45 SENA MILL-QTIL TA’ KARIN GRECH

ONE.COM.MT • Bħal llum 45 sena, Karin Grech, bint it-Tabib Edwin Grech inqatlet innoċentament permezz ta’ ittra bomba.
Dan l-avveniment jibqa’ mmarkat bħala ġurnata sewda fl-istorja ta’ pajjiżna anke fid-dawl tal-fatt li baqa’ ma ġiex solvut sal-ġurnata ta’ llum.
Il-Qorti Maltija kienet iddikjarat dan il-qtil bħala wieħed politiku.
KITBA: SAMUEL LUCAS
FILMAT: ARKIVJI
It-28 ta’ Diċembru tal-1977, 45 sena ilu, jibqa’ mmarkat bħala ġurnata sewda fl-istorja ta’ pajjiżna.
Karin Grech, tfajla ta’ ħmistax-il sena u bint it-Tabib Edwin Grech inqatlet innoċentament permezz ta’ ittra bomba. Każ li baqa’ ma ġiex solvut sal-ġurnata ta’ llum, bil-Qorti tiddikjarah bħala qtil politiku.
F’dan iż-żmien, f’pajjiżna kien għaddej l-istrajk tat-tobba, li l-Professur Edwin Grech ma mexiex miegħu u baqa’ jagħti servizz lill-pazjenti.
Fi żmien ta’ festi, fid-dar tiegħu, il-Professur Grech irċieva pakkett imgeżwer f’karta tar-rigali tal-Milied.
Hawnhekk kienet Karin li fetħet il-pakkett u ftit wara l-bomba li kien hemm splodiet.
It-tfajla ta’ ħmistax-il sena ttieħdet l-Isptar San Luqa, iżda sfortunatament mietet ftit wara.
Waqt li ngħatat l-aħħar tislima lil Karin, l-Arċisqof ta’ dak iż-żmien, Monsinjur Mikiel Gonzi ddeskriva dan il-qtil bħala l-ewwel attakk terroristiku f’Malta.
Dakinhar tal-qtil ta’ Karin Grech, it-Tabib Paul Chetcuti Caruana kien irċieva wkoll pakkett b’ittra bomba, iżda fortunatament din ma ħaditx.
L-Erbgħa filgħodu, il-Prim Ministru Robert Abela fakkar fil-memorja ta’ Karin Grech u tenna li ma hi ser tintesa qatt.

[@danielcamilleri16]

RIP . QATLUK U HADD GHADU MA GIE ARRESTAT. DARBA KIEN HEMM WIEHED LI QAL LI JAF MINN QATLEK.
U QATT MA RESQUH QUDDIEM IL GUZZDIZZJA.