رحلة شمال تركيا ٢٠٢٤، الجزء الرابع مع مختصر شامل لأهم الملاحظات

ريزا مدينه جميله ومرتبه واجوائها جميله ، فيه مكان جميل على مرتفع بسيط يتكون من مطعم وجلسات لتناول الشاي ومحل لبيع الشاي.
في اماكن صرافه نفس اللي موجوده في اوزنجول.
في مول ريزا كويس للتسوق ومحل فله كويس كذلك.
في مطعم الشواء الذاتي جميل جدا ويبعد تقريبا ٤٥ دقيقه عن ريزا. ( الطريق له نفس الطريق اللي يودي الى المياه الكبريتيه يمر بنفق على الطريق الجديد وبعدين ترجع من تحويله الى الطريق القديم علشان توصل للمطعم، الطريق واضح وسهل )
ملخص خفيف ولطيف:
الدخول لتركيا لايحتاج فيزا ( بالنسبه للسعودين وباقي الجنسيات ممكن تراجع موقعهم لمعلومات اكثر).
خذ معاك مبلغ بسيط كاش فقط الى ماتخرج من المطار.وبعدين توجه الى اماكن الصرافه المعروفه وحول عندهم. وخلي معاك مبلغ على البطاقه.
اغلب الاماكن فيها الدفع الالي بالجوال ، حتى في اوزنجول وايدر وريزا طبعا وبعض الاماكن البعيده ولكن بعض المحلات حتى وهم عندهم الجهاز احيانا يعلق ويحتاج يحاول مره واثنين وحتى بالبطاقه البلاستيكيه احيان حتى تتم العمليه. وبعضهم مايقبل اصلا غير الكاش. اللي كنت استخدمها فيزا المسافر من الراجحي ( وافضل تكون معاك البطاقه البلاستيكيه احتياط).
العاب طرابزون الدفع كاش وترى في اماكن تحويل عمله اذا كان مثلا معاك كاش ولكن بتكون اقل من طرابزون مثلا.
اماكن تحويل العمله المعروفه واللي اغلب الشباب تكلموا عنهاموجوده فروع لهم في طرابزون، ريزا.
السكن في ايدر، اوزنجول ممكن ماتلاقي تكييف بنسبه ٩٥٪؜ ( مابغى اقول ١٠٠ ٪؜ لانه ممكن تلاقي واحد او اثنين فقط يوفر تكييف🫣).
منطقه الشمال تضاريسها مرتفعات، يعني عادي تلاقي سكن فوق جبل والطلوع له شوي متعب لغير سكان المنطقه.
للامانه، بعض المسؤولين عن اماكن السكن، المطاعم او حتى اماكن الترفيه من مطلات وكذا يساعدك بركن السيارة في المكان المطلوب ومجانا.
من تجربه شخصيه، تجنب التنقل الكثير بين المناطق، بمعنى ممكن تسكن في طرابزون ومنها تزور اوزنجول وترجع في نفس اليوم الا اذا تقدر تسكن فيها ( يومين او ثلاث )لاجل تفادي الازدحام المتعب في طريقها الصاعد.
ايدر يوم واحد كافي لها.
ريزا منطقه جميله، بترتيبها وأماكنها واجوائها ومافيها شك تحتاج زياره والسكن فيها كم يوم.
للاسف البعض وليس الكل بتلاقي تعامله فيه جفاء شوي، طنش تعش وانت في الاخير غريب🙂، فمافي داعي انك تزعج بالك.
انصح بالتسوق لاغراض البقاله من متجرين واللي هما حسب ماسمعت وجربت انهم الاوفر BIM و A-101 وهما منتشرين ماشاء الله في كل مكان.
غسيل السياره ، ممكن يكلفك ٥ ريال اذا انت بتنظف بنفسك او تقريبا ١٠ ريال اذا تنظيف الي. ومافي عندهم تنظيف داخلي للسياره.
جوجل ماب احيانا يوديك من طرق ماتدري ايش تقول بس😡، والمشكله انه احيان تلاقي مذكور عن محل او مكان انه يعمل الساعه كذا وتلاقي بعدين انه مقفل. من واقع تجربه، اغلب المحلات ( غير المطاعم ) تشتغل من الساعه ٩ الى ٩:٣٠ صباحا وتقفل ٥ الى ٦ مساء. حتى العيادات والصيدليات تقفل. احتمال ضعيف تلاقي صيدلية مناوبه وشغاله بعد هذا الوقت.
حتلاحظ نوعا ما صعوبة في التواصل مع العامة من حيث اللغة، حتى في بعض المطاعم. خليك محمل برنامج تحويل اللغات في جوالك افضل.
جربت شريحه الكترونيه من هولا فلاي وكانت كويسه ( مااقول ممتازه ) فيها نت مفتوح وإمكانيه المشاركه كنقطة اتصال وهذا كان فقط عتبي على ادائها الضعيف فيه.
وسعرها المذكور في التطبيق او الموقع ممكن تاخذ خصم عليه اذا تواصلت معاهم على الواتس حقهم، وخدمتهم كدعم فني للامانه كويسه وحتى وانت هناك، يضبطونك 👍.
تجنب تستأجر سياره من مكاتب المطار، معلومه سمعتها انهم ممكن يكونون متعبين في موضوع التدقيق وقت الاستلام ( حسب ماسمعت )، والافضل انك تأمن شامل وتريح دماغك ولكن انتبه اذا ماكان معاك تقرير من المرور لاسمح الله للحادث فكأنك ما امنت !
لاتستأجر سياره لونها داكن( اسود وكذا) متعب تنظيفها واقل شي يظهر عليها).
الطريق من طرابزون الى ريزا وايدر ممتع وفيه كثير من الأنفاق والقليل من الكاميرات لمراقبه السير.
عادي تلاقي مول زي فورم اللي في طرابزون مافيه تكييف تحس فيه( كانه تهويه شغال بس) ، مول جواهر سمعت انه نفس الشي🫣. بعكس مول ريزا 👍.
المطاعم والاسواق ، معليش ماهي رخيصه زي ماتسمع عنها. الاسعار كأنك في السعوديه من دون مبالغه. ممكن اول كانت رخيصه ولكن الان مختلفه، وحتى بعض موظفي المطاعم الان بدأوو يغيرون في الاسعار علشان الموسم 😡( بحسب كلامهم ).
عادي انك تلاقي طلب مضاف على الفاتوره بالخطأ وان كان حالات نادره ولكن خلك حريص👍.
اغلب الاماكن من سكن ومطاعم بتلاقي اخوان من سوريا شغالين فيها لتسهيل لغة التخاطب مع العرب. لهم منا الدعاء بأن يفرج الله عنهم وعن باقي المسلمين الكربات.
تطبيق بوكنج انا كنت حاجز عليه بعض الاماكن وبعض الاماكن عن طريق مكاتب سياحية . كل منها وله إيجابياته وسلبياته.
احب اشكر اخونا فواز من مكتب محمد سمور في طرابزون للخدمات اللي قدمها لنا.
واحب كذلك اشكر اخونا عماد علقم او البراء صاحب شركة سياحية في ريزا وايضا له قناة على اليوتيوب. انسان لانزكيه على الله خدوم لابعد درجة ومتمكن ماشاء الله عليه.
اتمنى لكم مشاهدة ممتعة ولاتنسوا الاشتراك ، المشاركة ، تفعيل زر التنبيه والاعجاب بالمقطع 👍