တော်ကီရိုက်မယ် - ခင်မေလေး Burmese Myanmar Classic Music Song Oldies Movie မြန်မာ ရုပ်ရှင် သီချင်း

🎥🎞ပထမဆုံး မြန်မာ့အသံထွက်ရုပ်ရှင် မင်းသမီး၏ ရှားပါးဓါတ်ပြားသီချင်း🎞💿
ကမ္ဘာပေါ်တွင် အသံထွက် ပြသနိုင်သောအခါ မြန်မာပြည်တွင်းရှိ ရုပ်ရှင်ကုမ္ပဏီများစွာမှလည်း အသံထွက်ဇာတ်ကားများ ထုတ်လုပ်နိုင်ရန် ကြိုးပမ်းကြံစည်လာကြ၏။ သို့သော် အသံထွက် တော်ကီ ရိုက်ရန်ဆိုသည်မှာ ရုပ်ရှင်ကုမ္ပဏီတွင် အသံထွက်ဖလင်၊ အသံထွက်ရိုက်ကူးနိုင်သည့် စက်ရှိရုံဖြင့်သာမကပဲ အသံထွက် ဇာတ်ကား ပြသနိုင်မည့် နောက်ဆုံးပေါ် အသံထွက်ရုပ်ရှင်ရုံများပါ တည်ဆောက်ရမည်ဖြစ်သဖြင့် ထိုအကြံအစည်မှာ ထင်သလောက်မလွယ်ကူခဲ့ပေ။ ထိုသို့ မြန်မာ့ရုပ်ရှင်ကုမ္ပဏီများ အကြပ်ရိုက်နေစဉ်တွင် မြန်မာနိုင်ငံရှိ အိန္ဒိယသူဌေး နမီဇာ ဆိုသူက မြန်မာပြည်ထက် စောစီးစွာ အသံထွက် ဇာတ်ကားများ ရိုက်ကူးလျှက်ရှိသောအိန္ဒိယရှိ အင်ပီးယီရယ် (Imperial Film Co. Ltd.) ဖလင် ကုမ္ပဏီကို ၄င်းကုမ္ပဏီမှ အသံထွက်ဇာတ်ကားများ ရိုက်ကူးရန် ပုဒ်ပြတ် ဌားရန်းခဲ့သည်။ ထို့နောက်တွင်မူ မြန်မာပြည်၏ ပထမဆုံး အသံထွက်ဇာတ်ကားဖြစ်သော “ငွေပေးလို့မရ” ဇာတ်ကားကို ၁၉၃၂ ခုနှစ်တွင် အိန္ဒိယပြည် ကာလက္ကတ္တားမြို့တွင်ရိုက်ကူးရန် ထိုစဉ်က ဒါရိုက်တာအဖြစ် အောင်မြင်နေသော ဦးတုတ်ကြီး (ခေါ်) ဦးပုကြီးအား ဌားရန်းကာ ဇာတ်ညွှန်းရေးနိုင်သည့် စာရေးဆရာ ဒဂုန်နတ်ရှင်အား လက်ထောက်ဒါရိုက်တာ ခန့်အပ်ခဲ့ပါသည်။
ထိုဇာတ်ကားအတွက် မင်းသားရွေးရာတွင် အသားဖြူဖြူ၊ ထောင်ထောင်မောင်းမောင်းနှင့် ယောင်္ကျားပီသသော ရုပ်ရည်ရူပကာနှင့်ပြည့်စုံသည့် စကားပြောသွက်သည့် တက်သစ်စ မင်းသား ဧကိုအား ရွေးချယ်ခဲ့သည်။
ပထမဆုံး အသံထွက်ဇာတ်ကားအတွက် မင်းသမီးများ ရွေးချယ်ရာတွင် အမည်တူ ခင်ခင်မေဟူသော မင်းသမီး နှစ်လက်အား ကွဲပြားစေရန် အရပ်ထောင်ထောင်မောင်းမောင်း နှင့် ပြည့်ပြည့်ဖြိုးဖြိုးရှိသူ တစ်ဦးအား ခင်ခင်မေကြီး၊ အလုံးအဖန် ကျစ်လစ်သွယ်လျသော ကျန်တစ်ဦးအား ခင်ခင်မေကလေးဟူ၍ အမည်မှဲ့ကာ ပါဝင်စေခဲ့ပါသည်။
ထို့နောက်တွင်မူ မြန်မာ့ရုပ်ရှင်ကုမ္ပဏီ အများအပြားသည် စစ်ကြိုခေတ် ငွေရတုကာလကပင် သူ့ထက်ငါ အပြိုင်အဆိုင် ကမ္ဘာ့အဆင့်မှီ အသံထွက်ကားများ ဆက်လက် ရိုက်ကူး ထုတ်လုပ် နိုင်ခဲ့ကြ၏။
အထူးဝမ်းနဲစရာကောင်းသည်မှာ ရုပ်ရှင်မင်းသမီး ခင်မေလေးသည် စစ်ကြိုခေတ် ငွေရတုကာလကပင် အသံတိတ်၊ သံစုံသွင်း၊ အသံထွက် ဇာတ်ကားပေါင်းများစွာ ရိုက်ကူးခဲ့သော်လည်း ဓါတ်ပြားလည်း အများအပြားမသွင်းခဲ့ပေ။ ထို့ထက်ဆိုးသည်မှာ ယခုအခါသူမ၏ ရုပ်ရှင်ဇာတ်ကား တစ်ကားမျှ မကျန်ရစ်တော့သဖြင့် သူမရှားရှားပါးပါးသီဆိုခဲ့သော ဓါတ်ပြားကလေးဖြင့်သာ ပရိသတ်ကြီးအား နှစ်သိမ့်လိုက်ရပါသည်။
ထို့ကြောင့် ယခုကဲ့သို့ မြန်မာ့ရုပ်ရှင် နှစ် ၁၀၀ နှင့် ကြုံကြိုက်သော အခါသမယတွင် သူမအား ဤဆောင်းပါးဖြင့် ဂုဏ်ပြုရင်း စစ်ကြိုခေတ် အသံထွက်ရုပ်ရှင်အကြောင်း စပ်ဆိုထားသော ကျနော်များ ဂီတထံတျာ အနုပညာအသံပြခန်းရှိ ပထမဆုံး မြန်မာအသံထွက်မင်းသမီး ခင်မေလေး၏ “တော်ကီရိုက်မယ်” ဓါတ်ပြားအား တင်ဆက်လိုက်ရပါသည်။
မှတ်ချက်။ ။ သီချင်းဓါတ်ပြား သရုပ်ဖေါ်အဖြစ် ကျနော်များ စာမျက်နှာခွဲ Antique Collectors Haven စာမျက်နှာမှ စုစည်းထားသော ဒဂုန်မဂ္ဂဇင်းအဖုံးပါ သူမ၏ ပထမ “ချစ်ရေစင်” အသံတိတ် ဇာတ်ကားဓါတ်ပုံများအပြင် စစ်ကြိုခေတ် ရုပ်ရှင်ကြော်ငြာများနှင့်အတူ ဝေဝေဆာဆာ တင်ပြလိုက်ရပါသည်။