Daily Beowulf lines 1076-1124

Nalles hólinga Hóces dohtor
meotodsceaft bemearn syþðan morgen cóm
ðá héo under swegle geséon meahte
morþorbealo mága þaér hé aér maéste héold
worolde wynne wíg ealle fornam
Finnes þegnas nemne féaum ánum
þæt hé ne mehte on þaém meðelstede
wíg Hengeste wiht gefeohtan
né þá wéaláfe wíge forþringan
þéodnes ðegne ac hig him geþingo budon:
þæt híe him óðer flet eal gerýmdon
healle ond héahsetl þæt híe healfre geweald
wið eotena bearn ágan móston
ond æt feohgyftum Folcwaldan sunu
dógra gehwylce Dene weorþode
Hengestes héap hringum wenede
efne swá swíðe sincgestréonum
faéttan goldes swá hé Frésena cyn
on béorsele byldan wolde.
Ðá híe getruwedon on twá healfa
fæste frioðuwaére Fin Hengeste
elne unflitme áðum benemde
þæt hé þá wéaláfe weotena dóme
árum héolde þæt ðaér aénig mon
wordum né worcum waére ne braéce
né þurh inwitsearo aéfre gemaénden
ðéah híe hira béaggyfan banan folgedon
ðéodenléase, þá him swá geþearfod wæs
gyf þonne Frýsna hwylc frécnen spraéce
ðæs morþorhétes myndgiend waére
þonne hit sweordes ecg syððan scolde.
Ád wæs geæfned ond incge gold
áhæfen of horde Here-Scyldinga
betst beadorinca wæs on baél gearu
æt þaém áde wæs éþgesýne
swátfáh syrce swýn ealgylden
eofer írenheard æþeling manig
wundum áwyrded sume on wæle crungon
hét ðá Hildeburh æt Hnæfes áde
hire selfre sunu sweoloðe befæstan,
bánfatu bærnan ond on baél dóön
earme on eaxle ides gnornode
geómrode giddum gúðrinc ástáh
wand tó wolcnum wælfýra maést
hlynode for hláwe hafelan multon
bengeato burston ðonne blód ætspranc,
láðbite líces líg ealle forswealg,
gaésta gífrost, þára ðe þaér gúð fornam
béga folces wæs hira blaéd scacen.