Wolofal Serigne Mbaye Diakhaté - Aldiana/Firdawsi

Firdawsi rekk a nu saf, firdawsi rek a nu doy
Firdawsi rekkay alal, Firdawsi rekk a nu suur
Firdawsi kër la gu sedd ub xol ta boo ca demee
Ba teg ca bët xamni nguurub Yàlla daal a di nguur
Moo sedd guyu xolub koo mën di dégg aka gis
Moo dal xolub koo gis ak koo dégg, jii wax a ka wóor
Sa xol du tàng du bax foofe du war-ware it
Day neex akay nux-nuxee’kay sedd guy ni yuur
Barab ba day kelkelee’kay dàq lem gu nu jar
Sukar ta waajoo fa gis muy baax akay tane buur
Yaw doo fa rus doo fa ras, doo ñàkk doofa torox
Ta doofa dox ba dajee’kub dee’ku tiis aku toor
Koo gis dalay dox di ñee foofee ta doo kofa ñee
Njariñ yi wër la ni gàññ ak jàmm ngay bari muur
Sab xol dafay sax ci guyy ak gutt foofale faa
Nga tëdd ci’b lal bu sedd ub xol bu yaatu bu foor
Doo dégg u ay doo ko gis, loo bëgg teg ca sa bët
Faf teg ca sab loxo teg cib cant jàpp ko ɳoor
Doo wopp doo wonku doo bon doo dajee’ku naqar
Doo muslu, doo moslu, lii jar lépp, déggale góor !
Doo seeru lëf ndare mbég, doo dégg lëf ndare mbég
Doo jug ci mbég doo yëg it ab sedd doo yëg u buur
Doo gis lu jar xule nit foofee ta doo fa xuloo
Jàmm ak saxub jàmm ngay gis foofa ay dufa goor
Am Yàlla ak ngërëmam ak àjjaanam a nu suur
Nun ngalla Yàlla na nu am yii yépp am gu nu suur

[@bambawaarfall1398]

جزاك الله خيرا بارک الله فيك

[@khalilibrahim4998]

Yalla nan fa dém si barkéb cheikhoul khadim

[@moustaphambengue5187]

Amna solo lol machallah