tibetan poem recitation
ฝัง
- เผยแพร่เมื่อ 27 ส.ค. 2024
- རྐང་ལམ་ཕྲ་མོ།
ངའི་བསམ་པའི་བརྩེ་དུངས་ཀྱི་རྩིག་ལྡེབས་ངོས་སུ་ལྷམ་མེར་བཀྲ་བའི་དྲན་འཛིན་གྱི་རི་མོ་སྟེ་ལོ་ཟླའི་རླུང་འཚུབ་ཀྱིས་བསུབ་མི་ཐུབ་ཅིང་དུས་ཀྱི་ཆར་ཆུ་ཡིས་འཇིག་མི་ནུས་པ་ནི་ང་ཚོའི་སྡེ་འདབས་ཀྱི་རྐང་ལམ་ཕྲ་མོ་དེ་རེད། རྒྱུ་མཚན་ནི། རྐང་ལམ་ཕྲ་མོ་དེ་ནི་ངའི་ཕ་ཡུལ་གྱི་རྒྱུ་ལམ་ཉག་ཅིག་ཡིན་ལ། དུས་རབས་ཅི་འདྲ་མང་པོའི་རིང་ལ་མི་རབས་ནས་མི་རབས་བར་དུ་ལོ་རྒྱུས་ཀྱི་ཞབས་རྗེས་བགྲང་ལས་འདས་པ་ཞིག་ལམ་ཕྲན་འདིའི་སྟེང་དུ་བཞག་ཡོད་པ་དང༌། དཀའ་ཚེགས་ཆེ་ཞིང་རྩོལ་བ་བསྐྱེད་པའི་རྔུལ་ཆུ་ཅི་འདྲ་མང་པོ་ཞིག་རྐང་ལམ་འདིའི་སྟེང་དུ་སིམ་ཡོད་པ་རེད་ཨང༌། དེའི་ཕྱིར།ངས་རྐང་ལམ་ཕྲ་མོ་དེ་ཡིད་ལ་དྲན་ཐེངས་རེར། བསམ་པའི་དྲན་ཤེས་ཀྱི་ཡོལ་བའི་ངོས་ལ་འཆར་ཡན་གྱི་སྣང་བརྙན་མང་པོ་ཞིག་དབང་མེད་དུ་འཆར་འོངས་པ་དང༌། བརྗོད་བྱ་མི་གསལ་བའི་གཏམ་རྒྱུད་ཀྱི་འགྲོས་སྙན་མོ་ཞིག་ངའི་ཐོས་འཛིན་གྱི་བུ་ག་བརྒྱུད་དེ་སེམས་ཀྱི་གཏིང་དང་གློ་རྒྱུའི་མཚམས་ན་ལྷང་ལྷང་དུ་གྲགས་པའི་སྣང་བ་སྟེར་ཅིང་མཆིས། ངོ་མ་དེ་ནི་ང་ཚོ་དང་རྒྱང་ཐག་ཤིན་ཏུ་རིང་བའི་གནའ་སྔ་མོའི་དུས་ཀྱི་གཏམ་རྒྱུད་ཅིག་རེད། ཡིད་འཛིན་ཆེ་ཞིང་ཁ་བརྡ་ལ་དགའ་བའི་རྒན་རྒོན་དེ་དག་གིས་སོས་དུས་ཀྱི་ཉི་མ་འཕུད་ཐབས་བྱེད་སྐབས། སྐྱིད་སྡུག་གི་གཉེར་མ་ཤ་ཤུར་བབས་པའི་ནང་དུ་དགའ་སྐྱོ་འདྲེས་མའི་མིག་ཆུ་དང་བཅས་ཏེ། “གནའ་མི་གླེན་པ་དེ་ཚོ། ཨེ་ན། ས་རྩུབ་པོ་འདི་འདྲ་བ་ནས་གཞི་ཆགས་རྒྱུ་སེམས