कोकणात करतात तशी अस्सल पारंपरिक कुळथाची पिठी करा, पावसाळ्यात जेवणाचा बेत जमेल झक्कास !
रोजच्या जेवणात वेगवेगळ्या प्रकारच्या डाळींचा समावेश असतो. असे असले तरीही काहीवेळा त्याच त्या डाळी खाऊन कंटाळा येतो, काहीतरी वेगळं खावंसं वाटत. अशावेळी, चपाती आणि भात या दोन्हींसोबत खाता येईल असा एक पदार्थ आपण बनवतो. डाळीशिवाय ताकाची कढी, सांबार, आमटी, टोमॅटोचे सार असे पदार्थ बनवले जातात, यासोबतच कुळथाची पिठी हा देखील त्यापैकीच एक पदार्थ. खरंतर कुळथाची पिठी अनेकांना आवडत नाही. काहींना तर त्याचा वासही नकोसा वाटतो. परंतु काहींना पिठी इतकी आवडते की, जेवणात चार घास जास्तच जातात(Malvani Kulith Pithi).
गरमागरम भात, चपाती, भाकरी सोबत कुळथाची पिठी खाण्याची मज्जा काही औरच असते. धो - धो कोसळणाऱ्या पावसात अशी गरमागरम पिठी ताटात समोर असली की याहून मोठं सुखः नाही. गरमागरम पिठी, भाकरी, भात सोबत कुरडई किंवा पापड असा झक्कास बेत होऊ शकतो. कुळथाला स्वतःची अशी एक छान चव असल्याने ती पटापट खाऊन फस्त केली जाते. कुळीथ पौष्टिक व आरोग्यासाठी चांगले असल्याने ते आहारात असणे फायदेशीर ठरते. घरातील लहानांपासून ते वृद्धांपर्यंत सगळ्यांनीच कुळीथ खाण्याचा सल्ला आहारतज्ज्ञ देतात.