Mathaa Ma Múthenya Na Útukú Na Gígíkúyú

Hindi ya tene riria gutari na thaa, Mugikuyu ni ari na umenyo wa guthoma mathaa na mahinda akihuthira uugi wa kurora riua kana kuringana na mitugo ya nyamu, ona Gikuyu-ini muthenya ni wari na mathaa mirongo iri na mana ota uria mahana ta uú maganitio uta uria Ngai atuheire Utuku na Muthenya
MUTHENYA
6-7 AM-Riua Rikiratha/Riua Rikiuma Ngo-ini
Miruri ya riua ikagereka thí, nyamu ciathi igacoka marima-ini,Mugikuyu hindi iyo etikitie thí niyo ngo ya riua, mahinda maya nimo athuri mathurimaga mahiu nao atumia makihuhukia miaki
7-8 AM- Kiroko/Ruciini
Mahinda maya kaingi niguo tugondu twagirimagwo natwo tuthenge tukahakurwo
8-9 AM- Ime Ria Itika/Ikiongithia Njau/Irera Ria Kiroko
Mathaa maya nimo kaingi ng'ombe ciakamagwo na mukami agatigiria njau iria ciacokagwo kurekererio ithii ikonge
9-10 AM- Riahiuhia Ciande/Igithii Rúuru
Andu ni matumaga rigu na mathaa maya nomo mburi na ng'ombe ciahinguragirwo cithii kuriithio, niguo ciahuhagirwo ihuni na igacamukio igathii ikigambagia ngengere cia cio
Atumia nao niguo manikaga irio nao athuri makamba njua riua-ini
10-11 AM-Miaraho Ya Ciuri
Irio cia ciana cikahagirwo nao athuri na atumia aria akuru muno oro nao makarugirwo ciao, mathaa maya nomo njahi mboco na njahi ciahuragwo nacio mbembe ikahurwo na ndiri nagwo mwere no thio na ihiga
Athuri nao makaya miatu, gwacuhia miti ya kuhangira na gwacuhia tuturwa na njungwa.
11-12 AM-Miaraho
Mahiu nimerekagirio ithiru-ini magacuna munyu na magatwarwo iriuko-ini,
Airitu nao mathiags o mariuko-ini macio gukonyora muhia magitahaga maí
12-1 PM- Riua Riegera/Riehanda
Mathaa maya nimo mahiu marikagia kunyua mai na cikeyaragania mariuko-ini na miti-ini ciue riua
1-2 PM- Miarahuko/Ikiuma Rúi
Ng'ombe niciarutagwo mariuko-ini cithií cikarie kana ikahuruka igicokagia ithagumia
2-3 PM- Riaikia Huho/Riarura
Riria mahiu mahurukite, ihii nicierutaga gwacuhia njuguma na mbiira tuiritu natwo tukeruta kwoha migathi, guthondeka ciondo na mihindo, na nogwo ihii ciendete nundano
3-4 PM- Mirugi Aka
Mathaa maya nimo aka makoragwo na mihango miingi ta gaturu, niguo matengeraga gutaha maí, kuúna ngú, gútúa miriyo na kumenya kiria kiririyo
4-5 PM- Mburi Ikiinuka
Mathaa maya nimo mahiu macokanagiririo niguo manjie thabari ya kuinuka, athuri nao mucií ni maharagiria munyu wa mahiu miharati-ini magitharaga mwaki ea kirira kia gwa tuka
5-6 PM- Makenga Ariithi
Mathaa maya nimo ariithi monekaga kuraihu makinukia mahiu mucií, ma murikwo ni miruri ya riua ni monekaga magikenga kenga
Utuku
6-7 PM- Hwa-ini/Ng'ombe Igikamwo
Mahiu ni makamagwo na njau iria cigutigitwo mucií ikongithio, miriyo nayo ikagayanio imwe ya njau na ingi ya gicegu,
Aka nao makagaya maí na ngú na imwe cigatwaro thingira
7-8 PM-Kwagia Mairia/Mburi Ikiingira/Githuki Mundu
Mburi niciangiragio niguo cihingirwo nao athui a miatu makehariria na indo ciake na magathií guthua me hamwe n kahii kamwe niguo agathomithie ugi ucio
8-9 PM- Nyungu Yahagirwo
Aka ni mahagagirira nyungu niguo marugire micií yao
9-10 PM- Ciekirwo Marigu
Nyungu yanjia kuhia, marigu ni mekiragwo na magakimwo, mathaa maya nimo ciana ciaheagwo ngano niguo citigacunge cieterere irio ihie, na nogua ndai ciagwatanagio
10-11PM- Ikiihurwo
Irio cia hia ni ciaihuragwo mathaa-ini maya natwo twana twahuna tukauma nja tukaina kibuiya na ngucu
11-12 AM- Andu Makoma/Meigirira
Andu ni mathiaga gukoma niguo mahuruke mihango iria matinda muthenya
12-1AM- Utuku Gatagati
1-2 AM- Megarura
2-3 AM- Ikiria Nyoni/Ciumbani Ikiinuka
3-4 AM- Ngware-ini/ huho Njeke
4-5 AM- Nyoni Ikigamba/ Riria Maratiire Nyina
5-6 AM- Ruoro Rugitema

[@danielkaruga7770]

Nice👌

[@addiejus7611]

good job, Ngai amurathime