Daily Devotion Day 29 MorningDevo 1 Corinto 13:2 ASND

1 Corinto 13:2 ASND
Kung may kakayahan man akong maghayag ng mensahe ng Dios, at may pang-unawa sa lahat ng lihim na katotohanan at lahat ng kaalaman, at kung mailipat ko man ang mga bundok sa laki ng aking pananampalataya, ngunit wala naman akong pag-ibig, wala akong kabuluhan.”
Morning Devotion:Walang Kabuluhan Kung Walang Pag-ibig
Pagpapalalim:
Sabi sa 1 Corinto 13:2, kahit gaano kalaki ang ating pananampalataya o kahit gaano karami ang ating nalalaman, kung wala tayong pag-ibig, wala itong halaga. Ipinapakita nito na ang pag-ibig ang siyang nagbibigay saysay sa lahat ng ating ginagawa. Maari tayong magtagumpay sa maraming bagay o makagawa ng mga kahanga-hangang gawain, pero kung wala tayong pag-ibig, ang lahat ng ito ay walang kabuluhan sa mata ng Diyos.
Ang pag-ibig ng Panginoong Jesus ang ating pinakamahalagang halimbawa. Nang Siya ay namatay sa krus, ginawa Niya ito dahil sa Kanyang wagas at walang kundisyong pagmamahal sa atin. Kaya bilang mga tagasunod Niya, tinatawag tayo na gawin ang lahat nang may pag-ibig maging malaki o maliit man ang ating gawain.
Kapag may pag-ibig, ang ating mga salita ay nagiging tapat at nakakapagbigay-inspirasyon, ang ating mga aksyon ay nagiging pagpapala, at ang ating pananampalataya ay nagiging totoo at makabuluhan.
Tanong sa Pagninilay:
Sa mga ginagawa mo ngayon, naipapakita mo ba ang pag-ibig ng Diyos sa iyong pamilya, kaibigan, o kapwa?