Sëriñ bi ndab laa
ta lu tilim laa
ta kat sa ndab laa
raxas ma, duy ma
Raxase ma’y mbég
Ta duyema’y mbég
Feesalema’y mbég
Mën nga, defal ma
Defal ma bàrke
Ci sama kër gi
Ak nitu kër gi
Ta sakanal ma
Bu ma jis iy lor
Ku nekk saa kër
Bu mu jis iy lor
Tofal nu jàmm
Ku nekk saa kër
Tay wëye saa mbir
Dee ko fegal lor
Fàww aka sàmm
Barab bumay ne
Jàmm na fay ne
Xéewal na fay ne
Dëgg safal ma
Na sama kër tooy
Samab xol it tooy
Samay wax it nooy
…
Na sama jëf baax
Samay wax it baax
Samay mbir it baax
Nga rafetal ma
Aw yiw namay dal
Ngëram namay dal
Jàmm it namay dal
Ta bàrke dal ma
Def ma ku soppeef
Def ma ku tànneef
Def ma ku fonkeef
Fépp ta fal ma
Def ma kudul moy
Mukk, kudul xëy
Benne ba def ay
Dëgg gërëm ma
Jàpp ma tàbbal
Fàww ci sab xol
Ma ne ci sab xol
Saf la nga saf ma
Yëram ma fab ma
Yëkati teg ma
Ca kaw ta yor ma
Nag ta gënal ma
Naa dëkk man kaw
Bu ma tuxóo kaw
Di jëm fudul kaw
Mukk, musal ma
Ta may ma fàww it
Itte ju dul rot
Man itte juy rot
Fegal, mu moy ma
Itte bu dee rot
Boroomam it rot
Fegal ma ag rot
Man, te wayal ma
Ittee di ay laaf
Ta ku am iy laaf
Buy ñàkk ay laaf
Daanu, ne nemm
Yaw mii joxe’y laaf
Sarax ma ay laaf
Ta bu samam laaf
Rott, bumu damm
Ta mayma may naaw
Fàww akay gaaw
Ba jiitu kuy gaaw
Ta aw ca ngir ma
Naa jiitu kuy naaw
Jiitu ku daa naaw
Ak ku fasoo naaw
Lii lépp mayma
Naa yegg a yegg
ba dëgg a dëgg
ta bañ a jeng
fenn te temm
Woroomi kàggu
Ak seen i kàggu
Ak seen i dongo
Màngal bëmëx ma
Fan weeri daara
Ak fukki daara
Ak nit i daara
Tojal ma jox ma
Naa jàll jàlle
Di fal di folle
Di mos di mosle
Nu gëm ma weg ma
Ku mëna mànki
Man bu ma mànki
Luy taxa mànki
Loola fegal ma
Kuy sewle itte
Tay rotle itte
Na sama itte
Rëy, nga yoral ma
Man buma rotle
Waande ku rotle
Na nga ko forle
Ta far ko far ma
Yiw wuma rotle
Ak kuma rotle
Ak luma rotle
Fori ko, yët ma
Ta luma daa raw
Ci’g topp akuw yiw
Dabil ma tay yaw
Yoolam ba jox ma
Def ma ndabal yiw
Lu set a set yaw
Ta fees akiy yiw
Dell, bégal ma
Mën nga mënal ma
Xam nga xamal ma
Am nga amal ma
Doyal ma duy ma