De Baiona á Garda

Estrada da costa cara a Guarda. A brétema cubre o sol que loce tralas montañas. Roxe o mar con furia de xigante. Alá sobre os rochedos que gabean cara o monte está o Faro de Cabo Silleiro, lanceiro, sinalando o camiño, frecha que marca o rumbo. É un lugar aínda evocador.
Nos areais do Puntal observamos as pradeiras de honckenya peploides (arenaria ou herba da sal) que os de ANABAM plantaron e que custou uns 10 anos que volvera medrar. Case eran inexistentes no areal. Á beira no piñeiral de Camposancos observamos as eirugas de Thaumetopea herculeana, parecida a procesionaria, pero que medra en moletes de varias eirugas e non son daniñas, fillas da avelaíña do mesmo nome. Río arriba a auga está completamente calma, ignorando os bramidos do mar. Aquí descansan e se alimentan moitas aves migratorias.