Akureyri árið 1989 - Fréttaannáll

Upphaflega hugmyndin á bak við þetta 1989 fortíðarflipp var að nota opinbert fréttayfirlit RÚV og plokka úr því kafla er snúa að Akureyri og Eyjafirði. Úr því urðu aðeins nokkrar mínútur eða slitrótt saga og óspennandi en TV myndefnið var þó ákaflega skemmtilegt þetta árið. Dagblaðið Dagur var öflugur fréttamiðill á þessum tíma og aðgengilegur á timarit.is svo ég lagðist í smá uppflettingar til að gera annálinn heildstæðari. Þetta er þó alls ekki sett upp sem sagnfræðiheimild því ég nota aðeins fréttaefni sem mér finnst henta heildarþemanum. Ég get þó sagt að ég fór um víðan völl og KA völl að auki með þá hugmynd að koma heilu ári fyrir á 10-15 mínútum og reyna að koma sem mest af stemmingunni til skila með aðeins brotum úr sjónvarpsfréttum og fyrirsögnum úr Degi. Ég viðurkenni þó að atriðið úr Sjallanum var frá 1988.
Hvað sagnaformið snertir þá reyni alltaf að skapa einhverskonar söguumgjörð í öllum mínum myndböndum, þó ekki sé nema til að halda ártölum eða staðsetningum saman og þokkalega flokkuðu gagnvart leitarvélum o.þh.
Eflaust eru deildar meiningar um formgerð og val á tónlist en þá bið ég ykkur að hafa í huga að þessi rás snýst um leit, lagfæringu og varðveislu fyrst og fremst og mín eigin stílbrögð við klippingu og hljóðsetningu er nám sem ég nota til að réttlæta vinnuna sem fer í þetta.
Mig langar að minna á áskriftartakkann því það kostar þig ekkert að gerast áskrifandi, en það gerir heilmikið fyrir uppbyggingu þessarar rásar. Að lokum minni ég svo á að með því að smella á tengilinn efst á rásarhausnum þá býð ég fullunnar loftmyndir af Akureyri frá mörgum tímabilum ásamt sérstaklega ódýrri prentun.