Kamal Bu3mara à Montréal / Débat, partie 2

asarag akked Dr. Kamel Bouamara
Asentel: Amkan n usegzawal ISSIN deg walmud d uselmed n Teqbaylit.
Ayen id nenna ɣef Dr. Kamel Bouamara drus. Ur nezmir ara ad nini ugar n wayen id yenna fell-as umeɣnas Mas Zidan Yasin (ⵢⴰⵙⵉⵏ ⵣⵉⴷⴰⵏ). Atan ɣur-wen:
Aṭas n medden i yesnen argaz-a ama deg tγuri n yidlisen i d-yura neγ deg yisurag i d-yefka neγ ulamma deg rradyu neγ deg tiliẓri n tmaziγt; maca llan wid i yesteqsayen γef umezruy-is; tameddurt-is d umecwar-is ameγnasan γef tumast-nneγ. Γef wakka ad neɛreḍ amek ara d-nsuk tiṭ γef yiwen i yefkan lğehd n wallaγ-is i tmentelt tuγdimt γef wacu mmuten aṭas.
Kamal Buɛmara, d yiwen seg yizmawen i d-teğğa temnaḍt n Tmeẓrit i d-yezgan deg tama n umalu n Bgayet.
Argaz-a ilul mi tezɛef tegrawla n tmurt-nneγ ass n 25 deg γuct aseggas n 1959. Ikcem γer uγerbaz i tikkelt tamezwarut aseggas n 1965. Sin akkin yerra γer uγerbaz alemmas n Sidi Ɛic. 03 n yiseggasen yekcem tasnawit n Debbih Crif i d-yezgan deg Uqbu. Ayen i yefka d lğehd d tγuri ssawḍen-t ad yawi akayad n lbak deg yunyu 1980, tallit ideg teḥma tefsut n Yimaziγen. Mi yekcem γer tesdawit, Mass Buɛmara, yeγra deg tsuddut taγelnawt n tfellaḥt (INA) i d-yezgan deg Lḥerrac (Lezzayer), anda i yeqqim ugar n 05 n yiseggasen s wayes i d-yeffeγ s ugerdas (diplôme) Ajenyur deg tussna n tfellaḥt ( Aḥric n tdamsa). Tayri-s i tmaziγt, tewwi-t ad yeğğ taγult γef wacu i yefka acḥal d aseggas i wakken ad d-yeḍfer abrid n tussna n tmaziγt. Dγa yella deg yimezwura i ixedmen tazrawt n nnig n turagt deg Tesga n Tutlayt d Yidles n Tmaziγt deg tesdawit n Bgayet s wayes i yesɛa lmajister deg tsekla n tmaziγt aseggas n 1995.
Aseggas n 1996 yewwi-d agerdas n tezrawin talqayin (D.E.A.) deg INALCO, deg tmanaγt n Fransa (Lpari). Imi leɛtab ur t-id-nettader! Akken i das-yenna umedyaz, Buɛmara iwala dakken leqdic i iga deg tezrawt-is n lmajister ur yemmid ara, ihi iḥettem γef yiman-is ad yernu anadi deg tezrawt i iga akken ad d-yessekfel yiwen n umedyaz ameqqran aqbur n Leqbayel seg tattut Si Lbacir Amellaḥ. D tazrawt n Dukṭura iwumi isemma Littératude et société: le cas de Si Lbachir Amellah (1861-1930), un poète chanteur de Petite Kabylie. Ma nuγal-d s telqey γer tezrawt-a (la thèse), tella-d γef yiwen n umeddaḥ n Tmurt n Leqbayel i iɛacen deg tallit n unekcum arumi. Mass Buɛmara - γas tuget n wakud ideg yexdem leqdic-a yesɛedda-t deg Tmurt n Leqbayel (Bgayet)- aseqdec n usentel-a i wumi i d-yezga i lmendad Ɛebdellah Bunfur, yella-d deg temdint n Lpari aseggas n 2003. Dγa iwakken ad tt-yebnu d tazrawt, aselmad-a yefka seg tudert-is i uḥric-a n unadi ussnan ugar n 10 n yiseggasen. Γas zrin yiseggasen, yeɛteb wallaγ, terza-d lγella. S leqdic-a yesɛan azal meqqer, amassan Kamel Buɛmara yesnerna-d ixulaf i tsekla tamaziγt; am wakken i yeḥrez aḥric deg-s seg tattut, imi tasekla-ya, tella yerna mazal-itt deg timawit, ur tressi ara iman-is deg tira. Am wakken yefka yakan tudert i wawal n Léopard Sédar Senghor “Yal amγar, yal tamγart ara yemmten, d tamkardit i yettruγen!” D ayen ara yeğğen, s udlis-a n Kamel Buɛmara, amedyaz - acennay Si Lbacir Amellaḥ ad d-ibin, γas ulamma , d iseggasen-aya ur yettwbdar ara, ulac win yuran fell-as; ad d-yeffeγ γer tafat, ad γren fell-as medden, ad d-ğğen awal fell-as i warraw-nsen, ad yaγ amur deg tsekla n tmaziγt, s umata. Mi ara nesfeḍ aγebbar γef yiwet n teγmert seg umezruy-nneγ, amassan-a yuklalen leqder s leqdic-is ussnan, d win ara aγ-yilin d tallelt i tmuγli γer yizri, yebnan γef wawal d timawit, ladγa tallit n unekcum arumi i tegzi akken iwata, abrid ansa i d-nɛedda d wamek ara yili usirem i tikli γer sdat.