CARMEL PRERAN I ಜೋಬ್ ನಿರ್ದೋಶಿ ಆನಿ ಪ್ರಾಮಾಣಿಕ್ ಮನಿಸ್ ತೊ I Monday I 26th ORD Week I Job 1: 6-22

ಜೋಬ್ ೧: ೬-೨೨
ದೆವಾನ್ ದಿಲೆಂ, ದೆವಾನ್ ವ್ಹೆಲೆಂ, ತಾಚೆಂ ನಾಂವ್ ಸದೆಂವ್ ಜಾಂವ್!
ಎಕಾ ದಿಸಾ ದೆವಾಚೆ ಪೂತ್ ಸರ್ವೆಸ್ಪರಾ ಮುಕಾರ್ ಹಾಜಿರ್ ಜಾಂವ್ಕ್ ಆಯ್ಲೆ ತೆದ್ನಾ, ಸಯ್ತಾನ್‌ಯೀ ತಾಂಚೆಮದೆಂ ಆಸ್ಲೊ. ಸರ್ವೆಸ್ಪರಾನ್ ಸಯ್ತಾನಾಕ್ ಮ್ಹಳೆಂ: “ತುಂ ಖಂಯ್ ಥಾವ್ನ್ ಆಯ್ಲೊಯ್?” ಸಯ್ತಾನಾನ್ ಸರ್ವೆಸ್ಪರಾಕ್ ಜಾಪ್ ದೀವ್ನ್ ಮ್ಹಳೆಂ: “ಹಾಂವ್ ಸಂಸಾರಾಂತ್ ಭೊಂವಾಡೊ ಮಾರುನ್ ಆಯ್ಲೊಂ.” ಸರ್ವೆಸ್ಪರಾನ್ ತಾಕಾ ವಿಚಾರ‍್ಲೆಂ: “ತುವೆಂ ಮ್ಹಜ್ಯಾ ಸೆವಕಾ ಜೋಬಾಕ್ ಗುಮಾನ್ ದಿಲೆಂಯ್? ನಿರ್ದೋಶಿ ಆನಿ ಪ್ರಾಮಾಣಿಕ್ ಮನಿಸ್ ತೊ; ದೆವಾಕ್ ಭಿಯೆವ್ನ್ ತೊ ಚಲ್ತಾ ಆನಿ ವಾಯ್ಟಾಕ್ ಪಾಟ್ ಕರ‍್ತಾ; ಸಂಸಾರಾಂತ್ ತಾಚೆಸಾರ್ಕೊ ದುಸ್ರೊ ಕೊಣ್‌ಚ್ ನಾ.” ಸಯ್ತಾನಾನ್ ಸರ್ವೆಸ್ಪರಾಕ್ ಮ್ಹಳೆಂ: “ಜೋಬ್ ಭೆಶ್ಟೊಚ್ ದೆವಾಕ್ ಭಿಯೆವ್ನ್ ಚಲ್ತಾ? ತಾಚೆಭೊಂವ್ತಿಂ, ತಾಚ್ಯಾ ಘರ್‌ದಾರಾಭೊಂವ್ತಿಂ ಆನಿ ತಾಚ್ಯಾ ಸರ್ವಸ್ವಾಭೊಂವ್ತಿಂ ತುವೆಂ ಏಕ್ ವೋಂಯ್ ಘಾಲುನ್ ತಾಕಾ ರಕ್ಶಣ್ ದೀಂವ್ಕ್‌ನಾಂಯ್? ತಾಣೆಂ ಹಾತಿಂ ಘೆತ್‌ಲ್ಲ್ಯಾ ಸರ್ವ್ ಕಾಮಾಂಚೆರ್ ತುವೆಂ ಆಶೀರ್ವಾದ್ ಘಾಲಾಂಯ್ ಆನಿ ತಾಚೆ ಹಿಂಡ್ ಸಗ್ಳ್ಯಾ ಗಾಂವಾಂತ್ ಭರೊನ್ ಗೆಲ್ಯಾತ್. ಪುಣ್ ಆತಾಂ ತುಜೊ ಹಾತ್ ವಿಸ್ತಾರುನ್ ತಾಚೆಕಡೆ ಆಸಾ ತೆಂ ಸಗ್ಳೆಂ ಆಪುಡ್ ಆನಿ ತೊ ತುಜ್ಯಾ ತೊಂಡಾರ್ ತುಕಾ ಶಿರಾಪ್ ಘಾಲ್ತಾ ವಾ ನಾ ತೆಂ ಪಳೆ.” ಸರ್ವೆಸ್ಪರಾನ್ ಸಯ್ತಾನಾಕ್ ಮ್ಹಳೆಂ: “ತಾಚೆಕಡೆ ಆಸಾ ತೆಂ ಸಗ್ಳೆಂ ತುಜ್ಯಾ ಅಧೀನ್ ಆಸಾ; ಪುಣ್ ತಾಕಾ ಮಾತ್ರ್ ಹಾತ್ ಲಾಯ್ನಾಕಾ.” ಉಪ್ರಾಂತ್ ಸಯ್ತಾನ್ ಸರ್ವೆಸ್ಪರಾಮುಕ್ಲೊ ಗೆಲೊ. ಎಕಾ ದಿಸಾ ಜೋಬಾಚೆ ಪೂತ್ ಆನಿ ತಾಚ್ಯೊ ಧುವೊ ಆಪ್ಲ್ಯಾ ಮಾಲ್ಘಡ್ಯಾ ಭಾವಾಚ್ಯಾ ಘರಾ ಜೆವ್ತಾಲಿಂ ಆನಿ ದಾಕಾಂಸೊರೊ ಪಿಯೆತಾಲಿಂ ತೆದ್ನಾ, ಏಕ್ ದುತ್ ಜೋಬಾಶಿಂ ಆಯ್ಲೊ ಆನಿ ತಾಣೆಂ ಮ್ಹಳೆಂ: “ಬೊಯ್ಲಾಂಕ್ ಜೊತಾಕ್ ಬಾಂದ್‌ಲ್ಲೆಂ ಆನಿ ಗಾಡ್ವಾಂ ತಾಂಚ್ಯೆ ಬಗ್ಲೆಕ್ ಚರ‍್ತಾಲಿಂ; ತೆದ್ನಾ ಸಾಬೇಯ್ಯಾಂನಿ ತಾಂಚೆರ್ ದಾಢ್ ಘಾಲಿ ಆನಿ ತೆ ತಾಂಕಾಂ ವ್ಹರುನ್ ಗೆಲೆ. ತಾಣಿಂ ಸೆವಕಾಂಕ್ ತಲ್ವಾರಿನ್ ಜಿವ್ಶಿಂ ಮಾರ‍್ಲೆ ಆನಿ ಹಾಂವ್ ಎಕ್ಲೊಂ ಮಾತ್ರ್ ತುಕಾ ಹಿ ಖಬರ್ ದೀಂವ್ಕ್ ವಾಂಚೊನ್ ಉರ‍್ಲೊಂ.” ತೊ ಆನಿಕೀ ಉಲವ್ನ್ ಆಸ್ತಾಂ, ಆನ್ಯೆಕ್ಲೊ ಆಯ್ಲೊ ಆನಿ ತಾಣೆಂ ಮ್ಹಳೆಂ: “ಆಕಾಸಾಥಾವ್ನ್ ದೆವಾಚೊ ಉಜೊ ಸಕ್ಲಾ ಪಡ್ಲೊ ಆನಿ ತಾಣೆಂ ಬೊಕ್ರ್ಯಾಂಕ್ ಆನಿ ತಾಂಚ್ಯಾ ಗೊವ್ಳ್ಯಾಂಕ್ ಲಾಸೊನ್ ಉಡಯ್ಲೆಂ. ಹಾಂವ್ ಎಕ್ಲೊಂ ಮಾತ್ರ್ ತುಕಾ ಹಿ ಖಬರ್ ದೀಂವ್ಕ್ ವಾಂಚೊನ್ ಉರ‍್ಲೊಂ.” ತೊ ಆನಿಕೀ ಉಲವ್ನ್ ಆಸ್ತಾಂ ಆನ್ಯೆಕ್ಲೊ ಆಯ್ಲೊ ಆನಿ ತಾಣೆಂ ಮ್ಹಳೆಂ: “ಕಾಲ್ದೇಯಿ ತೀನ್ ದಳಾಂನಿ ಆಯ್ಲೆ ಆನಿ ತಾಣಿಂ ಕರಿಂ ಸ್ವಾಧೀನ್ ಕರುನ್ ವ್ಹೆಲಿಂ. ತಾಂಚ್ಯಾ ರಾಕ್ಣ್ಯಾಂಕ್ ತಾಣಿಂ ತಲ್ವಾರಿನ್ ಜಿವ್ಶಿಂ ಮಾರ‍್ಲೆ ಆನಿ ಹಾಂವ್ ಎಕ್ಲೊಂ ಮಾತ್ರ್ ತುಕಾ ಹಿ ಖಬರ್ ದೀಂವ್ಕ್ ವಾಂಚೊನ್ ಉರ‍್ಲೊಂ.” ತೊ ಆನಿಕೀ ಉಲವ್ನ್ ಆಸ್ತಾಂ, ಆನ್ಯೆಕ್ಲೊ ಆಯ್ಲೊ ಆನಿ ತಾಣೆಂ ಮ್ಹಳೆಂ: “ತುಜೆ ಪೂತ್ ಆನಿ ತುಜ್ಯೊ ಧುವೊ ಆಪ್ಲ್ಯಾ ಮಾಲ್ಘಡ್ಯಾ ಭಾವಾಚ್ಯಾ ಘರಾ ಜೆವ್ತಾಲಿಂ ಆನಿ ದಾಕಾಂಸೊರೊ ಪಿಯೆತಾಲಿಂ ತೆದ್ನಾ, ಅವ್ಚಿತ್ ಅರಣ್ಯಾಂತ್ಲೆಂ ಏಕ್ ವಾದಾಳ್ ಆಯ್ಲೆಂ ಆನಿ ತೆಂ ಘರಾಚ್ಯಾ ಚಾರ್‌ಯೀ ಕೊನ್ಶಾಂಚೆರ್ ಮಾರ‍್ಲೆಂ; ಘರ್ ತ್ಯಾ ತರ್ನಾಟ್ಯಾಂಚೆರ್ ಪಡ್ಲೆಂ ಆನಿ ತಿಂ ಮೆಲಿಂ; ಹಾಂವ್ ಎಕ್ಲೊಂ ಮಾತ್ರ್ ತುಕಾ ಹಿ ಖಬರ್ ದೀಂವ್ಕ್ ವಾಂಚೊನ್ ಉರ‍್ಲೊಂ.” ತೆದ್ನಾ ಜೋಬ್ ಉಟ್ಲೊ; ತಾಣೆಂ ಆಪ್ಲೊ ದಗ್ಲೊ ಪಿಂಜ್ಲೊ ಆನಿ ಆಪ್ಲೆ ಕೇಸ್ ತಾಸ್ಲೆ. ತೊ ಧರ‍್ಣಿರ್ ಸರ್ಪಡ್ಲೊ ಆನಿ ತಾಣೆಂ ಮ್ಹಳೆಂ: “ವಿಣ್ಗೊಂ ಹಾಂವ್ ಮ್ಹಜ್ಯೆ ಆವಯ್ಚ್ಯಾ ಗರ್ಬಾಂತ್ಲೊ ಭಾಯ್ರ್ ಸರ‍್ಲೊಂ, ವಿಣ್ಗೊಂ ಹಾಂವ್ ಪರ್ತುನ್ ವೆತೊಲೊಂ. ಸರ್ವೆಸ್ಪರಾನ್ ದಿಲೆಂ, ಸರ್ವೆಸ್ಪರಾನ್ ಕಾಡುನ್ ವ್ಹೆಲೆಂ; ಸರ್ವೆಸ್ಪರಾಚೆಂ ನಾಂವ್ ಸದೆಂವ್ ಜಾಂವ್.” ಹ್ಯಾ ಸಗ್ಳ್ಯಾ ವಿಘ್ನಾಂತ್ ಜೋಬಾನ್ ಪಾತಕ್ ಕರುಂಕ್ ನಾ ಆನಿ ತೊ ದೆವಾವಿರೋಧ್ ಕಸಲೆಂಚ್ ಅನುಚಿತ್ ಉಲಂವ್ಕ್ ನಾ.