Psalm 51 in Konkani || Keerthan 51 || ಕೀರ್ತನ್ 51 ಬೊಗ್ಸಣ್ಯಾ ಖಾತಿರ್ ಪ್ರಾರ್ಥನ್
ฝัง
- เผยแพร่เมื่อ 10 ธ.ค. 2024
- Psalm 51 in Konkani || Keerthan 51 || ಕೀರ್ತನ್ 51 ಬೊಗ್ಸಣ್ಯಾ ಖಾತಿರ್ ಪ್ರಾರ್ಥನ್
51:1 ಕಾಕುಳ್ತ್ ಮ್ಹಜಿ ಕರ್, ದೆವಾ, ತುಜ್ಯಾ ಥಿರ್ ಮೊಗಾನ್, ತುಜೆ ವ್ಹಡ್ ದಯಾಳಾಯೆನ್ ಅಪ್ರಾಧ್ ಮ್ಹಜೆ ಪುಸುನ್ ಕಾಡ್.
51:2 ಮ್ಹಜ್ಯಾ ಗುನ್ಯಾಂವಾಂತ್ಲೊ ಮ್ಹಾಕಾ ಪುರ್ತೊ ಧುವ್ನ್ ಕಾಡ್, ಮ್ಹಜ್ಯಾ ಪಾತ್ಕಾಂತ್ಲೊ ಮ್ಹಾಕಾ ನಿತಳ್ ಕರ್.
51:3 ಮ್ಹಜೆ ಗುನ್ಯಾಂವ್ ಹಾಂವ್ ಒಳ್ಕುನ್ ಘೆತಾಂ, ಮ್ಹಜೆಂ ಪಾತಾಕ್ ಆಸಾ ಸದಾಂಚ್ ಮ್ಹಜೆ ಮುಕಾರ್.
51:4 ತುಜೆ ವಿರೋಧ್, ತುಜೆ ಎಕ್ಲ್ಯಾಚೆಚ್ ವಿರೋಧ್ ಹಾಂವೆಂ ಪಾತಾಕ್ ಕೆಲೆಂ, ಜೆಂ ತುಜೆ ದಿಷ್ಟಿನ್ ವಾಯ್ಟ್, ತೆಂ ಹಾಂವೆಂ ಕೆಲೆಂ. ದೆಕುನ್ ತುಂ ನ್ಯಾಯ್ ನಿರ್ಣಯ್ ಕರ್ತಾಯ್ ತೆದ್ನಾ ನಿತಿವಂತ್, ಫರ್ಮಾಣ್ ದಿತಾಯ್ ತೆದ್ನಾ ಚುಕಿವೀಣ್.
51:5 ಪಳೆ, ಹಾಂವ್ ಗುನ್ಯಾಂವಾಂತ್ ಜಲ್ಮಲೊಂ ಪಾತ್ಕಾಂತ್ ಮ್ಹಜಿ ಆವಯ್ ಮ್ಹಾಕಾ ಗರ್ಭಿಂ ಸಂಭವ್ಲಿ.
51:6 ಪಳೆ, ಕಾಳ್ಜಾಚೆಂ ಪ್ರಾಮಾಣಿಕ್ಪಣ್ ತುಕಾ ಮಾನ್ವತಾ, ಮ್ಹಜ್ಯಾ ಅಂತಸ್ಕರ್ಣಾಂತ್ ತುಜಿ ಜಾಣ್ವಾಯ್ ಮ್ಹಾಕಾ ಶಿಕಯ್ತಾಯ್.
51:7 ಹಿಸ್ಸೊಪಾನ್ ಮ್ಹಾಕಾ ನಿತಳ್ ಕರ್, ಆನಿ ಹಾಂವ್ ಶುದ್ಧ್ ಜಾತಲೊಂ, ಧು ತುಂ ಮ್ಹಾಕಾ, ಆನಿ ಹಾಂವ್ ಹಿಮಾ ಪ್ರಾಸ್ ಧವೊ ಜಾತಲೊಂ.
51:8 ಸಂತೊಸಾಚೊ ಆನಿ ಉಲ್ಲಾಸಾಚೊ ನಾದ್ ಮ್ಹಾಕಾ ಆಯ್ಕುಂಕ್ ದಿ, ಆನಿ ತುವೆಂ ಪೂಡ್ ಕೆಲ್ಲಿಂ ಹಾಡಾಂ ನಾಚ್ತಲಿಂ.
