ฝัง
- เผยแพร่เมื่อ 10 ก.ย. 2024
- وصايا الاربعين
باسم رب الحشر والذاريات
نصوغ اجمل حروف القافيات
ومن يبغى الهداية والنجاة
يصلي على الحبيب اجمل صلاتي
بذكر الله تهادى كل روح
وتبرى كل آهات الجروح
ونبني من معانينا صروح
لها في مهجة الخاطر صفاتي
واشيد القاف من حسن المثال
جواهر نادره واجمل لئال
وهذا الصدق مافيها جدال
ونكتبها وتنشر في القناتي
يغنيها لنا عبدالمجيد
بصوتً عذب باللحن الجديد
يزين القاف لا زان النشيد
ويفهمها فطينين الدهاتي
هذي الدنيا دنيه ماتدوم
ولو تصفى مشاربها ليوم
يكدر حلوها مر السقوم
ترى العشرين ماترجع مياتي
إذا تبغى الهداية والصلاح
فلا تبطي ليا حان الفلاح
تجد لذة بقلبك وانشراح
ترى تنجيك من عقب المماتي
وإذا تبغى السعادة والنجاه
فحافظ ع الذكر بعد الصلاه
ولاتسمع لقتات الوشاه
لهم في كل وجهاتً حكاتي
ولازم في الحياه امك وابوك
ولا تصحب مكثرة الضحوك
ولو باعلى المراتب عشموك
متى ما احتجتهم تلقى شتاتي
واخوك اخوك لك محزم ومال
ولو يخطي على مثلك ومال
فلا يحصل زعل والا جدال
واكل الذيب من اقصى الشياتي
وهلك أولى البشر لامن تجود
ولو تكثر سواليف الحسود
نهب في عينه الثنتين عود
وهرج اللاش من تحت الوطاتي
وصل رحمك إذا تبغى النعيم
ولو جاء من هم اتعابً وضيم
تجدها عند فتاحً عليم
نهار العرض وإلا بالحياتي
وجارك صون جارك لو يجور
تجد خيرً معك وقت النشور
وهذي من وصيات الشكور
لروح القدس لمحمد وصاتي
وضيفك جود به جود اكرمين
ضيافة جود من سمن وسمين
يجود الله بنسل الاكرمين
وبيت الطيب تلقى به مباتي
ومالك لا يخالطه الربا
ما فاد البطر في قصة سبا
وجاها من نذير الله نبا
بسيل العرم عبرات وعظاتي
وإذا تبغى سعة رزقً وخير
تصدق قبل ياتيك النذير
قليل المال عند الله كثير
ولا تقصر على وقت الزكاتي
ورزقك عند وهابً سميع
عظيم الملك في خلقه بديع
خضع له كل من فيها جميع
جميع الخلق من كل الجهاتي
تظن التربية شرب وطعام
وملبس غير ماهذا الكلام
ومن وفق مع جنح الظلام
بدعوى صالحة يلقى النجاتي
قلوب الناس تشبه للزجاج
يجيك السيل من بعد العجاج
وعقب الصبر تلقى الانفراج
وهذا وعد عند الله آتي
واذا تبغى مكفرة الذنوب
فجدد توبتك صبح وغروب
وخلك سهل وانسانً رحوب
تجد خيرً من الله وهباتي
وختم القول هو مسك الختام
عليك بسنة الهادي الامام
عدد من طاف بيت الله وصام
عليه أجمل سلامي والصلاتي
كلمات / صالح الدوسي.
