"Дидар" телебағдарламасының 60 жылдық мерейтойына арналған Халықаралық айтыс.

“Дидар” телебағдарламасына - 60 жыл
ДҮРКҮРЕП ӨТКЕН МЕРЕЙТОЙ
Астанамыздағы Әлішер Науаи атындағы киношылар үйінде кезіндегі “Замандас” қазіргі “Дидар” телебағдарламасының 60 жылдық мерейтойы халықаралық деңгейде тойланды.
“Өзбекстан” телеарнасынан жарты ғасырдан астам уақыттан бері экраннан түспей келе жатқан сүйікті бағдарламаның мерейтойын өткізуге Өзбекстан қазақ ұлттық мәдени орталығы, Өзбекстан Республикасы Мәдениет министрлігі, Өзбекстан Шанхай ынтымақтастық ұйымы, Өзбекстан Республикасы ұлтаралық қатынастар және шетелдермен достық байланыстар комитеті, Қазақстан Республикасының Өзбекстандағы елшілігі, Қырғызстан Республикасының Өзбекстандағы елшілігі, “Отандастар” қоры, Өзбекстан ұлттық телерадиокомпаниясы, Қазақстан Республикасы Түркістан облысындағы Ордабасы ауданының әкімдігі атсалысты.
Мерекелік шарада сөз сөйлеген Өзбекстан ұлттық телерадиокомпаниясы төрағасының орынбасары Мадамин Сафаров, қазақ-өзбек халықтарының ғасырлар сынынан өткен достығы, ынтымақ-бірлігі күн сайын нығайып, үлгі аларлықтай жанданып жатқанын айтты. Бүгінгі өткізіліп жатқан іс-шара да осы пікірімді растайды, Өзбекстан теле және радио арналарынан көптеген қазақ журналистері ана тілінде хабар таратып, мәдениетімен бүкіл халқымызды тәнті етуде. Мерейтойдың дақпыртын естіп алыстан арнайы ат терлетіп келген басқа да қонақтар шығармашылық топқа жылы лебіздерін білдіріп, ұжымға алғысын айтып жатты.
Салтанатты шарада қырық жылға жуық еселі еңбек етіп келе жатқан “Дидар” телебағдарламасы шығармашылық тобының мүшелері, аға редакторлары Анар Нәлібаева мен Зәмира Жиенбаева, режиссер Фазлиддин Нажмиддинов, оператор Әлішер Қаратаевтар Өзбекстан Шанхай ынтымақтастық ұйымы Халық дипломатиясы орталығының төсбелгісімен, сондай-ақ басқа да ұйымдардың алғыс хаттарымен марапатталды.
Үкімет басшылары, Өзбекстан және Қазақстан Республикаларының бұқаралық ақпарат құралдары, екі мыңға жуық көрермен, бір топ өнерпаз қатысқан мерейтойда концерттік бағдарлама да қойылды.
Қазақстандық өнерпаздар Бауыржан Бегахметов пен Айнұр Әбілдина дәстүрлі әндерімен халықтың көңілін көтерсе, жергілікті өнерпаздар Марат Оразбайұлы мен Салиқожа Жиенов, Қайрат Мекембаев, Бүркіт Пиязов, жас дарын Талғат Талипов ұлттық өнерге шөліркеген халықтың құлақ құрышын қандырды. Мерекелік кешті Жоғарышыршық ауданының өнерлі жігіті Талғат Қалдыбаев пен білікті журналист Зәмира Жиенбаева жүргізді.
“Замандастың” ұйымдастыруымен жылсайын өнер кештері, концерттер, кездесулер өткізілді. Әсіресе қазақтың төл өнері айтысты алғаш эфирге беріп, кеңінен насихаттаған да осы “Замандас”. Талай айтыскерлерді Ташкенттің төріне жинап, халықаралық айтыстардың өткені, ақындардың делебесін қоздырып, жанкүйерлерді осы өнермен сусындатуда телебағдарламаның үлесі үлкен десек, әсте қателеспейміз.
“Дидардың” алпыс жылдық мерейтойында да дәстүрге байланысты Халықаралық ақындар айтысы өтті. Көрерменді алдын ала құлағдар етіп, суырып салма ақындарды Ташкенттің төріне жинаған ұйымдастырушылар халықтың алғысына бөленді. Халықаралық ақындар айтысына Қырғызстаннан “Манас” драма театрының әртісі, ақын қыз Нұрайым Бақтиярқызы мен Құтман Сәдуақасов, Қазақстанның азулы айтыскерлері Нұрлан Есенқұлов пен Анар Жаппарқұлова, Қарақалпақстан Республикасынан Ринат Қожамұратов пен Алтынбек Ибрагимов, жергілікті ақындар Құлмахан Дүйсенов, Талғат Орынбеков, Мұрат Арапбаев, Асқар Тұрдыбаевтар қатысты.
Тыныштық пен бейбітшілікті, халықтар арасындағы достық пен ынтымақтастықты, өзара сыйластық пен бауырмалдықты жырға қосқан ақындар халықтың ықыласына бөленді.
Иә, айтыста қазылар алқасының шешімімен қыз бен жігіт, аға мен іні, бауырлас қазақ пен қырғыз ақындары жұптасты. Төрт сағатқа жалғасқан жыр додада жарасымды әзіл айтылып, өзбек, қазақ, қырғыз халықтарының мәңгілік достығы жырланды.
Қазылар алқасының шешімімен үшінші орынға Алтынбек Ибрагимов пен Құлмахан Дүйсенов, екінші орынға Нұрайым Бақтиярқызы мен Анар Жаппарқұлова, бірінші орынға Талғат Орынбеков, ал бас жүлдеге Нұрлан Есенқұлов лайықты деп табылды.
Қашанда қуанышты күнде бас қосып, сөз сайысына түсетін суырып салма ақындар елді толғандырған мәселелерді, жетістіктерді өлеңіне арқау етеді. Ал шығармашыл жандар өз өнерлерімен қандайда болсын мерекеде жиналған көпшілікке көтеріңкі көңіл күй сыйлайды. Ташкентте өткен халықаралық ақындар айтысы мен концерттік бағдарламада да өнерпаздар жылдар бойы эфирден түспей келе жатқан қазақ тіліндегі “Замандас”, - “Дидар” бағдарламасы жайлы, Өзбекстандағы қазақтардың жетістіктері мен үлгі алар қасиеттерін, халықтар арасындағы достықты жырына қосты.
Жаңа жылдық мереке қарсаңында қызықты да тартымды өткен мерейтой, халықаралық айтыс пен концерттік бағдарлама келген көпшіліктің көңілінен шықты. Өзбекстандағы және Қазақстанның оңтүстігіндегі әрбір қазақ шаңырағына көгілдір экран арқылы кіріп барған “Замандас” пен “Дидардың” ұлт алдындағы атқарған еңбегі орасан зор. Әлдеқашан халықтың жүрегінен терең орын алып, көзайымына айналған сүйікті телебағдарламаның алдағы жұмыстарына толағай табыстар тілейміз.