មេរៀន៖ ហេតុអ្វីព្រះជាម្ចាស់បង្គាប់ឲ្យហោរា ហូសេ រៀបការជាមួយស្រីសំផឹង? (ហូសេ ១:៣)
ฝัง
- เผยแพร่เมื่อ 27 ก.ย. 2024
- មេរៀន៖ ហេតុអ្វីព្រះជាម្ចាស់បង្គាប់ឲ្យហោរា ហូសេ រៀបការជាមួយស្រីសំផឹង? (ហូសេ ១:៣)
----------------------------------------------------------
ប្រពន្ធមិនស្មោះត្រង់
ព្រះយេហូវ៉ាបានបង្គាប់ឲ្យហោរា ហូសេ រៀបការជាមួយ «ស្រីសំផឹង [zenunim]» (១:២)។ ពាក្យនេះនៅក្នុងភាសាហេព្រើរចង្អុលបង្ហាញពីអាកប្បកិរិយាផ្លូវភេទខុសច្បាប់។ លោក ម៉ូសេ បានប្រើពាក្យនេះនៅក្នុងកណ្ឌគម្ពីរ លោកុប្បត្ដិ ៣៨:២៤ សំដៅទៅលើកន្លែងដែលស្រីពេស្យាចារនាង តាម៉ារ បានធ្វើសំផឹង ដើម្បីល្បួងលោក យូដា។ នាង កូមើរ ដែលជាប្រពន្ធរបស់ហោរា ហូសេ ក៏បានជាប់ឈ្មោះបែបនោះ។ នេះមិនមែនមកពីនាងគឺជាស្រីសំផឹងនោះទេ តែនេះព្រោះនាងជា (ឬក៏នឹងក្លាយទៅជា) ស្ត្រីដែលគេស្គាល់ថាអ្នកផិតក្បត់ខាងផ្លូវភេទ។
ព្រះគម្ពីរកែសម្រួលបានបកប្រែឃ្លាចុងក្រោយនៃកណ្ឌគម្ពីរ ហូសេ ១:២ ថា «ដ្បិតស្រុកនេះចេះតែប្រព្រឹត្តអំពើពេស្យាចារ ដោយបោះបង់ចោលព្រះយេហូវ៉ា»។ វចនានុក្រមភាសាហេព្រើរអានដោយឆ្គាំឆ្គងថា « ដ្បិតស្រុកនេះប្រព្រឹត្តិអំពើផិតក្បត់យ៉ាងធំសម្បើមពីមុខពីក្រោយព្រះអម្ចាស់»។ នេះគឺជាការលើកឡើងដំបូងនៅក្នុងកណ្ឌគម្ពីរហូសេ ដែលព្រះជាម្ចាស់បានដាក់អង្គទ្រង់ជំនួសអ្នកដែលស្រឡាញ់មនុស្សដែលគេបោះបង់ (សូមអានបន្ថែមនៅជំពូក ២:២-៥, ជាពិសេស ខ.៥) ហោរា ហូសេ ធ្វើតាមការបង្គាប់របស់ព្រះយេហូវ៉ា ដោយរៀបការជាមួយនាង កូមើរ ហើយនាងក៏បានបង្កើតកូនប្រុសម្នាក់ឲ្យគាត់ (១:៣)។
នៅក្នុងផ្នែកនៃការបរិយាយអំពីជីវប្រវត្តិរបស់អ្នកនិពន្ធនៅជំពូក ៣:១-៥ ហោរា ហូសេ បានប្រាប់យើងអំពីសាច់រឿងរបស់គាត់ ដូចជាការបញ្ជាក់ជាថ្មីម្ដងទៀតដោយប្រាប់យើងថា ព្រះជាម្ចាស់បានត្រាស់ហៅឲ្យគាត់ធ្វើជាតំណាងរបស់ទ្រង់។ ប៉ុន្តែ ចុះស្ត្រីដែលគាត់ត្រូវយកធ្វើជាប្រពន្ធវិញនោះ ជានាង កូមើរ មែនឬ? ខគម្ពីរមិនបានលើកឡើងអំពីនាងឲ្យបានច្បាស់លាស់ណាស់ណានោះទេ។ នាងគឺជាស្រីកំផិត ហើយ «ជាស្រីដែលមានអ្នកដទៃស្រឡាញ់» នាង (ខ.១) ។ ប៉ុន្តែ វាពិតជាពិបាកយល់ណាស់ ប្រសិនបើស្ត្រីម្នាក់នោះមិនមែនជានាង កូមើរ។ ចំណុចសំខាន់នោះគឺហាក់ចង់បង្ហាញអំពីការដែលស្វាមីដ៏ចម្លែករបស់នាងបានស្វែងរកនាង ធ្វើគ្រប់អ្វីៗដែលចាំបាច់ ដើម្បីរំដោះនាងពីបុរសផ្សេងទៀត ហើយនាំនាងត្រឡប់មកផ្ទះវិញ មិនថាគាត់ត្រូវបង់ថ្លៃអស់ប៉ុន្មានក្ដី (សាច់ប្រាក់ និងស្រូវឱក ខ.