Кадрия Темирбулатова. Түркі әлемі

«Түркі әлемі» хабарының бұл саны өмірден ерте озса да, шығармалары оқырмандарына қуат, жанына ләззат сыйлаған ноғайдың ақын қызы Кадрия Темірболатоваға арналады. Темірболатова Кадрия Оразбайқызы - 1948 жылы Дағыстан Республикасының Ноғай ауданы, Терекли-Мектеп ауылында дүниеге келген. Мәскеуде М. Горький атындағы Әдебиет институтын бітірген. 1977 жылдан КСРО Жазушылар Одағының мүшесі. Кадрияның алғашқы өлеңдері 1965 жылы аудандық "Степной маяк" газетінде, кейін «Родная земля» ноғай әдеби жылнамасының беттерінде жарық көрген. 1970 жылы дағыстандық кітап баспасынан «Горы начинаются с равнины» атты алғашқы жыр жинағы жарыққа шықты. 1972 жылы Черкесск қаласында «Қарашай-Черкес» баспасынан «Тропинка» атты екінші кітабы басылып шықты. Одан кейін «Песни юности», «Удивление» атты кітаптары жарық көрді. 1975 жылы Мәскеуде «Молодая гвардия» баспасынан орыс тіліне аударылған оның «Айдың күлімсіреуі», ал «Современник» баспасынан «Спасенные звезды» өлеңдер жинағы жарық көрді. Кадрия өз заманында «Айдың күлімсіреуі» атты кітабы үшін Дағыстан Республикасының Лениндік комсомолының республикалық сыйлығына ие болған. Ол өзі өлең жазып қана қоймай, М. Ю. Лермонтов, В. Маяковский, Н. Хикмет, Р. Гамзатов және басқа да ақындардың бірқатар шығармаларын ноғай тіліне аударған. 1984 жылы "Современник" баспасынан орыс тіліне аударылған «Дала қызы» атты өлеңдер кітабы жарық көрді. Кадрия Темірболатованың туғанына 70 жыл толуына орай ТҮРКСОЙ ұйымы жаңа жобаны қолға алды. Кадрия өлеңдері түркі тілдес елдер тілінде сөйлеп, бір үлкен кітап болып жарыққа шықты. ТҮРКСОЙ дың ұйымдастыруымен Стамбул, Ялова, Ескішехир, Анкара қалаларында Кадрия Темирболатованың туғанына 70 жыл толуына орай әдеби шаралар өтті. Бұл шараға Қазақстаннан Қадрия өлеңдерін ноғай тілінен қазақша сөйлеткен ақын-аудармашы, филология ғылымдарының кандидаты Маржан ЕРШУ қатысып қайтты. Хабарда Кадрия жырларын қазақ тіліне аударған ақын, аудармашы Маржан Ершудің сұхбаты мен ақынның өлеңдері Қ.Қуанышбаев атындағы мемлекеттік академиялық драма театрының актрисасы Гауһар Жүсіпованың және Нұргүл Айтқалиеваның оқуында беріледі.
Хабарды дайындап жүргізген қазақ радиосының редактор-жүргізушісі Толқын Сұлтан.
Дыбыс режиссері - Қайсар Ердеш
#КадрияТемирбулатова #Кадрия #Поэт #Ноғайлар #ногайцы #стихотворение #Түрксой