راعي الفزعة | خالد ال بريك - صنهات حشر | جديد خالد ال بريك 2024

شيله رد ثناء الى رجل الاعمال :
نور بن زامل المطيري
كلمات : صنهات حشر
ياراس مالي لاتحراني ثلاث اربع ليال "
ودعتك الله والقدر مكتوب والدنيا سعه
حنا خلقنا للمصاعب والمشاوير الطوال
ونساير الايام وظروف الزمان الموجعه "
انا تعبت من المعاتب والتشره والجدال
واقفيت ادور لي على سجة ورحله ممتعه
ابطيت ادور وسع بال ولاحصل لي وسع بال
وان طالت الغيبه عسى اعذاري بعدها مقنعه
يامل قلبً مايميل الا ليا مال الظلال "
يركي عليه الشوق والذكرى القديمه تدفعه
قلبً من انواع الطواري صار تحت الاحتلال
ايعيش بين الناس كنه عايشً في مقطعه
بعض الصور في الذاكره همً سريع الاشتعال
تاخذ من الانسان عافيته وتعطيه وجعه "
اليا توغل في الصور من واقعه شد الرحال
يمكن يشوف يدين كل المسلمين تودعه "
احلام عمري راح معظمها مثل وحي الخيال
ليت الحياه ترجع اللي ماقدرت ارجعه
اقفي لحالي عن جميع الناس وافكاري لحال
واضرب فجوج الارض واسعى والدروب موسعه
يمكن تكون الراحه احياناً ورا كل انعزال "
ولا تشوف اللي تشوف وتسمع اللي تسمعه
لا استنفذت كل الحلول اخير حل الانفصال
قدام ترجي نفعة اللي مايبي لك منفعه
من طاح من عينك ماتقدر ترفعه لو بالحبال
حتى الحبال ان طاح من عينك ماتقدر ترفعه
مالي ومال اللي يشوف ان الدراهم راس مال
هذا هو اللي كل ظرفً فالحياه يزعزعه
كم واحدً يركض ورا احلامه ولا يملك ريال
يامر وينهى ويتسنع والامور مسنعه "
نمشي مع اللي مع دروب الطيب واكرام السبال
واللي مايمشي مع دروب الطيب مانمشي معه
نعرف مواجيب الرجال ونحشم وجيه الرجال
خل الوجيه اللي مراجلها خلاف الاقنعه
ماهوب انا اللي يجحد المعروف وانا اخو العيال
الله يقدرني على المعروف لين ارجعه "
انا رفيقي للكرم والمرجله مضرب مثال "
هو مصدر الامجاد والفعل المشرف مرجعه
البوصلة من خلقة الدنيا وهي تشر شمال
والطيب كله يلتفت يمه ويشر باصبعه
نور ابن زامل طيب ساس وطيب راس وطيب فال
كن المكارم في خلايا راس نور موزعه "
اسمه ثلاث حروف ونعده جبل ضمن الجبال
حتى حروف اسمه على روس الجبال مكوعه "
عز الله انه راسً عونيً ليا من قال طال "
انشهد انه راعي الفزعه قبل تستفزعه "
ياقف مواقيف النشاما ويتراكا للثقال
مايعترض بينه وبين النعم شيً يمنعه
يمه يساق المدح سوق الكيف من صفر الدلال
المدح يعرف وين مدهاله ويعرف موقعه
في مجلسه للنار شبابه وللعود اجتوال
روس النشاما في مواقيف الرجال مولّعه
لادورو للنفع والمكسب مربين الحلال
بيبان بيت الكفو في وجيه الضيوف مشرعه
ميرادها هداج تيما مشرب العذب الزلال
امن الرها مستقبلً هذا وذاك مودعه
هذا مطيريً يمينه مثل همال الخيال
اللي مقاديمه ترازم والهبايب تردعه
وبلٍ ليا هلت هماليله على جرد السهال
عقب السنين الممحله تمسي وتصبح مزرعه
عاد المطيري في مجال الطيب مايترك مجال
لاجاء مجال الطيب مايترك مجاله وسنعه "
يوم المناويخ القديمه والمصامخ والقتال
في ضفهم ترعى الشناح مصيفه ومربعه
لاصيْح الصايح وطوْح بالعمامه والعقال
من يعترض قدامهم فالدرب يلقى مصرعه

[@abdaeat_almuntaj]

ابدعتتتت❤