Bertso jarriak 7: Sumagezurrenak (Unai Mendizabal)

2014/12/05 Amasa
Harituz Bertsozale Taldeak antolatuta BERTSO JARRIEN GAUA
7. SORTA: Sumagezurrenak Erositako prezioan (Unai Mendizabal)
Baserrin ezta bukatzen lanik
nahiz hala den esaera
zertan bukatu jakin behar da
eman aurretik hasera.
Jaten eman eta azpiak
egiteakin batera
ia lan denak bukatu nitun
hamar terdiak aldera.
Txikitatikan datorkidanez
ehizarako grina neri
udazkeneko hego haizetan
ezin gera egon geldi
etxe_inguruko tontor batera
aldendu gabe gehiegi
usotarako leku aparta
nola degun Bulandegi.
Hamabitako kanpaiak dantzan
hastian goiko elizan
alerik ere ikusi gabe
nenoen askotan gisan.
erramientak utzi ondoren
pago zar baten gerizan
ezertarako presarik gabe
belarretan etzan nintzan.
Begi bakar bat itxita dula
iten du lo azeriak
nahiz azeritik zerbait badedan
nik itxi nituen biak.
Haize hots batek esnatu nindun
haize hots haundiegiak
zer pasatzen zan ikusi asmoz
zabaldu nitun begiak.
Ekaitz laino bat ote zan edo
zan nere lehen ustia
nola normala ez dan holako
uso bandak ikustia
laino beltz harek estaltzen zitun
zerua ta eguzkia
utziz ilunpian Bulandegi
ta Elbarrena guztia.
Ikaratuta nunbait ihesi
negu usaineko hotzak
lurretik ere ikus zitezken
usoen moko txorrotxak
milaka ziren zihoazenak
astinduz bi hego motzak
Amasatike entzungo ziran
haien hego kolpe hotsak.
Izugarrizko harridura bat
sortu zan barruan nigan
hainbeste pixti_ikustian nere
buruan gainian jiran.
Eskupetari nahiz ta eskua
erantsi nion segidan
kañoia gorantz ipintzerako
ihesian juan ziran.
Pentsatu nuen Afrikatikan
etorri dituk honera
nekaturikan egongo dituk
egarriturik gainera,
seguruenik joango dituk
Akezko_Errota aldera
hango botanan preskatu eta
ur trago bat egitera.
Buru lixtua izan behar du
beti ehiztaria danak
hala izaki asmatu nitun
zein ziran usuen planak.
Nahiz berrehun metro koadro baditun
aipatu dedan botanak
danak uretan sartu nahi baino
ez ziran kabitzen danak.
Gorde lekutik atera nintzan
al bezain mantso mugituz
denak ihesi joan ez zitezen
arrimatu nintzan kontuz.
Ni ikustian han hasi ziran
zipriztin eta istiluz
sagar zaku bat eskuan hartu
ta zast sartu nintzan buruz.
Nahiz hegatutzen saiatzen ziran
ihesian hainbat bider
lumak bustirik zeuzkaten eta
laister egiten zuten leher
nik bitartian biltzen nituen
igeria, eskuin ezker
eskutan neukan sagar zakuak
gainezka egin zun laister.
Hartan nintzala zerbait igeri
ikusi nuen uretan
zortzi kiloko erbi haundi bat
zebilen putzuan bueltan
kolp bat eman buruan eta
seko utzi nuen bertan
eskurik libre nola ez neukan
atera nuen hortzetan.
Etxe aldera abitu nintzan
pozez brinkuak eginez
baina bi hankak sentitu nitun
laster kargatuak zinez
ematen zuten hankak estali
zizkidatela burdinez
karga guztia utziz geratu
nintzan jarraitu ezinez.
Oinetan nitun karga horiek
nola normalak etzian
exeri nintzan bide ondoko
petril zar baten ertzian
hura sorpresa hartu nuena
larruzko botak kentzian
zazpi amorrai azaldu ziran
oinetako bakoitzian.
Bertso guztiak sinistatzeak
maiz ematen ditu lanak
holako kontuk izaten zitun
_____________________zanak
nik horrelaxe jasuak ditut
Sumagezurrek esanak
erositako prezio hartan
saltzen dizkizuet danak.