Magtymguly Pyragy - Aşyk bolmuşam
ฝัง
- เผยแพร่เมื่อ 20 ส.ค. 2024
- Magtymguly Pyragy - Aşyk bolmuşam
Seslendirip okaýan
Türkmenistan at gazanan artisti
Batyr Çaryýew
AŞYK BOLMUŞAM
Eý, ýaranlar, bir ýüzi gül, Aýa aşyk bolmuşam,
Barçalar maksudy - gül ragnaýa aşyk bolmuşam,
Bilbilem, bag içre bir gowgaýa aşyk bolmuşam,
Özi ganyp, zülpleri ýeldaýa aşyk bolmuşam,
Menzilim dag içredir, sähraýa aşyk bolmuşam.
Çün pelek saldy meni ol gün pena topragyna,
Düşdi seýrim daýyma Mekke, Medine dagyna,
Bilbil oldum, saýradym, girdim Eremniň bagyna,
Paýy-bent oldum o gün gam ehliniň duzagyna,
Ýüz bela-mähnetli bir söwdaýa aşyk bolmuşam.
Könlüm içre ýar gamydyr, menzilim sährada, heý,
Puşeşim gam-gussadyr, men dönmüşem Perhada, heý,
Saldy yşkyn, Dilber-a, jan-u jigerim oda, heý,
Wadaryga, geçdi ömrüm zaýa, berdim bada, heý,
Ahy çoh, efgany çoh, bir köýe aşyk bolmuşam.
Bilmenem, ol ne bahrdyr, ne muazzem dagydyr,
Aldy köňlüm, gitdi aklym, ten mydam nä çagydyr,
Any nisbet etmek olmaz, gumry, bilbil, zagydyr,
Aý, garaz, her zülpüne ýetmiş mün är tussagydyr,
Kaddy-kamaty belent, zybaýa aşyk bolmuşam.
Dost, howaýy waslyňy men şunça çyndan isterem,
Damy-zülpüň kaýdyna özümni zyndan isterem,
Diýme: «Gamdan bir zaman köňlümni handan isterem»,
Bir garyp aşyk menem, ýar, Seni Senden isterem,
Gije-ýu gündiz, biliň, Huw-Haýa aşyk bolmuşam,
Wasly-ýarymdan digerge intizarym ýok menin,
Galmyşam haýran olup, gaýry mydarym ýok meniň,
Aldy janym yşkyň ody, ygtyýarym ýok meniň,
Gelse, aklym dagydar, gitse, kararym ýok meniň,
Gamzasy ok, gaşlary ol ýaýa aşyk bolmuşam.
Aýdadyr Magtymguly, men anda käne ugradym,
Seýr edip bardym pelege, lamekana ugradym,
Çün meni ryswa kylan yşky-ýegana ugradym,
Etmiş iki şähr içinde müň bir dükana ugradym,
Şunça sergerdan-senilu raýa1 aşyk bolmuşam.
1 Bu sözüň «zaýa» diýen nusgasy hem bar.