သိပ္ပံတဖန် မွေးဖွားခြင်း (Quantum Physics)

www.k2kknowled...
K2k စာဖတ်ပရိသတ်များအားလုံး မင်္ဂလာပါခင်ဗျာ။ ဒီလရဲ့ သိပ္ပံဘာသာရပ်ကဏ္ဍ က နေပြန်လည်ကြိုဆို လိုက်ပါတယ်။ စာရေးသူအနေနဲ့ ကျန်းမာရေးအခြေအနေကြောင့် ဆေးရုံတက်ခဲ့ရတဲ့အတွက် အချိန်မှန်တင်ဆက် နိုင်ခြင်းမရှိခဲ့တာကို ဦးစွာ အသိပေးလိုပါတယ်။ သို့သော်လည်း အဆိုးထဲက အကောင်းဆိုသလို ဆေးရုံ မှာနေခဲ့ရတဲ့ ရက်များအတွင်း သိပ္ပံနဲ့ ပတ်သက်တဲ့ ပစ္စည်းတွေနဲ့ ထိတွေ့ခဲ့ရတာကြောင့် သိပ္ပံကဏ္ဍ အတွက် တင်ဆက်စရာ အကြောင်းအရာများစွာကို စိတ်ကူးခွင့် ရရှိခဲ့ပါတယ်။ ဒီတစ်ပတ် စာဖတ်သူများအတွက် တင်ဆက်မဲ့ အကြောင်းအရာလေးကိုတော့ သိပ္ပံ တဖန်မွေးဖွားခြင်း လို့ အမည်ပေးထား ပြီး Quantum Physics (ကွမ်တမ် ရူပဗေဒ) နဲ့ မိတ်ဆက်ပေးမယ့် ခေါင်းစဥ်လေးပဲဖြစ်ပါတယ်။ ဒီအကြောင်းအရာလေးကို ရွေးချယ်ဖြစ်ခဲ့တာက စာရေးသူရဲ့ သူငယ်ချင်း Blog လေးဖြစ်တဲ့ theinlinaung.com ကနေ ဖတ်ရှုမိရင်း ကတစ်ကြောင်း၊ ဒါ့အပြင်စာရေးသူ ဆေးရုံတက်စဥ်က ကြုံတွေ့ခဲ့ရတာလေးကြောင့်လည်းဖြစ်ပါတယ်။ ဆေးရုံမှာအခန်း ရတော့ အခန်းထဲမဝင်ခင် ၁ နာရီလောက် အပြင်ကနေ စောင့်ရပါတယ်။ အကြောင်းက အခန်းကို UV Light (ခရမ်းလွန်ရောင်ခြည်) နဲ့ ပိုးသတ်နေတာကြောင့် ဖြစ်ပါတယ်။ ဒီအကြောင်းလေးကို ကြားလိုက်ရတော့ အခုလို သိပ္ပံပညာရပ်တွေ ထွန်းကားနေချိန်မှာ ခရမ်းလွန် ရောင်ခြည် ရရှိအောင်ပြုလုပ်တာဟာ ဆန်းကျယ်တဲ့ အရာမဟုတ်သော်လည်း ဒီလိုမထွန်းကားခင် ၂၀ ရာစု အစ မှာတော့ ဆန်းကျယ်တဲ့ ကိစ္စတစ်ခုအဖြစ်ရှိခဲ့ပါတယ်။ သိပ္ပံလောက တစ်ခုလုံးကို မေးခွန်းထုတ်ရလောက်တဲ့အထိ ဆန်းကျယ်တဲ့ ဖြစ်ရပ်တစ်ခု ပေါ်ပေါက်ခဲ့တယ် လို့ဆိုရမှာပါ။
ဒီနေ့ဆောင်းပါးလေးရဲ့ ခေါင်းစဥ်က သိပ္ပံတဖန် မွေးဖွားခြင်းလို့ အမည်ပေးထား ရခြင်းက သိပ္ပံအဟောင်း ရှိတယ်ဆိုတဲ့ သဘောကို ဖော်ဆောင်နေတာ အားလုံးသိမယ် ထင်ပါတယ်။ ဒီလို ရှိခဲ့တဲ့ ရူပဗေဒ မှန်ကန်ချက်အဟောင်းများကိုတော့ စာရေးသူတို့က Classical Physics ရယ်လို့ နာမည်ပေးထားပါတယ်။ အဲ့ဒါတွေကတော့ နယူတန်ရဲ့ အရွေ့နိယာမများ (Mechanic)၊ Maxwell ရဲ့ Electromagnetic radiation နိယာမများ၊ Botzman ရဲ့ အက်တမ် နဲ့ Thermodynamics နိယာမများ စတာတွေဖြစ်ပါတယ်။ ရှေးဟောင်း သိပ္ပံသဘောတရားများကို အသုံးပြုပြီး စာရေးသူတို့ လူ့အဖွဲ့အစည်းအနေဖြင့် လူ့လောကသဘာဝ အကြောင်းအရာများကို သိသင့်သလောက်သိခဲ့ကြပြီးဖြစ်ပါတယ်။ သို့သော်လည်း ပိုးသတ်ဆေး (antibiotic) တစ်ခုဟာ ရောဂါပိုးတိုင်းကို မသတ်နိုင်သလို နိယာမတစ်ခုဟာ လည်း အကုန်လုံးအတွက် မမှန်ကန်နိုင်ပါဘူး။ ဒါကြောင့် သိပ္ပံ တဖန် မွေးဖွားလာရခြင်းဟာ ခေတ်ဟောင်းသိပ္ပံ မှားယွင်းနေတယ်လို့ ဆိုလိုခြင်းမဟုတ်ပဲ သိပ္ပံနိယာမ အဟောင်းများကို ကို မလိုက်နာတဲ့ အဏုမြူ အရွယ် အရာများကို မြင်တွေ့လာရခြင်းကြောင့်ပဲဖြစ်ပါတယ်။
သမိုင်းလေးကတော့ဒီလိုဗျ။ Max Planck (မက်စ်ပလန့်) ဆိုတဲ့ သိပ္ပံပညာရှင်တစ်ဦးဟာ ဂျာမနီ အဖွဲ့အစည်းတစ်ခုရဲ့ တောင်းဆိုမှုကြောင့် ကြေးနန်းမျှင် မီးလုံးအတွက် ပိုမိုစွမ်းအင် ခြွေတာနိုင်ရန် စမ်းသပ်မှုတစ်ခုကို ဆောင်ရွက်နေပါတယ်။ မီးလုံးထွန်းညှိတဲ့အခါ ကြေးနန်းမျှင် ပူလာပြီး အလင်းရောင် ထွက်ပေါ်လာရခြင်းသည် ကြေးနန်းမျှင်တွင်ရှိသော Electron များ တုန်ခါခြင်းကြောင့် ဖြစ်ပါတယ်။ စာရေးသူ အလင်းအကြောင်း တင်ဆက်စဥ်က ပြောခဲ့သလိုပဲ အလင်းဟာ လှိုင်းအမျိုးအစားများစွာရှိပြီး စာရေးသူတို့ လူသားတွေ မြင်နိုင်တဲ့ အလင်းဟာ Range တစ်ခုရှိပါတယ်။ ဒါကြောင့် မီးလုံးထွန်းတဲ့အခါမှာ မလိုအပ်တဲ့ အနီအောက်ရောင်ခြည်လှိုင်းတို့ ခရမ်းလွန်ရောင်ခြည်တို့ စတာတွေကို မထုတ်လွှတ်ပဲ စွမ်းအင်ခြွေတာတဲ့အနေဖြင့် မြင်နိုင်တဲ့အလင်းများ (Visible Light) ကိုသာလျှင် ထုတ်လွှတ်နိုင်တဲ့ စွမ်းအင်ပမာဏ နဲ့ မီးလုံးကို တီထွင်ဖို့အတွက် Max Planck က ဆောင်ရွက်နေတာ ဖြစ်ပါတယ်။ ဒီလိုစမ်းသပ်တဲ့ နေရာမှာ Max Planck အနေဖြင့် အခက်အခဲ ကြီးကြီးမားမား တစ်ခုကို ကြုံတွေ့ခဲ့ရပါတယ်။ ဒါကတော့ ယခုစမ်းသပ်ချက်များသည် ဒီမတိုင်ခင်က ရှိခဲ့တဲ့ လျှပ်စစ်သံလိုက်လှိုင်း သီအိုရီ (Electromagnetic Wave Theory) များ ကို လိုက်နာခြင်းမရှိတာပဲဖြစ်ပါတယ်။ Electron များ တုန်ခါခြင်းမှ ထွက်ပေါ်လာတဲ့ စွမ်းအင်လှိုင်းများ၏ Frequency and Intensity တစ်နည်းအားဖြင့် Energy Spectrum သည် သီအိုရီ နဲ့လက်တွေ့ ကွာဟ နေခြင်းပဲဖြစ်ပါတယ်။
