#ព្រះបន្ទូលនៃសេចក្ដីពិតសម្រាប់ថ្ងៃសៅរ៍
ฝัง
- เผยแพร่เมื่อ 9 ก.พ. 2025
- #ចំណងជើងវីដេអូ៖ «ឥទ្ធិពលនៃព្រះនគររបស់ព្រះ» The Influence Of His Kingdom
#រៀបរៀងឡើងដោយ Pastor Chris
#ព្រះបន្ទូលនៃសេចក្ដីពិតសម្រាប់ថ្ងៃសៅរ៍ ទី០១ ខែកុម្ភៈ ឆ្នាំ២០២៥។
«ឥទ្ធិពលនៃព្រះនគររបស់ព្រះ» The Influence Of His Kingdom
#អត្ថបទព្រះបន្ទូលដកស្រង់នេះរៀបរៀងឡើងដោយ Pastor Chris បង្រៀនអំពី «ជីវិតដ៏អស់កល្ប»
«ព្រះយេស៊ូវមានព្រះបន្ទូលថា នគរខ្ញុំមិនមែនត្រូវខាងលោកីយ៍នេះទេ បើសិនជានគរខ្ញុំត្រូវខាងលោកីយ៍នេះ នោះពួកអ្នកបំរើខ្ញុំ គេនឹងបានតយុទ្ធហើយ ដើម្បីមិនឲ្យត្រូវបញ្ជូនទៅសាសន៍យូដាឡើយ តែឥឡូវនេះ នគរខ្ញុំមិនមែនត្រូវខាងស្ថាននេះទេ»។ (យ៉ូហាន 18:36)
ការចោទប្រកាន់មួយក្នុងចំណោមការចោទប្រកាន់ជាច្រើន ដែលព្រះយេស៊ូត្រូវបានគេថ្កោលទោសគឺថា ទ្រង់បានប្រកាសព្រះអង្គទ្រង់គឺជាស្តេច។ ពេលលោកពីឡាតសួរព្រះអង្គថា៖ «តើអ្នកជាស្ដេចសាសន៍យូដាឬ?»។ ព្រះយេស៊ូមានព្រះបន្ទូលតបថា៖ «… នគរខ្ញុំមិនមែនត្រូវខាងលោកីយ៍នេះទេ បើសិនជានគរខ្ញុំត្រូវខាងលោកីយ៍នេះ នោះពួកអ្នកបំរើខ្ញុំ គេនឹងបានតយុទ្ធហើយ ដើម្បីមិនឲ្យត្រូវបញ្ជូនទៅសាសន៍យូដាឡើយ តែឥឡូវនេះ នគរខ្ញុំមិនមែនត្រូវខាងស្ថាននេះទេ» (យ៉ូហាន 18: ៣៦)។
លោកពីឡាត់បានចាប់អារម្មណ៍យ៉ាងខ្លាំងចំពោះចម្លើយរបស់ព្រះយេស៊ូវ ហើយវាក៏កាន់តែធ្វើឲ្យគាត់ចង់ដឹងបន្ថែមទៀត អំពីឥទ្ធិពលនៃព្រះនគររបស់ព្រះអង្គ។ គាត់បានសួរម្តងទៀតថា "តើអ្នកជាស្តេចឬ?" ព្រះយេស៊ូវបានពន្យល់យ៉ាងលម្អិតដោយមានបន្ទូលថា “… លោកមានប្រសាសន៍ថា ខ្ញុំជាស្តេច នោះត្រូវហើយ ខ្ញុំបានកើតមក ហើយក៏ចូលក្នុងលោកីយ៍នេះសំរាប់តែការនោះឯង ដើម្បីឲ្យខ្ញុំបានធ្វើបន្ទាល់ពីសេចក្តីពិត អស់អ្នកណាដែលកើតពីសេចក្តីពិត នោះក៏ឮសំឡេងខ្ញុំ» (យ៉ូហាន ១៨:៣៧)។
ព្រះអម្ចាស់យេស៊ូវបានមានបន្ទូលថាទ្រង់ជាស្តេចមានន័យថា គឺជាទ្រង់ផ្ទាល់ដែលជាអ្នកគ្រប់គ្រងនៃព្រះនគរនោះ។ បើដូច្នោះ តើព្រះនគរនោះស្ថិតនៅឯណា? ទ្រង់បានបញ្ជាក់ថា ព្រះនគររបស់ទ្រង់មិនមែនស្ថិតនៅក្នុងលោកីយ៍នេះទេ ដែលវាមានន័យថា ព្រះនគរនោះគឺស្ថិតនៅឯកន្លែងផ្សេងមិនមែននៅក្នុងតំបន់ណាមួយនៃផែនដីនេះទេ។ ពួកអ្នកគ្រប់គ្រង នាសម័យនោះ មិនអាចយល់ពីព្រះនគររបស់ព្រះយេស៊ូវបានទេ ដោយសារពួកគេមើលមិនឃើញ។ ពួកគេពិតជាមានការងឿងឆ្ងល់ចំពោះពាក្យសំដីរបស់ព្រះយេស៊ូវខ្លាំងណាស់។
បន្ទាប់មក នេះគឺជាចំណុចដ៏សំខាន់ខ្លាំងណាស់ គឺថាព្រះយេស៊ូវទ្រង់មានបន្ទូលអំពីបេសកកម្មដែលជាការពង្រីកឥទ្ធិពល និងអំណាចនៃនគរស្ថានសួគ៌របស់ទ្រង់មកឯលោកីយ៍នេះ។ ព្រះយេស៊ូវបានយាងមកដើម្បីនាំយកពរជ័យ ភាពល្អឥតខ្ចោះ និងអំណាចនៃព្រះនគររបស់ទ្រង់ មកឯលោកីយ៍ដែលពោរពេញទៅដោយការឈឺចាប់ ភាពងងឹត និងការបែកខ្ញែក។ លោកិយ៍នេះដែលពោរពេញទៅដោយការបំផ្លិចបំផ្លាញ និងការរងទុក្ខ ក៏ត្រូវបានការផ្លាស់ប្តូរ ដោយសារព្រះយេស៊ូវបានយាងមកជាមួយនឹងព្រះនគររបស់ទ្រង់ ដើម្បីឲ្យមានឥទ្ធិពលលើការផ្លាស់ប្តូរនោះ។ ហាលេលូយ៉ា!
