2020-2021 оқу жылында Абай мектептерімен жасалынған жұмыстардың есебі

Мемлекет басшысы Қ.К.Тоқаевтың «Семей тезистерінде» айтқан гуманитарлық бағыттағы «Абай мектептерін» ашу туралы тапсырмасына сәйкес 12 облыс, 3 қаладан мамандандырылған Абай мектептері желісі ашылды (Ақтөбе, Қостанай облыстарында желілік «Абай мектептерін» ашу бойынша жұмыстар жүргізілуде). Осы мектептердің орталық базасы ретінде Абай атындағы Республикалық мамандандырылған дарынды балаларға арналған қазақ тілі мен әдебиетін тереңдете оқытатын орта мектеп-интернаты тарапынан оқу-әдістемелік кешен даярлау, тәжірибе тарату жұмыстары жүзеге асырылуда.
«Қазақ тілі», «Қазақ әдебиеті», «Абайтану» пәндері Қазақстан Республикасы Білім және ғылым министрінің 2020 жылғы «27» қарашадағы №496 бұйрығына 7-қосымша негізінде «Негізгі және жалпы орта білім беру деңгейінің қазақ тілі мен әдебиетін тереңдете оқытатын гуманитарлық бағыттағы мамандандырылған Абай мектептері желісінің 5-11-сыныптарына арналған «Қазақ тілі», «Қазақ әдебиеті», «Абайтану» пәндерінен жаңартылған мазмұндағы үлгілік оқу бағдарламасы» бойынша оқытылады.
Абай мектептері желісінің оқушылары қазақ тілін жетік білумен қатар, әдеби сөйлеп, сауатты жазып, шешендік қырын, ақындық, журналистік қырларын да танытуы тиіс. Осыған орай «Қазақ тілі» пәні 8-11 сыныптарда аптасына 4 сағат, «Қазақ әдебиеті» пәні 8,9 сыныптарда аптасына 5 сағат, 10-11 сыныптарда аптасына 6 сағат «Абайтану» пәні 8-11 сыныптар аралығында 2 сағаттан оқытылады. Оқушылардың гуманитарлық, лингвистикалық білімдерін толықтырып, тереңдете түсу мақсатында танымдық-теориялық бағыттағы («Сөз мәдениеті», «Мәтін талдау», «Медиасауаттылық», «Журналистика негіздері», «Әдебиеттануға кіріспе», «Ұлы дала даналығы», «Когнитивті лингвистика», «Академиялық жазылым», «Әлем әдебиеті») тарих және дипломатия бағытындағы («Мәдени мұра» курсы, «Әлемдік мәдениет», «Дипломатия негіздері»), шығармашылық бағыттағы («Шешендік сөз өнері», «Айтыс өнері», «Поэзия әлемі», «Домбыра», «Дебат», «Вокал», «Сәндік қолданбалы өнер») бейіндік пәндер вариативтік компонентегі таңдау бойынша пәндер есебінен жүргізіледі.