𝐏𝐚𝐫𝐥𝐚𝐦𝐞𝐧𝐭𝐮 𝐍𝐚𝐬𝐢𝐨𝐧𝐚́𝐥 𝐀𝐩𝐫𝐨𝐯𝐚 𝐃𝐨𝐭𝐚𝐬𝐚𝐮𝐧 𝐎𝐉𝐄 𝟐𝟎𝟐𝟓 𝐛𝐚 𝐌𝐍𝐄𝐊 𝐢𝐡𝐚 𝐄𝐬𝐩𝐞𝐬𝐢𝐚𝐥𝐢𝐝𝐚𝐝𝐞.

𝐃𝐢𝐥𝐢, 𝟏𝟒 𝐍𝐨𝐯𝐞𝐦𝐛𝐫𝐮 𝟐𝟎𝟐𝟒 ||
Parlamentu Nasionál aprova kinta-feira ne’e, dotasaun Orsamentu Jerál Estadu (OJE) tinan fiskál 2025 ne’ebé aloka ba Ministériu Negósius Estranjeirus no Kooperasaun (MNEK) iha faze espesialiadade. Rezultadu votasaun ho votus afavór 43 Kontra 20 no Abstesaun 1.
Durante diskusaun, Deputadu bankada FRETILIN aprezenta proposta ne’ebé husu atu elimina orsamentu milliaun $ 1 hosi dotasaun inisiál $ 5.854.66 ne’ebé atu finansia programa funsionamentu no dezenvolvimentu institusionál, inklui rekrutamentu ba funsionáriu MNEK foun hamutuk na’in 55 iha tinan 2025. Maibé, proposta refere la konsege hetan aprovasaun, tanba vota kontra hosi deputadu bankada Governu iha Parlamentu Nasionál.
Ministru Negósius Estranjeirus no Kooperasaun, Bendito Freitas klarifika, orsamentu ne’ebé tau atu halo rekrutamentu ba funsionáriu foun MNEK nian iha tinan 2025 importante tebes, tanba oras dadauk, funsionáriu no diplomata karreira barak mak idade tama ona ba reforma, tanba ne’e presiza duni halo substituisaun, nune’e bele iha kuádru diplomata ne’ebé kompetente atu reprezenta estadu Timor-Leste iha mundu.
Xefe Dilomata ne’e esplika, Polítika MNEK nian mak atu kontinua konsolida instituisaun ne’ebé forte, nune’e bele ezerse knar ida di’ak liután, liu-liu promove polítika externa no diplomasia Timor-Leste nian ba mundu.
Entratantu, Orsamentu Jerál Estadu 2025 ne’ebé aloka ba Ministériu Negósiu Estranjeiru no Kooperasaun ho montante $ 32.109.497. Hosi orsamentu refere fahe ba kategória Saláriu no Vensimentu ho montante $16.926.324, Bens no Servisu ho montante $14.383.173, Transferénsia Públika zero, kapitál menor ho montante $300.000 no Kapitál Dezenvolvimentu ho montante $500.000.