نياف تركي / إهداء إلى الشيخ : تراحيب بن ذويب ابن جبرين / كلمات : صايل عبدالهادي

@adv143 مونتاج نياف تركي
إهداء إلى الشيخ : تراحيب بن ذويب ابن جبرين / كلمات : صايل عبدالهادي / اداء : نياف تركي
الله على اللي ما شريته لذلحين
والظاهر اني عاد ماني بشاريه
لو أتكلف واتحمل من الدين
ماني بحوله كود ربي يهييه
شاص اليا اقبل مثل راس اصفرٍ زين
مشاركٍ به فالمزايين راعية
ولقفى مثل ذيبٍ رثع فآهل الضين
وصكوا به اهل الضين والجوع حاديه
حدوه عن مزبان روس الضلاعين
وحطوا عليه مع الحزوم اللهاليه
والليا اعترض يضيع فيه النظر بين
صدامة وبديه وشكله وباقية
رسمة شطرطونه مثل نقشه يدين
اريام في مسرح هلا يوم احليه
وغمارته كنها كراسي سلاطين
حتى الابو يمكن عن ابنه يعييه
ومكيفاته من يسار ومن يمين
كن السويدا هابتٍ مع مثانية
تقول كنك في سويتات برلين
سبحان من بصر خبير مسويه
ملكيته تسعد قلوب المحازين
يستاهله والله عودٍ يحاضيه
من الوكالة جايبه قبل شهرين
وفالبايكة ما قط بيّح خوافيه
الين جاه بناخيٍ له حمر عين
نخيته وعوّد على العود ينخيه
يقول تكفى الشاص مهوب بعدين
بادٍ عليه لازم الحين وآبيه
ولا فك مفتاحة بيد الولد لين
حلف له برب السماء أني لـ اداريه
ويوم ألقطه ذيبان بين الصلاتين
نسى وصية عوده اللي موصيه
عباه من بنزين خمسة وتسعين
وقامت تمرجح طارته بين أياديه
واوما علاه الين عداه ميتين
كنه يصاقط ظله اللي يباريه
ويوم المساجد خليت من المصلين
عقب العشاء والليل حكّم دواجيه
وهو قالط به عند طلق الحجاجين
شيخٍ يبشر بالمسره من يجيه
عمار يالعمار باسم ابن جبرين
أبن ذويب اللي تدرّس مباديه
الباب ما سكر ولا قاله مين
قبل يشوفه بالبشاشة ملاقيه
قال السلام وقاله اهلًا وسهلين
يامرحبا بالضيف والله يحييه
اقلط هنيا في صدور الدواوين
وموترك طفّه قال ماني مطفيه
صايل يبلغك التحايا ملايين
ويقول في طرقه ومعنى قوافيه
اللاش نستخسر مديحة ببيتين
ولا الكفو يمدح على طيب طاريه
وطاري زبون الجود والعرف والدين
شعى القصيدة لين وجهتها اليه
ومكارم الجبرين مثل الودادين
اللي تغيث البيد والقاع تحييه
شيخ كرم يمناه ملّا المراحين
يكرم ولا ينشد عن البنك كم فيه
جاهيته تطلق سراح المساجين
ملاذ من صكت عليه المشارية
شيخ من مطير الزحول الدنادين
من طيب حظه ما سفه صوت داعيه
كتبت عن مجده ثلاث وثلاثين
وفي ذمتي ماهيب مني تكفيه
حنّيت منها اهل العطايا الصغيرين
ونصيتها اللي ما بعد خاب ناصيه