ဒီလိုတွေ့ရှိချက်ဟာ Classical Physics အပေါ်မေးခွန်းထုတ်စရာ ဖြစ်ခဲ့ပါတယ်။ ဒီလိုနဲ့ လက်တွေ့စမ်းသပ်ချက် များကနေတစ်ဆင့် အလင်းလိုက်နာတဲ့ တွေ့ရှိချက်တစ်ခုကို Max Planck က ရရှိခဲ့ပါတယ်။ ဒါကတော့ အလင်းက လာတဲ့ စွမ်းအင်များသည် တစ်ဆက်တည်း (Continuous) မဟုတ်ပဲ ပြတ်တောင်းပြတ်တောင်း ပုံစံမျိုး (Discrete) ဖြစ်သည်ဆိုတဲ့ အချက်ပဲဖြစ်ပါတယ်။ ဒီအချက်ကို သင်္ချာနဲ့ နီးနီးစပ်စပ် မရှိသော မိတ်ဆွေများအတွက် မြင်သာအောင်ပြောရမယ် ဆိုရင် စာရေးသူဆေးရုံတက်စဥ်က Drip ချိတ်မယ်ဆိုရင် ပိုက်ကနေတစ်ဆင့် သွေးကြောထဲကို ဆေးရည်တွေသွင်းရပါတယ်။ ဒီလိုသွင်းတဲ့ နေရာမှာ တစ်စက်ချင်း ချမှ လူက ခံသာမှာဖြစ်ပါတယ်။ ဒီလိုတစ်စက်ချင်း တစ်စက်ချင်း ကျနေတာကို Discrete ရယ်လို့ ခေါ်ပါတယ်။ Max Planck က အလင်းသည် လှိုင်းများကိုသယ်ဆောင်ထားသော အစက်လေးများ (Quanta) ဖြင့် ယခုလို ပြတ်တောင်းပြတ်တောင်းပုံစံမျိုးလာ၍ လှိုင်းအလျှားပေါ်မူတည်ပြီး အစက်အကြီးအသေး ကွာခြားတယ်လို့ သုံးသပ်ခဲ့ပါတယ်။ သို့သော်လည်း သူကိုယ်တိုင် မိမိတွေ့ရှိချက် Quantum အပေါ် မဖြစ်နိုင်ဘူးဆိုတဲ့ သံသယတွေရှိနေခဲ့ပါတယ်။ ၁၉၀၅ ခုနှစ် မှာတော့ သိပ္ပံပညာရှင်ကြီး Albert Eistein က Planck ရဲ့သီအိုရီပေါ်အခြေခံကာ အလင်းသည် လှိုင်းကဲ့သို့ပြုမူသော အမှုန် Photon ဆိုသည်ကိုဖော်ထုတ်ပေး ပေးနိုင်ခဲ့ပါတယ်။ ဒါကြောင့် အိုင်စတိုင်း က Planck ထက် ဦးစွာ Quantum Theory ကိုလက်ခံခဲ့ သည်လို့ ဆိုနိုင်မှာဖြစ်ပါတယ်။ မည်သို့ပင်ဖြစ်စေ ဤအကြောင်းတရားများကို အခြေခံကာ လူသားများအတွက် အကျိုးဖြစ်ထွန်းစေမည့် ခေတ်သစ်သိပ္ပံကို တဖန်မွေးဖွားပေးခဲ့သည်လို့ဆိုရမှာဖြစ်ပါတယ်။

[@amkgaming570]

Thanks a lot for your knowledges sharing.I always support you bro.

[@k2kknowledgebank]

Thanks, I appreciate it

[@heinzaw4371]

Thank you pr ❤️🥰

[@k2kknowledgebank]

Welcome

[@KyawKoKoKhaing-f4t]

1 မိနစ်ကျော်လောက်က လိုရင်းကိုမရောက်

[@k2kknowledgebank]

SOrry ပါ

[@Than_Htike_Aung]

Quantum အကြောင်းကို ယခုထက်ပိုပြီး သိရှိလိုပါတယ်ဗျ

[@k2kknowledgebank]

Quantum computer အကြောင်းတင်ထားတာ ကြည့်ပြီးပြီလား

[@Than_Htike_Aung]

@@k2kknowledgebank ဟုတ် ကြည့်ပြီးပါပြီဗျ

[@wathung770]

introduction to quantum mechanics

[@minhan2003kr]

science theorys တွေကိုရှင်းပြပေးလို့ကျေးဇူးပါ အစ်ကို ထပ်မျှော်နေပါတယ်လို့❤

[@k2kknowledgebank]

အားပေးစကားကြားရတာ ဝမ်းသာပါတယ်ဗျာ