ОРАЗАЛЫ ЖАЙЛАУЫ. ҚҰЛҚҰДЫҚ АУЫЛЫ. ҚАЙРАТ АХМЕТОВ

ЖАЙЛАУ КЕШІ
“Оразалы” - бағзыдан,
Шопан бабам жайлауы.
Көңіл шертер наз ғып ән,
Құнды тарих қойнауы.
Қиядан көз сап маңайға,
Қыран құс отыр қырағы.
Құт қоныс болған талайға,
Шұрайлы жердің жұмағы.
Тау алабы. Нәр бұлақ,
Шегіртке үні естіліп.
Байлаулы торы арғымақ,
Кісінер жерді тепсініп.
Малдың шығып бүйірі,
Жайыла отап қыр-ойды.
Сусаған жылқы үйірі,
Құдыққа қарай құлайды.
Бұлдырық ұшар көгінде,
Қараймын белге қызығып.
Он шақты отау төрінде,
Қоныпты қатар тізіліп.
Самаурынның түтіні,
Шұбатылып зеңгірге.
Жартасқа қонған үкіні,
Қас қарая көрдің бе?!
Қызара батқан тау кешін,
Аймалай самал еседі.
Жасырып күннің сәулесін,
Ақ шатыр бұлттар көшеді.
Адыраспан, ебелек,
Сайда қалың жыңғылы.
Жайлау кеші керемет,
Жұлдызды ашық түңлігі!
АХМЕТОВ ҚАЙРАТ ПЕРДЕБЕКҰЛЫ
3.07.2024
#ҚайраттыңЖауһарЖырлары