爆紅」的機會，Win Win卻選擇回絕，決意獨立發展，她表示︰「頭半年的確好忐忑，亦都有後悔，擔心自己係咪做錯決定；家人同朋友都有好多說話，問我點解唔加入，當時心情特別混亂。但依家一年後我再回想，我可以好有信心答你『無後悔』！」
雖然Win Win沒有加入COLLAR，但她仍然簽約ViuTV成為旗下藝人，出任不同綜藝節目的主持，包括《囝囝女女730》、《男女自然觀察學會》等，更獨立主持旅遊節目《日本winwin企画》，成為首個《造星IV》參賽者擁有個人主持節目，可見她備受公司重用。Win Win感恩道︰「好滿意依家嘅工作形態，自由度相對地高，最主要係我仲可以教跳舞，可以兼顧藝人同跳舞老師兩個身分；每一次我同班學生一齊跳舞、表演，都慶幸自己仲有教跳舞，嗰份舒服嘅感覺應該係我入咗女團之後得唔到。」
一度害怕學跳舞
說到Win Win，不得不提她的精湛舞藝，但她自言比較遲起步，12歲後才正式開始學跳舞，「12歲去一間studio報名，上去嘅時候啲人同我打招呼，但因為佢哋太熱情，加上當時覺得佢哋着衫好花巧，又染晒頭髮，所以我就驚咗，買咗四堂，但我一堂都無去。直至之後喺網上論壇見到有啲post『招跳舞朋友』，咁就識咗個女仔一齊去學，但佢跳咗兩個月就無再繼續，反而我學咗一堂就好沉迷，然後自己繼續學。」
及後，Win Win全職任舞蹈員及跳舞老師，但由興趣轉為職業並不容易。她表示︰「一開始係有studio搵我代堂，我覺得同一班學生跳舞好開心，見到佢哋將我排嘅舞跳得好好，就有『好想繼續教跳舞』嘅感受。之後去咗日本進修一年，可能因為喺香港教日本舞種嘅老師比較少，所以好感恩返嚟之後都可以繼續教班。」不過，Win Win坦言當時非常膽怯，擔心自己沒有資格做老師，「雖然我望落唔似無自信嘅人，但其實我成日都好緊張，因為大家聚焦喺我身上，我平時教跳舞時，30、40個學生望住我，有個好緊張、好驚嘅心理關口。」
被偶像193稱讚
既然害怕成為焦點，但為何會報名參加《造星IV》？Win Win笑謂︰「身邊嘅朋友都話要參加，咁有晚我好得閒，咪開部電腦填張申請表……我真係比較隨意，連CV都無交，嗰格我淨係寫咗『I love 193』，哈哈！」雖然心態輕鬆，看淡輸贏，但Win Win強調非常重視表演的質素，不會放棄「表演要認真」這個原則；這份認真亦讓Win Win的舞技大獲好評，同時獲導師許廷鏗賞識，最後更勇奪總決賽第五名，成績遠超她所想。
與偶像193成為了同事，早前《日本winwin企画》播映期間，193更在IG限時動態大讚Win Win的表現。此時，Win Win不禁大叫，並笑說︰「我嗰陣真係有尖叫，即刻截圖留念……依家講返起都有啲怕羞，唔知有無面紅呢？」不過，Win Win澄清兩人並不熟稔，僅有數次工作上的交流，但她已經大感開心。
興趣與現實並存
跳舞在香港不是賺大錢的工作，而且收入不穩，有不少人或會因而放棄或中途轉行，但Win Win認為兩者並沒有衝突，「鍾意一件事唔一定要將佢變成職業，如果真係有經濟壓力，可以去搵工，但同時都可以繼續愛跳舞㗎嘛！放工嚟跳舞放鬆吓，當佢係一件好純粹嘅事，喺跳舞呢一、兩個鐘投入去跳，千祈唔好因為跳舞而有壓力，咁樣就會本末倒置。」
策劃、記者：Crystal
攝影：Peter
剪接︰Ronnie
監製：Philess、Winsome