༼ གངས་ཅན་པ་སྒྲོལ་མ་སྐྱབས ༽ ཀྱི་གཞས་གསར་New song by Dolma Kyab
ฝัง
- เผยแพร่เมื่อ 27 ส.ค. 2024
- #tibetanculture #tibetansong #tibetan #tibetannewsong #dolmakyab
༄།།དུས་འཁོར་དབང་ཆེན་དང་འབྲེལ་བའི་སྨོན་ཚིག་བྱིན་རླབས་རང་འཁྱིལ།
ཚིག བཛྲ་ཚུལ་ཁྲིམས་རྒྱ་མཚོ།
དབྱངས། སྒྲོལ་མ་སྐྱབས།
ལེན་མཁན། སྒྲོལ་མ་སྐྱབས།
༼༡༽སྐྱབས་ཀུན་འདུས་བླ་མའི་ཐུགས་རྗེ་དང་།།
སྔོན་བསོད་ནམས་བསགས་པའི་འབྲས་བུ་ལས།།
ཚེ་འདིར་ཡང་བླ་མ་མཆོག་དང་མཇལ།།
སེམས་དད་པས་བསྟེན་ནོ་རྗེས་སུ་ཟུངས།།
༼༢༽དགུང་ཨ་སྔོན་ཉི་ཟླས་བཟུང་ན་གསལ།།
རི་མཐོན་པོ་ཁ་བས་ཁེབས་ན་དཀར།།
སྤང་ཡངས་པོར་མེ་ཏོག་བཞད་ན་ཡག །
སྙིང་འདབ་བརྒྱད་བླ་མས་བརྒྱན་ན་སྐྱིད།།
༼༣༽ གནས་སྤྱི་གཙུག་བླ་མར་གཏད་པའི་མཐུས།།
སེམས་བསམ་པ་ཆོས་ལ་གཞོལ་བར་ཤོག།
ཆོས་ངེས་འབྱུང་བསམ་པས་ཟིན་པར་ཤོག །
ཞེ་གཏིང་ནས་ཐར་བློ་སྐྱེ་བར་ཤོག།
༼༤༽མར་ངན་སོང་སྡུག་བསྔལ་བསམ་ན་འཇིགས།།
ཡར་ལྷ་མིའི་བདེ་བའང་ཡིད་རྟོན་མེད།།
ཕར་དེད་ན་ཁམས་གསུམ་བཙོན་ར་ཡིན།།
དེ་ཡིན་ཚུལ་སྙིང་ནས་ཤེས་པར་ཤོག །
༼༥༽གནས་ཁམས་གསུམ་འཁོར་བའི་སྡུག་བསྔལ་ལས།།
གྲོལ་འདོད་པའི་ངེས་འབྱུང་བཅོས་མིན་སེམས།།
བྱམས་སྙིང་རྗེས་དྲངས་པའི་སེམས་བསྐྱེད་ཀྱི།།
རྒྱ་དམ་པོས་ཀུན་ནས་ཟིན་པར་ཤོག །
༼༦༽རང་སྡུག་བསྔལ་མི་འདོད་བདེ་བ་འདོད།།
གཞན་སེམས་ཅན་ཀུན་ཀྱང་དེ་འདྲ་ཡིན།།
དྲིན་འཁོར་མེད་མ་རྣམས་ཡལ་བོར་ནས།།
རང་གཅིག་བུར་བྲོས་ན་ཁྲེལ་རེ་ཞན།།
༼༧༽ཕྱི་ཁམས་གསུམ་འཁོར་བ་བདེན་མེད་ཡིན།།
ནང་འཁོར་བའི་རྩ་བ་བདེན་མེད་ཡིན།།
ཆོས་ཐམས་ཅད་བདེན་པར་མེད་པའི་ཚུལ།།
ལུང་རིགས་པས་འཚོལ་ལ་གཞོལ་བར་ཤོག།
༼༨༽སྔགས་ཟབ་མོ་བྱུང་བ་མདོ་ཡི་དྲིན།།
མདོ་ཐུན་མོང་ལམ་གྱིས་རྒྱུད་སྦྱོང་ཤོག།
ལམ་གོ་རིམ་ཇི་བཞིན་སྒྲུབ་པའི་མཐུས།།
སྔགས་ཟབ་མོའི་དབང་བསྐུར་འཐོབ་པར་ཤོག།
༼༩༽དབང་བསྐུར་བའི་དུས་སུ་ཁས་བླངས་པའི།།
སྡོམ་དམ་ཚིག་ཚིག་ཚུལ་བཞིན་བསྲུང་བར་ཤོག།
