Balti Marsia 2021 || Marsiya Hazrat Ali Akbar A.S || Ingut Kharmang Baltistan

شہزادہ تھانینگ نا لینے کہیونگمی بروربزگوامیک کن کہراغی گنگسے
بیونگ ربینگنہ فرول لقپہ سکورین حضرت لیلیٰ گونگژوچدے فانگسے
اہل حرم سکیلہ بورے حضرت لیلیٰ یودپی بروک ربزگوا
دیمنہ کہوری رگسپی ببا خشولا کہورے کہونگس لقپونگ تہوروفانگسے
انوسکورلے انوے جوان بو زیرے فودین گو چہونگس بوی رگوبونیکہا
غدونگپو کھیرے غدونگ پویکہہ کلے گوق پا مینما ژامژے بیسے ہلژانگسے
کھیانگ سویکہہ کہروسے ژومسے دوگید لیخموی غزیمک پو ہلقچی فیسے ملتا
لنگسے انولا ہلقچہ ہلتوسی لے انوے مظلوم میکپو فیسے سکانگسے
انوچہ بیالے انوے میگی عود علی اکبر یانگ ژوخ بو ستورینا
یری ببالا عمر سعدی بگژھانگ بید علی اکبر زدیپہ تونگزیرے ہلژانگسے
سترینگمونگنہ زیزیونی علی اکبر زیرے قو بین نوسکت کوسے دروقسے
لقپنگ نو عصاچہ ہرتینے شخص سید سجاد کھیرے فوغینچہ لنگسے
چوقپہ فیسے گوستونگ پو سکینہ سی زیرید پہ گومبیکہہ کلے گو
نا گیودپہ نا ژھیر کھینگنو ستورید یمبو مسونگفی یری ہرتہ لزالا بڑانگسے
دے ندپہ امام نہ دریسے سترینگمونگنہ زیزیونگنی تھونگسے دے بیالوکہہ پو
کہوری خچسپہ ببا یود پہ کہورین یونگ چوغی خسمبینگ تھودپو فودے فانگسے