តាមរយៈសេចក្ដីសង្គ្រោះ ព្រះយេស៊ូវបានពង្រីកភាពល្អឥតខ្ចោះនៃព្រះនគររបស់ទ្រង់ដល់មនុស្សជាតិ។ ឥឡូវនេះ អ្នកបានកើតជាថ្មី អ្នកបានក្លាយជាប្រជារាស្ត្រនៃព្រះនគរដ៏រុងរឿងរបស់ព្រះគ្រីស្ទហើយ៖ «ព្រមទាំងអរព្រះគុណ ដល់ព្រះវរបិតាដែលទ្រង់បានប្រោស ឲ្យយើងបានគួរ នឹងទទួលចំណែកកេរ្តិ៍អាករ ក្នុងពួកបរិសុទ្ធនៅទីភ្លឺផង ទ្រង់បានប្រោសឲ្យយើងរួចពីអំណាចនៃសេចក្តីងងឹត ហើយផ្លាស់យើងមកក្នុងនគររបស់ព្រះរាជបុត្រាស្ងួនភ្ងានៃទ្រង់» (កូល៉ុស ១:១២-១៣)។
ដូច្នេះ ចូរដើរក្នុងស្មារតីនៃព្រះពរដ៏ពេញលេញនៃព្រះរាជ្យរបស់ព្រះ ព្រមទាំងផ្សព្វផ្សាយឥទ្ធិពលនៃការគ្រប់គ្រងរបស់ទ្រង់ទៅគ្រប់ទីកន្លែង។ អ្នកគឺជា អ្នកតំណាងឱ្យព្រះរាជ្យរបស់ព្រះ; គ្រប់ទីកន្លែងដែលអ្នកទៅ ព្រះរាជ្យនោះនឹងនៅជាប់នឹងអ្នក ដ្បិតព្រះរាជ្យនោះស្ថិតនៅក្នុងខ្លួនរបស់អ្នកហើយ៖ លូកា១៧:២១ “គ្មានអ្នកណានឹងថា មើល នៅទីនេះ ឬថា មើល នៅទីនោះបានឡើយ ដ្បិតមើល នគរព្រះក៏នៅកណ្តាលអ្នករាល់គ្នាហើយ។»។ គឺជាអ្នកហើយ ដែលជាអ្នកធ្វើការពង្រីកឥទ្ធិពលនៃព្រះនគររបស់ព្រះយេស៊ូវ ដ្បិតព្រះគម្ពីរចែងថា “... នោះទ្រង់នឹងបានឃើញពូជពង្សរបស់ទ្រង់ ហើយនឹងចំរើនព្រះជន្មទ្រង់ឲ្យយឺនយូរតទៅ ឯបំណងព្រះហឫទ័យនៃព្រះយេហូវ៉ា នោះនឹងជឿនឡើងដោយព្រះហស្តទ្រង់” (អេសាយ ៥៣:១០។ )
#សេចក្ដីអធិស្ឋាន
ឱព្រះអម្ចាស់យេស៊ូវអើយ ខ្ញុំសូមអរព្រះគុណចំពោះព្រះពរនៃព្រះរាជ្យនៃស្ថានសួគ៌ និងឥទ្ធិពលរបស់របស់ព្រះនគរទ្រង់នៅលើផែនដី ព្រមទាំងនៅក្នុងដួងចិត្តមនុស្ស។ ទូលបង្គំរស់នៅក្នុងព្រះរាជ្យនេះ ហើយទូលបង្គំក៏ដើរនៅព្រះពរដ៏ពេញហូរហៀររបស់ព្រះអង្គ ថែមទាំងធ្វើការផ្សព្វផ្សាយឥទ្ធិពលនៃព្រះរាជ្យរបស់ព្រះយេស៊ូវនៅគ្រប់ទីកន្លែង។ អាម៉ែន។
#ការសិក្សាបន្ថែម៖ កូល៉ុស 1:13 ម៉ាថាយ ៦:៣៣ លូកា ១៧:២០-២១
