บทเชิญเทวดา (กลอนพ่อหมอลำมีฤทธิ์ ปัญญาวงศ์)

:บทเชิญเทวดา:
ข้าขอยอมือไหว้ถวยทูลทวยเทพผู้มีฤทธิ์เดชกล้า ผลาล้นลื่นหลายขอเชิญยัวระยาตรย้ายเข้ามาสู่ พิธีกรรมฝูงข้าทำมงคลแต่งกุศลดีด้วย เชิญมาอวยอมเอื้อนคาถาผายแผ่ให้แก่ฝูงข้าน้อยให้พลอยได้ชื่นชมประณมกรแล้วกราบก้มขอเชิญเทพเทวดา ว่า สัคเค กาเม ท่านผู้เนาว์กามาอยู่สวรรค์ทั้งหกชั้น จ รูเป ทวยเทวัญผู้เนาว์ห้องเทิงสวรรค์ชั้นใหญ่รูป ภพเทพไท้ให้ไวฟ้าวท่าวสาร คิริสิขรตเต ขอเชิญ เทพทุกท่านผู้เนาว์ยอดขุนเขา จันตลิกเข ท่านที่ เนากลางหาวอ่าวนภาเวหากว้าง วิมาเน เทพทั้งปวงผู้เนาว์ชั้นวิมานแมนแดนสง่าเทิง วิมานย่านฟ้านภากว้างช่วงสถาน ทีเป เทพทุกท่าน ที่เนาว์อยู่บนเถาะกลางสมุทรทะเลหลวงข่วงนที ธารน้ำ รัฏเฐ ตามหนห้องดินแดนแคว้นประเทศ จ คาเม อยู่ในเขตหมู่บ้านสถานเท่าทั่วไป ตรุวนคหเน เนาว์ในบ้านและป่าไม้ในป่าดงหนา เคหวัตถุมหิ เขตเต ตามเคหา เฮือนชานถิ่นสถานเนาว์ยั้ง ภุมมา จายันตุ อยู่ไฮ่นาสาส่างภูมสถานด่านดอนซุ่ม เทวา ชลถลวิสเม อยู่ตามลุ่มแม่น้ำตามพื้นแผ่นดินถิ่นที่ ไกลที่ใกล้ในที่ภูมิสถาน ยักขักคันธัพพนาคา เทิงยักษาคนธรรพ์นาคเนาว์ ในน้ำอยู่เทิงบกเทิงพื้นในที่สูงหลุบต่ำนำรุกขาป่าไม้ ไกลใกล้เขตขันธ์ โสฬสผู้อยู่ชั้นท้าวท่านมหาพรหม ผู้อุดมเดชาฤทธิรณลือล้นโฮมทั้งสากลกว้าง จักรวาลสถานที่ทุกๆรัฐปัฏพีสัมมาทิฏฐิเทพเจ้ามา โฮมเข้าใส่กัน ติฏฐันตา สันติเก ยัง มุนิวรวจนัง สาธ โว เม สุณันตุ ณ โอกาสบัดนี้นั้นขอเชิญท่านเป็น สักขีสดับธรรมพระมุนีประเสริฐดีดวงกล้าแผ่เดชา ปกป้องผองภัยไกลนิราศให้แก่ญาติพี่น้องของข้าคู่สู่คน ให้ได้ลุล่วงพ้นเคราะห์ใหญ่ภัยพิบัติขจัดมวล โรคาอย่าได้มีมาใกล้ ขอจงบันดาลให้สุขซำบาย หายทุกข์โสกประสบโชคราบรื่นรวยล้นลื่นไหล ขอให้สัมฤทธิ์ได้สรรพสิ่งศฤงคานบริวารได้อาศัย เพิ่งพาผลายู้ได้เชิดชูดูค้ำนำพาพุทธศาสน์ ขออำนาจคุณพระพุทธเจ้า ขออำนาจคุณพระธรรมเจ้า ขออำนาจคุณพระสังฆเจ้า ขออำนาจคุณพระเทวดาเจ้า มาโฮมเข้าว่าซ่อยซู...นั่นเทาะน่า น่อละเด้อฯ