Slam sur l'indépendance de la Tunisie |LPS Press Club|

إيجا نحكيو على نهار مزيان
نهار ستناوه الجندي و الطبيب و الفنان
نهار ما يتنساش
نهار الفرحة فيه ما توفاش
نحكيلك على نهار فيه رجعت تونس خضارها و فرّحت كبارها و صغارها
تمنيت نحضر و نشوف الناس نهار عشرين ملمومين
تمنيت نرى دموع الفرحة في العينين
تمنيت نحس معاهم الحرية بعد شقى سنين
بعد ما حل علينا ظلام عشش في الكنين
ريت محلاها حلمة؟
حسيت الفرحة مع كل كلمة؟
ايجا توا نحكيلك شفمّا
نلقى الناس تعاني و تقاسي
و الي تكلمو يقلك اخطا راسي
واني وين؟ نخليك كيما خلاوك ناسي؟
تقلي زايد الملامة
بعد ما خسرنا اكا ال12 حمامة
ننساك و نبيعك بعد ما حلو فيك فرعوس؟
يبطى
ما نسلم فيك و في حبك نبحر و نغوص
و نشريك و نركز الدنوس فوق الدنوس
و تتلم كدوس و حقك مش وافي
حق الجبل و الخضار و بحرك الصافي
محلاك من داخل و من برا و عالحوافي
نكتبلك لين توفى القوافي
و نزيد لين ننصب مندافي
و قلي منين الخروج
وين نتلفت يصرعني الموج
موجك لي يمشي و يزيد
مكتفني مالساق و مالإيد
لوين نشب و انتي الصاحب و الخو و اللميمة
و تاريخ حضاراتك بين عينيا ديمة
بلادي نسميك الكل في الكل و نضرب عليك بالغل
و نقلعلك الياسمين و الفل من جناين تراكنك الكحل
و حتى كان ما فماش نخلقهم و نوجدهم
و نلقاهم وين و نمدهم
و بحبايل من عرق جبيي نربطهم و نشدهم
بش ما يريحوش
و بلي خانوك أسوارك ما رخّوش
بلادي نسميك فن مالفنون
بزينك و أصلك و معمارك المتقون
خذيت العهد بش نحبك و عمري ما نخون
ما نخليكش بلّي يصير و بلّي يكون
و نعيط اسمك بأقوى صوت في وسط السكون
يا للا برا ننقشك على صفحات شبابي
و نبيع عليك جرودي و احبابي
ايجا نخيطلك من زرابي القروان سبلة
و نهديلك مالجنوب ثمرة النخلة
و ندز على برط بنزرت دورة و عكلة
على خاطر اسمك برور تجلى و تخلى
اسمك الي ندور في الحوم و نغنيه بالطبلة
بلادي ماتهونش عليا كيما ما هنتش عليك
قد ما يحاولو يقتلوك نضحي و نحييك
أطلب صغري و تعبي و عينيا نعطيك
نذبل و نغرق بش نهزّك و نعلّيك
و نفديك بالنفس لي فيا و شوية فيك
و مش كان اليوم أما انتي ديما احتفال
بغناك الزمني و بنة الموال
خاطرك أكثر من رقعة تراب مالجنوب للشمال
انتي لي سكنت البال

[@louthepoet]

♥♥♥

[@hibaouahchi6093]

ياسر محلاكم😍😍😍تونس بكم ديما خير برافو و الله ابدعتو يا حراير البلاد ابدعتو برافو مونتاج و نص و زين 🇹🇳🇹🇳🇹🇳🇹🇳🇹🇳 بلادنا كنز و تاريخنا عظيم بلادنا مينجمها حد بلادنا خيرها تجاوز الحدود و زينها ما كيفوش
Keep shining girls💪💪🤩😘#lps_press_club

[@rouaattig5625]

Merci beaucoup ma chérie ❤

[@moumas6325]

Libnet Lvideo jeey lezim tistad3awni fih khatir 7assa neksa 7aja w 3rafthech chnia.. Peut etre tawath3i ?
Hh lee birasmi yaatikonna ssa7a chway retoucheet kenit tnajm tkhali l video khir sinon keep it up up up w tkossouch ❤️