【星級斜槓族】Deep吳浩康為養家任地盤工人 消息衝出香港卻大呼諷刺 認為夢想與現實應並存︰「追夢唔需要捱肚餓！」

吳浩康（Deep）入行21年，早年不時被負面新面纏身，形象不太討好。不過，2023年可說是他的轉捩點，他不但正式告別前東家英皇娛樂，成為獨立歌手；更於去年3月成為新手爸爸，不時在網上分享與太太郭思琳和兒子撑撑的生活點滴，羨煞旁人。而當中最為人熱烈討論的，是Deep為了擔起養家的責任，開始加入建造業，同時身兼歌手、歌唱老師、建築工人等身分，實行斜槓族的生活。
Deep加入建造業的契機，是由於開關後令其教歌唱的生意大跌8成，他需要另覓出路「撐起頭家」。不過，建造業需要大量體力勞動，經常日曬雨淋，何不從事其他行業賺錢？Deep表示︰「人工同埋返工時間的確比較好，8點開工、5點收工，我夜晚就可以繼續教唱歌；就算唔教唱歌，我都可以早啲休息吖！如果做餐飲業好難捱，可以話差唔多『斷六親』，未必符合到我嘅生活狀況，畢竟我都想同個仔多啲相處。」
第一日返工最難捱？！
談到建造業的辛酸事，Deep憶述︰「我第一日返工係做羅湖站嘅污水處理倉，喺入面搭棚。你諗吓成個羅湖站嘅污水都集中晒喺嗰度，我第一日返工仲要係星期一，撞正啱啱開關之後星期六、日嘅人潮，可想而知有幾臭！（會否想立即辭職？）咁又唔會喎，我好少咁樣放棄，除非係合作方式唔啱先會唔做。」
Deep直言這是他最辛苦的工作經驗，幸好之後上班都沒有再遇到，「原來得嗰日係咁臭，之後係好正常。最辛苦都係熱囉，好多時做商場，入面好涼有冷氣，但其實天台好熱㗎！」
難以分配時間
工作崗位眾多，加上凡事親力親為，Deep認為分配時間實屬難事，他直言︰「其實成日都好攰，個個人打電話嚟都搞到我攰，啲人成日講極唔明，但呢個就係我嘅工作範圍，我唔可以話『搭架好煩，唔搭喇』，咁唔得㗎，你就係做搭架嘛！所以對我嚟講都係一個全新嘅學習同挑戰。」
家人成最大工作動力
Deep決意成為「職安真漢子」，最大的原因當然是家人，他表示︰「我唔想因為經濟差而令佢哋嘅生活要改到比而家節儉，其實本身都唔係好奢華，所以我都想維持返少少質素嘅生活，有少少嘅居住空間。有人問過我『養小朋友使唔使做15、16個鐘呀？』我唔係想串佢，但坦白講，睇你想畀個仔兒子過咩生活，睇你想畀個仔住咩樓，睇你想個仔有冇得揀。」
對網民稱讚受之有愧
不過，對於入行多年的Deep，成為建築工人才令他人氣急升，成功「洗底」，他直言十分諷刺︰「你諗吓，有邊個藝人會有泰國或者英文嘅新聞報導，劉德華當然有，但同我同等級嘅都比較少。再說，我花咗20年時間，希望將我嘅音樂帶到更遠嘅地方，但最後我可以衝出香港嘅消息，係關於我做多咗另一個行業，所以你說諷唔諷刺？」不過，Deep強調這是開心事，因為每一個職業都是他的發展，現在他希望在各方面都好好發展和延續下去。
被冠上「職安真漢子」、「好爸爸」的稱呼，加上得到粉絲和網民的大力支持，Deep心存感激，但受之有愧，「你話我係『好歌手』，某程度上我都夠膽認，起碼有個年資，但我只係新手爸爸，做工友都只係好短時間。多謝大家支持，從來冇咁多支持發生喺吳浩康呢個人身上，我會向住真漢子、好爸爸呢個方向再進修。」
要放下歌手光環並不容易，Deep卻認為追夢與現實需要並存︰「我依然會出歌，依然希望向住紅館進發，但你都要顧個現實，冇錢何來追夢？我覺得要嘉許向現實低頭嘅一群，起碼有諗過為現實而負責任。我幾討厭一啲唔顧現實去追夢嘅人，要兼顧自己嘅生活，先為生活負責任，再拎工餘的時間去做你想做嘅事，嗰個精神先漂亮！追夢嘅朋友熬眼瞓就好喇，係唔需要熬肚餓！」
最後，Deep亦鼓勵一眾Slasher，一起走這段「難熬」的路，「辛苦唔緊要，我都試過搞活動想有100人嚟，結果得10幾人，又試過好多唔同工作上嘅失敗，但唔緊要㗎！一齊捱過去啦！」
策劃、記者：Crystal
攝影、剪接：Mark
監製：Philess