២)។ នេះជាការឆ្លុះបញ្ចាំងឲ្យឃើញនូវសេចក្ដីស្រឡាញ់ដ៏មហិមារបស់ព្រះជាម្ចាស់ចំពោះសាសន៍អ៊ីស្រាអែល។ នាងខ្វះជំនឿ ហើយក៏ក្បត់ស្វាមី (ព្រះជាម្ចាស់) តាមរយៈការថ្វាយបង្គំព្រះដទៃទៀត។ នំទំពាំងបាយជូរ (ខ.១)-ដែលបានលើកឡើងទន្ទឹមជាមួយនឹង «ព្រះដទៃ)-ជាក់ស្ដែង វាជារបស់មួយពីសាសនាក្លែងក្លាយ ហើយការលើកឡើងនៅត្រង់នេះក៏ភ្ជាប់មកជាមួយការបង្ហាញឲ្យឃើញពីភាពគ្មានសេចក្ដីស្មោះត្រង់របស់អ៊ីស្រាអែល។ នាងស្រឡាញ់ការកំផិតរបស់នាង។
សេចក្ដីសន្យានៃភាពស្មោះត្រង់
មិនយូរប៉ុន្មាន ក្រោយពីពេលដែលហោរា ហូសេ បានទាយ នោះសាសន៍អ៊ីស្រាអែលក៏ត្រូវបានបំផ្លិចបំផ្លាញយ៉ាងខ្ទេចខ្ទី និងត្រូវបានគេនាំយកទៅស្រុកអាសស៊ើរ (២ពង្សាវតារក្សត្រ ១៨:៩-១២)។ ប៉ុន្តែ នេះនៅមិនទាន់ចប់សម្រាប់ប្រជារាស្ត្ររបស់ព្រះជាម្ចាស់នៅលើទឹកដីរបស់ខ្លួននោះទេ ដោយសារពួកគេនឹងត្រឡប់មកវិញដូចព្រះបន្ទូលបានសន្យា (ហូសេ ៣:៥) ត្រូវបានបំពេញនៅពេលយូដាដែលជាជននិរទេសបានត្រឡប់មកពីភាពជាទាសករនៅទីក្រុងបាប៊ីឡូនវិញ «ហើយស្វែងរកព្រះយេហូវ៉ា ជាព្រះរបស់គេ ហើយដាវីឌ ជាស្ដេចរបស់គេ…ហើយនឹងចូលមករកព្រះយេហូវ៉ាទាំងញាប់ញ័រ»។ ពាក្យ «ញាប់ញ័រ» ជាធម្មតាសំដៅទៅលើភាពភ័យស្លន់ស្លោ ឬភាពភិតភ័យជាខ្លាំង៖ អ៊ីស្រាអែលអាចនឹងរៀនបានថា ការដោះស្រាយរបស់ព្រះអម្ចាស់ជាមួយនឹងអំពើបាបពិតជាតឹងរឹងណាស់។ ពិតណាស់ ព្រះបន្ទូលទំនាយនេះមិនមែនសំដៅចំពោះស្ដេច ដាវីឌ ផ្ទាល់នោះទេ។ ជំនួសនោះវិញ ទំនាយនេះសម្លឹងទៅកាន់សេចក្ដីសង្ឃឹមសម្រាប់មហាក្សត្រដ៏សុចរិតដែលនឹងគ្រងលើបល្ល័ង្កនៅក្រុងយេរូសាឡឹម គឺនៅលើបល្ល័ង្ករបស់ស្ដេច ដាវីឌ ។ អស់អ្នកដែលនៅឆ្ងាយពីព្រះយេហូវ៉ា និងពីស្ដេចរបស់ទ្រង់នឹងស្វែងរកពួកគេ ហើយពួកគេនឹងរកបានសេចក្ដីសុខសាន្ត និងស្តាទំនាក់ទំនងឡើងវិញជាមួយព្រះជាមិនខាន។
ព្រះយេហូវ៉ាបានបង្គាប់ឲ្យហោរា ហូសេ រៀបការជាមួយ «ស្រីសំផឹង [zenunim]» (១:២)។ ពាក្យនេះនៅក្នុងភាសាហេព្រើរចង្អុលបង្ហាញពីអាកប្បកិរិយាផ្លូវភេទខុសច្បាប់។ លោក ម៉ូសេ បានប្រើពាក្យនេះនៅក្នុងកណ្ឌគម្ពីរ លោកុប្បត្ដិ ៣៨:២៤…
និពន្ធដោយ៖ George M. Schwab Sr.
បកប្រែដោយ៖ លោក ស៊ូ ទិត្យ
កែសម្រួលដោយ៖ លោក ខែម បូឡុង, លោក ទេព រ៉ូ, លោក ឯក សត្យា, លោក ហុង សម្ភស, លោក សឹម រក្សា និងលោក ង៉ែត វិទូ
ដកស្រង់ខ្លះៗ និងកែសម្រួលចេញពី www.crossway.o... ដោយមានការអនុញ្ញាត។ Plovpit.com
Amen