Ngjitje në malin e Nemërçkës (2485m), Përmet - Hiking Nemërçka Mountain, Përmet, Albania

ALBANIAN ELITE ATHLETES PRODUCTION!
Official profile on Instagram:
/ albanianeliteathletes
Ngjitja për në malin e Nëmërçkës në Përmet zgjat mesatarisht 8-10 orë.
Në këtë video do të ndiqni udhëtimin tonë, i cili filloi në fshatin Gjinkar në të lindur të diellit dhe në një lartësi rreth 250m mbi nivelin e detit. Rruga për në majën më të lartë të malit Nëmërçkë, që është maja e Papingut me një lartësi maksimale 2485m kalon nëpër brezat e bimësisë së ulët (shkurreve dhe pyjeve mesdhetare), vazhdon në brezin e kafenjtë të dushqeve e më pas në brezin e ahishteve dhe halorëve. Brezi përhershëm i gjelbërt i halorëve është brezi i fundit që të ofron hije gjatë udhëtimit për në majë, sepse pasi del nga shtegu i pyllit, gjendesh duke ecur në brezin e kullotave alpine të malit, që janë të zhveshura nga pemët dhe ofrojnë ushqim për kopetë e shumta të bagëtive të imëta që verojnë në këtë mal prej pranverës deri në mes të stinës së vjeshtës, kohë kjo kur fillon edhe ulja drastike e temperaturave dhe flokët e parë të dëborës. Kjo është arsyeja që në brezin e kullotave alpine ne gjetëm shumë lera (vaska artificiale në formë vezake dhe të shtruara me gurë për të mbledhur ujin për bagëtitë) dhe pamë në distancë stane bagëtish.
Terreni paraqiste vështirësi, ndërsa këndi i ngjitjes ishte i madh. Pas rreth 10 orë ngjitje dhe pushime të ndërmjetme, ne arritëm në pikën tonë të qëndrimit, ku kampuam dhe ngritëm cadrën/at. Në këtë pikë filloi edhe një stuhi shiu dhe me erë, që solli ulje të temperaturave (kujtojmë që për çdo 1000 lartësi, temperatura ulet me 6 gradë celsius; në këtë pikë temperature ishte rreth 13 gradë më pak nga pika jonë e nisjes). Më të mbaruar stuhia del dielli dhe nisemi pranë majës së Papingut, prej nga ofrohej një pamje e pagjendshme tjetërkund e luginës së blutë e gjelbërt së Vjosës. Prej këtu mund të shiheshin qytetet e Konicës dhe Janinës përtej kufirit shtetëror, ndërsa më pranë ndodhej vargmali paralel i Shëndëlli-Lunxhëri-Bureto, përballë këtij të Trebeshinë-Dhëmbel-Nëmërçkë, në majën e këtij të fundit ku ndodheshim ne.
Nata qe e ftohtë dhe e gjatë në çadrën e ngritur. Ajo që mund të themi shkurtimisht për këtë natë ishte që pavarësisht kushteve të motit…mbijetuam. Në mëngjes u ngritëm herët dhe pas një nxehjeje festive në mëngjes rreth orës 7 u nisëm për në pikën e nisjes së një dite më parë. Udhëtimi i kthimit dhe zbritjes zgjati 6 orë, ndërsa mblodhëm çaj mali dhe bimë të tjera që ofronte flora e pasur e malit.
Udhëtimi në tërësinë e tij është një kohë e investuar më së miri, ndërsa ju ftojmë të gjithëve ju shikuesve të sfidoni veten në këtë mal të bukur dhe të vështirë njëkohësisht! Një përvojë e tillë do t’ju vlejë për gjithë jetën, ndërsa do t’ju ofrojë një kënaqësi të madhe dhe nivel të lartë adrenaline, sikurse edhe një lodhje fizike të paevitueshme.
Udhë të mbarë guximtarëve!