Buxoro tumani XTB da “Korrupsiya taraqqiyotga tahdid” mavzusida davra suhbati bo'lib o'tdi

Jiddiy islohotlar davriga qadam qo‘ygan O‘zbekiston uchun korrupsiyaga qarshi kurash asosiy ahamiyatga ega vazifalardan biriga aylandi. Chunki korrupsiya nafaqat demokratiya, umuman har qanday taraqqiyotning kushandasi ekani ma’lum.
Bugun, 19-fevral kuni Buxoro tumani xalq ta’limi bo‘limida Jinoiy ishlar bo‘yicha Buxoro tumanI sudi va tuman adliya bo‘limi bilan hamkorlikda “Korrupsiya taraqqiyotga tahdid” mavzusida o‘tkazilgan davra suhbatida ham shu haqda gap bordi.
Tadbirda Jinoiy ishlar bo‘yicha Buxoro tumani sudi sudyasi F.Qahhorov, tuman adliya bo‘limi boshlig‘i U.To‘xtayev, tuman xalq ta’limi bo‘limi mudiri Sh.Sadullayev, bo‘lim xodimlari va maktab direktorlari ishtirok etishdi.
Tadbirda korrupsiya tushunchasi va uning jamiyat rivojiga keltirib chiqaradigan salbiy ta’sirlari, shuningdek, bu boradagi qabul qilingan qonun hujjatlari to‘g‘risida tushunchalar berildi.
Davra suhbati davomida korrupsiyaga nisbatan murosasizlik munosabatini shakllantirish, davlat va jamiyat hayotining barcha sohalarida korrupsiyaning oldini olish bo‘yicha chora-tadbirlarni amalga oshirish, bu boradagi jinoyatni keltirib chiqaruvchi sabab va sharoitlarni bartaraf etish, ushbu huquqbuzarliklarni sodir etganlik uchun javobgarlikning muqarrarligi tamoyilini ta’minlash masalalari yuzasidan fikr almashildi.
Buxoro tumani hokimligi axborot xizmati