Ерлі-зайыпты мұнарадан секіріп өлді

Қурайлы ауылында ерлі-зайыптылар мұнарадан секіріп кетті. Оқиға кеше кешкілік болған. Тәртіп сақшылары, құтқарушылар мен жедел жәрдем қызметінің өкілдері екі сағат келіссөз жүргізгенімен оларды аман алып қала алмады. Екеуі де оқиға орнында мерт болды. Владимир Шустер мен Әсел Дүйсенбаева 9 айдан бері азаматтық некеде болған. 38 жастағы Владимирдің 7 жасар Кристина есімді қызы бар. Ал, Әсел өгей анасы. Қызды әкесі мен өгей шешесі өлімші етіп сабаған. Бірнеше күннен бері сыртқа шықпай қалған қызды 13 мамырда алғаш болып көршілері іздей бастапты. Кейін учаскелік инспекторға арызданған. Тәртіп сақшылары мән-жайды анықтауға келгенде үйдегілер оларды ішке кіргізбеген. Кейін баспананы тінту барысында учаскелік полицей баланы шкафтың ішінен тапқан. Осы іс бойынша Қылмыстық кодекстің «Кәмелетке толмаған адамды тәрбиелеу жөнiндегi мiндеттердi орындамау» бабы бойынша қылмыстық іс қозғалды. Құқық қорғаушылар ерлі-зайыптыдан жауап алып, үйіне жіберген. Ал олар ауыл шетіндегі мұнараға шығып, құлап өлетіндерін айтқан. Ауыл тұрғындары сақшыларға хабарлап, оқиға орнына құқық қорғаушылар, жергілікті атқарушы орган өкілдері мен жедел жәрдем қызметі жеткен. Екі сағат келіссөз жүргізілген. Алайда, нәтиже болмады. Ата-анасынан таяқ жеген қыз қазір облыстық балалар ауруханасының нейрохирургия бөлімінде жатыр. Үсті-басы көгеріп, миы шайқалған. Көршілері оқиғаның шиеленісіп кетуін әлеуметтік желіге жарияланған ақпараттардан көреді. Оған қоса, келіссөздер жүріп жатқанда "құтқарушылар неге әрекетсіздік танытқан" дейді. Қайғылы оқиғаға қатысты сан түрлі сауал бар. Ал, қазір оқиға бойынша Қылмыстық кодекстің «Өзін-өзі өлтіруге дейін жеткізу» бабы бойынша қылмыстық іс қозғалды. Сараптама тағайындалып, оқиғаның мән-жайы анықталып жатыр.