Tanzania na Somalia zimesaini hati nne za makubaliano ya ushirikiano katika sekta za jumla, utalii, ulinzi na afya. Mkutano huo umefanyika jijini Mogadishu leo Desemba 19, 2024, chini ya uongozi wa Waziri wa Mambo ya Nje wa Tanzania, Balozi Mahmoud Thabit Kombo na Waziri wa Mambo ya Nje wa Somalia, Balozi Ahmed Moalim Fiqi.
Makubaliano haya yana lengo la kuimarisha ushirikiano wa kidiplomasia na uchumi na pia kuboresha huduma za afya na usafiri kati ya mataifa haya. Waziri Kombo amesisitiza kwamba Somalia itafaidika na huduma za afya, ikiwa ni pamoja na matibabu, dawa na mafunzo kwa wataalamu wa afya.
Vilevile, ameeleza umuhimu wa kuboresha miundombinu ya usafiri ili kuwezesha usafiri wa moja kwa moja kati ya Dar es Salaam na Mogadishu. Kwa upande wa Waziri Fiqi amesema kuwa ushirikiano huu utaleta fursa ya kutatua changamoto za amani na usalama katika ukanda wa Afrika Mashariki, hivyo kuharakisha maendeleo ya kijamii na kiuchumi.