Tamacahut: Agellid d yiḍulan-is (aẓawan yuder) قصة الملك و حماته (موسيقى منخفضة)

Agellid d yiḍulan-is.
Zik-nni yella yiwen n ugellid, d tullas kan i yesɛa. Yessi-s, deg sebɛa yid-sent s yixxamen-nsent. Netta, iḥulfa d lawan ad d-yaf win ara yuɣalen deg umkan-is. Yebda iferren gar yiḍulan-is anwa ara yerr d agellid. Yettnadi ad iẓer anwa deg-sen i yuklalen ad yuɣal deg umkan-is.
Yiwen wass, yessegrew-iten-id, yenna-asen: " Aql-i uḍneɣ aṭṭan diri-t; tura, ad awen-sutreɣ ad iyi-d-tawim ayen ara iyi-sejjin. Ɣef wakken ssneɣ, anagar tteffaḥ izegren i sebɛa n yillen i d asafar iwatan."
Kkren yirgazen-nni deg sebɛa yid-sen, ṭṭfen abrid ɣer tmurt urǧin ssinen. Kkes-d amek ur swakkren, ur ssawḍen ara ad d-afek amek ara zegren i yillen-nni. Yiwen gar yiḍulan n ugellid, yerza ɣer uftis n yilel, yettɛassa dinna. Yeggar tamawt i kra yellan.
Yiwet n tikkelt deg tafrara, yendekwal-d, yessaki-t-id ssut n yiferrawen. Yessakked, yufa d igider annect-ila-t. Yerza ɣer umɣar azemni:"A baba amɣar azemni, af-iyi-d amek ara zegreɣ, ẓriɣ tanafa rrif n lebḥer, yessaki-iyi-d s wafriwen-is yiwen n yigider annect-ila-t, ahat d tamatart i iyi-d-yuzen Bab n yigenwan, neɣ acu tenniḍ?"
Yerra-as-id umɣar-nni : " Ha-t-an ihi tfehmeḍ kullec. Zlu azger aberqac, kkes-d seg-s sebɛa n tecriḥin. Yal mi ara k-yezger yigider-nni, efk-as yiwet."
Yexdem akken i as-yenna umɣar-nni. Yuweḍ ɣer tama n yilel amezwaru, yettraǧu dinna armi iwala igider-nni. Yenna-as : " Ɛahed-iyi s Rebbi ar d iyi-tzegreḍ. Nekk seg tama-w ɛuhdeɣ-k ar d tawiḍ tunṭict". Yeqbel yigider-nni. Yerkeb gar wafriwen-is. Yal mi ara zegren yiwen n yilel ad as-yefk yiwet n tecriḥt. Akken, akken, armi d ilel wis sebɛa; iruḥ ad as-imekken tacriḥt dɣa teɣli-as. Amek ara yexdem? Yeṭṭef lmus yegzem-d tacriḥt seg tqesbuḍt-is. Akken i as-tt-yefka, yenna-as-id yigider-nni : " Emm... merriɣet. Limer mačči d lemɛahda n Rebbi ad ak-bruɣ gar tangiwin". Izger-it yuwi-d tteffaḥ-nni. Mi i d-yuweḍ, yufa-d islifen-nni-ines ttraǧunt-t, yenna-asen: " Ad awen-fkeɣ tteffaḥ ad t-tawim, maca ad awen-id-kkseɣ tifednin-nwen timecṭaḥ. Ma d nekk ur tedduɣ ara". Qeblen. Ruḥen d tazzla ɣer ugellid ad awin cciɛa. Yesnezgim ugellid d acu n yirem nniḍen s way-s ara d-yaf anwa iẓewren axaṭer ulamek ara ten-yerr d igelliden deg setta yid-sen. Ur din akka, ha-t-a yuweḍ-d uḍewwal-nni i d-yuwin tteffaḥ. Yenna-as i ugellid : " D nekk i d-yuwin tteffaḥ ay agellid". Islifen-nni-ines, nekren-t akk. Iwet ɣer uqrab-is, yejbed-d tifednin-nni. Yenna-as i ugellid : " Ini-asen tura ad ak-d-seknen tifednin timecṭaḥ". Yessuter deg-sen ugellid ad as-id-mlen akk iḍarren-nsen, dɣa widak tessebleɛ-iten lqaɛa. Yuɣal bu-tidet-nni d agellid. Usan wat-tmurt unzen-as.