་ལ་ཇི་ལྟར་དྲན་པ་ཡིན་ནམ།" ཞེས་གདུང་སེམས་དང་བཅས་ཏེ་འཁང་ར་རེ་བྱེད་པ་དང༌། དེའི་མོད་ལ། སྡེ་འདབས་ཀྱི་རྐང་ལམ་ཕྲ་མོ་དེའི་སྐོར་ལ་ལབ་གླེང་བྱས་ཏེ་ཉི་མ་མ་ནུབ་བར་དུ་འདུག་པ་དང༌། སྐབས་རེར་ལྟ་བ་མ་མཐུན་པར་ཚིག་རྩོད་བྱེད་པའང་ཡོད། “ཁྱོད་ཀྱིས་ཅི་ཤེས། ང་ལྡོང་གི་རུས་ཆེན་བཅོ་བརྒྱད་ཀྱི་རྒྱུད་པ། བོད་རུས་ཆེན་བཞི་ཡི་ནང་ཚན། རུས་ཆུང་སྟོང་གི་ཡ་གྱལ། རུས་མཐུན་རྣམས་ཀྱི་ཐུ་བོ། ངའི་ཕ་མེས་ཡང་མེས་ཀྱི་རིང་ལ། ལྡོང་གཟུ་བ་དགེ་ལེགས་ཟེར་བ་སུ་ཆིབས་རྟ་ཁྱུང་ཆེན་ཟིལ་གནོན་ལ་ཞོན་ཏེ་དབྱངས་རྟ་རུས་ཆེན་མགོ་གནོན་བྱ་བ་བླངས་ལས་བརྒྱུགས་པའི་ཤུལ་ནི་མ་གིའི་རྐང་ལམ་ཕྲ་མོ་དེ་ཡིན། "རུས་ལྡོང་ཅན་གྱི་རྒད་པོ་དེས་ང་རྒྱལ་དང་བཅས་ཏེ་དེ་ལྟར་བཤད།
“ཨ་ཧ། ལབ་རྒྱག་ན་ཁྱི་ལབ་མ་རྒྱག ཁྲ་ཆུང་མིག་གིས་མཐོང་བ་མེད་ཀྱང༌། དར་ལུང་རྣ་བའི་ཐོས་ཚུལ་ལོས་ཡོད། མ་གིའི་རྐང་ལམ་ཕྲ་མོ་དེ་ནི། སྨུག་པོ་གླིང་གི་གདུང་རྒྱུད། གླིང་ལྷ་སྡེ་དཀར་པོའི་རྒྱལ་པོ། མ་སེང་ལྕམ་འབྲུག་མོའི་བདག་པོ། གླིང་སེང་ཆེན་ནོར་བུ་དགྲ་འདུལ་གྱིས་རྟ་རྐྱང་རྒོད་གཡེར་བར་བཅིབས་ཏེ་ཧོར་སྡིག་ཅན་བཤན་པ་རྨེ་རུ་རྩེ་སྐེ་ལྕགས་ཐག་ཤ་ལེར་ཁྲིད་པའི་ཤུལ་ཡིན། ”སྒྲུང་བ་རྒད་པོས་བདེན་བདེན་ཅོག་ཅོག་གི་གཏམ་དེ་ལྟ་བུ་ཞིག་ལབ་བྱུང༌། དེར་མཐུད་ནས་རྒན་རྒོན་རྣམས་ཀྱིས་ཀྱང་རང་གི་འདོད་ཚུལ་རྣམས་ལྷུག་གེར་སྨྲས་པ་དང༌།
ལེ་ཚན་རྗེས་མའི་ནང་སྐྱར་དུ་མཇལ་ཡོང་།
བཀའ་དྲིན་ཆེ།
#dhundup gyal
#tibetanwriter
🤗👌👌👏👏
👌🙏🏻🎉
ཡི་རངས་ཞུ། 🎉🎉🎉🎉❤❤❤❤
བཀའ་དྲིན་ཆེ།❤