BAXTIYOR OILA 40 - ERNING AYOLI OLDIDAGI BURCHLARI

#Baxtiyoroila #audiokitob #hazrat
Shayx Muhammad Sodiq Muhammad Yusuf hazratlarining «Baxtiyor oila» nomli kitobning audio diski.
BISMILLAHIR ROHMANIR ROHIYM
Odamni tuproqdan yaratgan va sokinlik topishi uchun undan o'z juftini yaratgan hamda ularning nikoh orqali oila qurib yashashlarini iroda qilgan Qodir va Hakiym Allohga U Zotning jaloliga yarasha hamdu sanolar bo'lsin!
«Nikoh mening sunnatimdir. Kim sunnatimdan yuz o'girsa, mendan emasdir», degan Rasuli Akram Muhammad Mustafoga bitmas-tuganmas salovotu salomlar bo'lsin! Ma'lumki, oila har bir jamiyatning boshlang'ich hujayrasi hisoblanadi.
Oila mustahkam, tinch, halol va pok bo'lsa, jamiyat ham osoyishta, mustahkam, farovon bo'ladi. Aksincha, oilalarda parokandalik, buzg'unchilik bo'lsa, halol-haromning farqi qolmasa, o'sha jamiyat buziladi, tinchi yo'qoladi, oxir-oqibat u chuqur tanazzulga yuz tutadi.
Shuning uchun ham qadimdan har bir jamiyat oila masalasiga katta e'tibor berib, oilalarning mustahkam va baxtiyor bo'lishi uchun imkonida bor bo'lgan barcha chora va tadbirlarni ko'rib kelgan. Zotan, sof insoniy tabiat xuddi shunday bo'lishini taqozo qiladi. Ammo ming afsuslar bo'lsinkim, keyingi paytlarda G'arbdagi ba'zi bir jamiyatlarda «hurriyat», «shaxs erkinligi» degan soxta shiorlarni ro'kach qilib olgan ayrim buzg'unchilar «Oilaning keragi yo'q, nikoh shart emas, u insonning erkini cheklab qo'yadi» degan da'voni ko'tarib chiqishdi. Yana ming afsuslar bo'lsinkim, bu safsataga ishonadiganlar ham chiqdilar va ko'payib bormoqdalar. Oxir oqibat hozirga kelib, ko'plab muammolar kelib chiqdi: insonning sof tabiatiga zid bo'lgan ushbu dunyoqarashga qul bo'lgan yurtlarda oilaning qadri qolmadi, oila a'zolarining o'zaro ehtiromlari, mehr muruvvatlariga futur yetdi. Erkak va ayollar o'z oilasida tinch-totuv yashashning o'rniga harom-xarish kayfu safoga berildilar. Nasl-nasab haqida qayg'urish ular uchun yot narsaga aylandi. Farzand orttirish, bola tarbiya qilish ularga yoqmay qoldi...
Ushbu va boshqa bir qancha mulohazalarni e'tiborga olib, oila va unga bog'liq dolzarb
masalalarni bayon etuvchi alohida kitob yozishni ma'qul ko'rdik. Alloh subhaanahu va taoloning O'zidan yordam so'ragan holimizda bu ishni boshladik. Yaxshi niyat bilan kitobni «Baxtiyor oila» deb nomladik. Bu ishni bizga Alloh taoloning O'zi oson va foydali qilsin!
© Shayx Muhammad Sodiq Muhammad Yusuf
Muallif: Shayx Muhammad Sodiq Muhammad Yusuf rahimahullohning
Nomi: "Baxtiyor oila"
Nashriyot: "Hilol-Studio"
Chop etilgan sana: 2012