51:9 ಮ್ಹಜ್ಯಾ ಪಾತ್ಕಾಂ ಮುಕಾರ್ ತುಜೆಂ ಮುಖಾಮಳ್ ಲಿಪಯ್, ಸಗ್ಳೆ ಮ್ಹಜೆ ಆಪ್ರಾಧ್ ಪುಸುನ್ ಕಾಡ್.
51:10 ಏಕ್ ನಿರ್ಮಳ್ ಕಾಳಿಜ್ ಮ್ಹಾಕಾ ರಚುನ್ ದಿ, ದೆವಾ, ಏಕ್ ನವೊ, ಥಿರ್ ಆತ್ಮೊ ಮ್ಹಜೆ ಭಿತರ್ ಘಾಲ್.
51:11 ತುಜೆ ಮುಕ್ಲೊ ಕಾಡುನ್ ಮ್ಹಾಕಾ ಭಾಯ್ರ್ ಘಾಲಿನಾಕಾ, ತುಜೊ ಪವಿತ್ರ್ ಆತ್ಮೊ ಮ್ಹಜೆ ಕಡ್ಚೊ ಕಾಡಿನಾಕಾ.
51:12 ತುಜೆ ಸೊಡ್ವಣೆಚೊ ಸಂತೊಸ್ ಪರ್ತುನ್ ಮ್ಹಾಕಾ ದಿ, ಉದಾರ್ ಆತ್ಮೊ ಮ್ಹಜೆ ಥಂಯ್ ಥಿರ್ ಸಾಂಬಾಳ್.
51:13 ಖೊಟ್ಯಾ ಮನ್ಶಾಂಕ್ ಹಾಂವ್ ತುಜಿ ವಾಟ್ ಶಿಕಯ್ತಲೊಂ, ಆನಿ ಪಾತ್ಕಿ ತುಜೆಶಿಂ ಪರ್ತುನ್ ಯೆತಲೆ.
51:14 ಮರಣಾಂತ್ಲೊ ಮ್ಹಾಕಾ ನಿವಾರ್, ದೆವಾ, ಮ್ಹಜ್ಯಾ ತಾರಕಾ, ಆನಿ ಮ್ಹಜಿ ಜೀಬ್ ತುಜಿ ನೀತ್ ಗಾಜಯ್ತಲಿ.
51:15 ಉಗಡ್ ಮ್ಹಜೆ ವೋಂಟ್, ಸರ್ವೆಸ್ಪರಾ, ಆನಿ ಹಾಂವ್ ತುಜಿ ಸ್ತುತಿ ಕರ್ತಲೊಂ.
51:16 ಬಲಿದಾನಾಂ ತುಕಾ ಮಾನ್ವಾನಾಂತ್; ಹೋಮ್ ಬಲಿಯೊ ಹಾಂವ್ ಭೆಟಯ್ನ್ ಜಾಲ್ಯಾರ್, ತುಂ ಪ್ರಸನ್ನ್ ಜಾಯ್ನಾಂಯ್.
51:17 ದುಖೆಸ್ತ್ ಆತ್ಮೊಚ್ ದೆವಾಕ್ ಮಾನ್ವಾತಾ ತೆಂ ಬಲಿದಾನ್ ದುಖೆಸ್ತ್ ಆನಿ ಖಾಲ್ತ್ಯಾ ಕಾಳ್ಜಾಚೊ, ದೆವಾ, ತುಂ ತಿರಸ್ಕಾರ್ ಕರಿನಾಂಯ್.
51:18 ತುಜೆ ದಯೆನ್ ಸಿಯೊನಾಕ್ ತುಜೆಂ ಬರೆಂ ಮನ್ ದಾಕಯ್ ಜೆರುಸಾಲೆಮಾಚ್ಯೊ ವಣ್ತಿ ಪರ್ತುನ್ ಬಾಂದುನ್ ದಿ,
51:19 ತೆದ್ನಾ ತುಕಾ ಮಾನ್ವತಲಿಂ ಖರಿಂ ಬಲಿದಾನಾಂ ಹೋಮ್ ಆನಿ ಸಂಪೂರ್ಣ್ ಭಸ್ಮಿಲ್ಲ್ಯೊ ಬಲಿಯೊ ಆನಿ ತುಜೆ ವೆದಿಚೆರ್ ಜಾತಲೆಂ ಪಾಡ್ಕ್ಯಾಂಚೆಂ ಸಮರ್ಪಣ್.
ಆಮೆನ್.