རྒྱུད་སྣོད་རུང་གསུམ་གྱིས་སྦྱངས་པ་ལས།།
ལམ་རིམ་གཉིས་སློབ་ལ་དབང་འབྱོར་ཤོག།
༼༡༠༽དུས་ད་རེས་མཇལ་དཀའ་བླ་མར་མཇལ།།
འཐོབ་དཀའ་བ་དུས་འཁོར་དབང་ཆེན་ཐོབ།།
ཞིང་ཤམྦྷ་ལ་ཡི་ལམ་ཡིག་རྙེད།།
ཨེ་མ་ཧོ་ཇི་འདྲའི་སྐྱིད་པ་ལ།།
༼༡༡༽མགོན་ཁྱེད་ཀྱིས་ཞིང་མཆོག་ཤམྦྷ་ལར། །
དཔལ་རིགས་ལྡན་དྲག་པོའི་སྤྱན་སྔ་རུ།།
ཆོས་འདི་ཡི་དགའ་སྟོན་འགྱེད་པའི་ཚེ། །
འབངས་བདག་ཅག་སྲས་སུ་འགྱུར་བར་ཤོག །
༼༡༢༽དུས་དེ་ཚེ་ཁྱོད་ཞལ་གངས་རི་ལས། །
གང་བབ་པའི་ཟབ་གསང་བདུད་རྩིའི་རྒྱུན།།
བུ་བདག་བློའི་རྫིང་བུར་ཡོངས་འཁྱིལ་ནས། །
སྐུ་སྟོང་གཟུགས་ཕྱག་ཆེན་མངོན་འགྱུར་ཤོག །
༼༡༣༽འདི་བསམ་ན་སེམས་ཀྱི་གཏིང་ནས་དགའ།།
མགོན་ཁྱེད་འདྲ་མཇལ་བ་སྔོན་བསགས་བཟང་།།
བཟང་ཡོད་ཚད་དཀར་བོ་དགེ་འབྲས་ཡིན།།
འདི་གསལ་བྱེད་ཆོས་ལ་དད་པས་སྐྱིད།།
༼༡༤༽སྐྱིད་འདི་ལ་སྐྱིད་ངོ་ཤེས་པ་ཡང་།།
ཕ་བླ་མ་རྣམས་ཀྱི་བཀའ་དྲིན་ཡིན།།
རྗེ་བླ་མའི་སྐུ་ཚེ་བརྟན་པར་ཤོག།
ཡང་བསྟན་འགྲོའི་དོན་ཆེན་འགྲུབ་པར་ཤོག།
༼༡༥༽སྐྱབས་བསླུ་མེད་མཆོག་གསུམ་བྱིན་རླབས་དང༌། །
ཆོས་རྟེན་འབྲེལ་བདག་ཡིད་ལྷག་བསམ་དང་།།
ཚིག་བདེན་པས་ཇི་ལྟར་སྨོན་འབྲས་ཀུན། །
གེགས་མེད་པར་དེ་ལྟར་འགྲུབ་པར་ཤོག །
ཅེས་པ་འདི་ཡང་འཇམ་མགོན་བསྟན་པའི་གསལ་བྱེད་ཁྲི་ཆེན་གུང་ཐང་སྐུ་ཕྲེང་བདུན་པ་མཆོག་གིས་ཉིད་ཀྱི་འཁྲུངས་ཡུལ་མཛོད་དགེ་ནས་དུས་འཁོར་དབང་ཆེན་གནང་བ་ལ་ཉེ་བའི་སྐབས་སུ་་གངས་ཅན་པ་ཞེས་གངས་རིའི་ལྗོངས་ན་ཡོངས་སུ་གྲགས་པའི་རྡུང་ལེན་པ་སྒྲོལ་མ་སྐྱབས་ཀྱིས་ངའི་སྤུན་ཆུང་བ་བཛྲ་འོད་ཟེར་བརྒྱུད་ནས་ད་རེས་ཀྱི་དུས་འཁོར་དབང་ཆེན་འདི་དང་འབྲེལ་བའི་དབང་བསྟོད་དམ་སྨོན་ཚིག་ལྟ་བུ་ཞིག་ཅིས་ཀྱང་འབྲི་རོགས་ཞེས་ནན་གྱིས་བསྐུལ་བ་ལ་བརྟེན་ནས་ཤཱཀྱའི་དགེ་སློང་གི་གཟུགས་བརྙན་ཙམ་འཛིན་པ་བཛྲ་ཚུལ་ཁྲིམས་རྒྱ་མཚོར་འབོད་པས། སྤྱི་ལོ་༢༠༢༣ལོའི་ཟླ༧ཚེས་༡༩ཉིན། བླ་བྲང་བཀྲ་ཤིས་འཁྱིལ་གྱི་རང་ཤག་ཆོས་རིག་འོད་སྣང་འཁྱིལ་བའི་དགའ་ཚལ་ནས་ཤར་མར་བྲིས་པའོ།