උපද්‍රව වළකන රතන සූත්‍රය
බුදුරදුන් දේශිත “යානීධ භූතානි” ලෙසින් පිරිත් පොතේ සඳහන් රතන සූත්‍රය බලගතු ආරක්ෂක පිරිත් සූත්‍රයකි. දසදහසක් සක්වල පුරා ආඥා පැතිරෙන අයුරින් මේ පිරිත දේශනා ‍කර තිබේ. මේ පිරිතේ එක් එක් ගාථාව වෙන වෙනම ගත්විට කළ හැකි ශාන්තිකර්ම ද වෙයි. එය මෙසේ ය.
පළමු ගාථාව පිහිටකර ගැනීමේදී තමන් ඉතා පිරිසිදුව සුදුවතින් සැරසී පිළිමගෙයකදී බෝ පත්‍රයක් ගෙන ඊට මේ ගාථාවෙන් 108 වර මතුරා, ඉනේ තබාගෙන ගමන් ගියොත් ඒ ගමන සුබ සිද්ධි ඇතිකරයි.
රෝග බිය, යක්ෂ හෝ යම් අමනුෂ්‍ය බියක් ඇත්නම් කුල දෙවියන්ට, විළඳ හා කිරිබත් පුදා නොපෑගුණු ස්ථානයකින් වැලි ගෙන රතන සූත්‍රයේ සඳහන් දෙවැනි ගාථාවෙන් 108 වර පිරිත් කර නිවෙසට ඉසින්න.
ගමනේ දී බිමනේදී සිතට බිය ගෙන දෙන්නේනම් මෙහි තෙවන ගාථාවෙන් සඳුන් මතුරා ඉන බඳින්න. සර්පයෙකු දෂ්ඨ කළවිට එයින්ම තෙල් මතුරා ගෑමෙන් විස දුරුවනු ඇත.
නවග්‍රහ අපල දුරු කැර ගැනීමට සිව්වැනි ගාථාව පිහිට කර ගත හැක. සමන් මලකට එයින් මතුරා බෝ මැඬ පිළිම යෙකට පුදන්න. එයින් නවග්‍රහ අපල දුරු වෙයි. ගව ගාලට සමන් මල් මතුරා දැමීමෙන් ගවරෝග ඇති නොවේ.
පස්වැනි ගාථාව 108 වරක් මතුරා ගැනීමෙන් සතුරෝ දුරුවනු ඇත.
නිවෙසේ ආරක්ෂාව සඳහා සවැනි ගාථාව පිහිට කර ගත හැක. හාල් ගැරූ ස්ථානයෙන් ගල් කැට නවයක් ගෙන එක ගල් කැටයකට නව වරක් බැගින් මතුරා ගෙයි අට කොන වළ දමන්න.
කරදර බාධක ‍ඉවත් කර ගැනීමට හත්වැනි ගාථාව පිහිට කර ගන්න. සමන් මල් 108ක් ගෙන එම ප්‍රමාණයටම මතුරා බෝ රඳුන් වෙත හෝ වෙහෙරකට පුදන්න.
අමනුෂ්‍ය ‍බිය පහවන්නට මෙහි අටවැනි ගාථාවෙන් මීතෙලට මතුරා ඇඟ ගල්වන්න.
රන් ගෝරෝචන හෝ සඳුන් මෙම නව වැනි ගාථාවෙන් මතුරා චෛත්‍යයෙහි පඤ්ඤාංගුලි දානය සිදුකිරීමෙන් විපත් වළකා ගත හැක.
තම අභිමතාර්ථ සපුරා ගැනීම සඳහා බුදුරජාණන් වහන්සේ වෙනුවෙන් මල් පහන් පූජා කර කුල දෙවියන්ට ද පහන් තබන්න. දස වැනි ගාථාවෙන් බුලතට මතුරා මේ පින්කම සිදු කරන්න. පසුව ගමන් අරඹන්න. එවිට ජය ලැබෙනු ඇත.
එකොළොස් වැනි ගාථාවෙන් ධාන්‍ය (වී) පිරිත් කර වපුරන්නේ නම් සතුන්ගෙන් වන හානි වළකා ගත හැකි ය.
දොළොස් වැනි ගාථාවෙන් 108 වර පැන් මතුරා ප්‍රසූතිය පමාවන හෝ ප්‍රසූතිය නොවන අවස්ථාවේදී මවට බීමට දීමෙන් දරු ප්‍රසූතිය පහසු වෙයි.
පස්තෙල්, මෙම ගාථාවෙන් මතුරා පහන් දැල්වීමෙන් ආරක්ෂාව සැලසේ.
දහතුන් වැනි ගාථාවෙන් නූල් පිරිත් කර බැඳීමෙන් බෝවෙන රෝගවලින් ආරක්ෂාව සැලසේ. දින හතක් තැඹිලිවලට මතුරා බීමෙන් (දින හත තැඹිලි හතක්) මීමැස්මොරය සුව කර ගත හැකිවෙයි.
බෝග වර්ග ඉපියන් හා මැස්සන් වැනි උවදුරුවලින් ආරක්ෂා කර ගැනීමටත් ඵලදාව වැඩිකර ගැනීමටත් දාහත්වැනි ගාථාවෙන් පැන් මතුරා ඉසින්න.
මෙයට අමතරව තවත් බොහෝ අපල උපද්‍රව සඳහා රතනසූත්‍රය පිහිටකර ගත හැකි බව පුරාණ පිරිත්පොත් වහන්සේ පෙන්වා දෙති
සර්ව ආරක්ෂක රතනයන්ත්‍රය දහස්වර ජීවම් කර, කර පැළඳීමෙන් සියලු උපද්‍රව ග්‍රහ අපල වළකා ගත හැක. මෙම යන්ත්‍රය මෙහි සඳහන් නොකිරීමට තීරණය කළේ එය නිසි දැනුම ඇත්තෙකු ඇඳ පිළියෙල නොකළොත් අපල උපද්‍රව කැඳවීමක් වන නිසාය.
විශේෂයෙන් දරුවන් සියලු උපද්‍රවවලින් ආරක්ෂා කර ගැනීමට රතන සූත්‍රය පිහිට කර ගත හැක.
දුසිරිතෙන් වෙන්ව මස් පිළියෙන් ද ඉවත්ව බුදුරජාණන් වහන්සේ වෙත මල්, පහන් පුදා උදේ සවස රතනසූත්‍රය ගයන්නේ නම් නිවෙසටත් නිවැසියන්ටත් අපල උපද්‍රව උදා නොවනු ඇත. නිසි පිළිවෙතින් පිරිසුදුව සියලු සත්ත්වයාටත් තමන්ටත් මෙත් සිතින් කටයුතු කරන්නේ නම් මෙයින් නොමද පිහිට අත්විඳිය හැක.....